Caitami yachashun

•  ¿Amigocunallachu canchij?

•  ¿Pihuan rijsinacushpa llujshingapaj listochu cangui?

  Huaquincunaca shuj cꞌarihuan shuj huarmihuan cutin cutin llujshinaca mana malochu can nincunami. “Shuj cꞌarihuan shuj huarmihuan cutin cutin llujshina” nishpaca alli rijsinacungapaj, novios cangapaj mana deganamanta llujshina cashcatami nisha nin. Cai yachaipimi caimanta yachagrinchij.

 Tiempohuanca pihuan llujshishpa rijsinacushpaca shuj decisiontami agllana cangui, paihuan cazaranata o paimanta caruyanata. Can pihuan ña llujshicushpaca cazarangapaj o paimanta caruyangapajmi allichirishca cana cangui.

 Can ima decidishcapi yuyai: Pihuan cutin cutin llujshingapaj preparado cashcata yuyashpaca cazarangapajpish listo cashcatami yuyaipi charina cangui.

  Shuj cꞌarihuan shuj huarmihuan cutin cutin llujshicushpaca cazarangapajmi cana can. ¿Cazarangapajca ima cualidadcunatataj ricuchina cangui?

•   ¿Cambaj familiataca ima shinataj tratangui? Yallitaj preocuparishca cashpaca ima shinami cambaj familiata tratangui, chashnallatajmi cambaj huarmita o cambaj cusatapish tratangui.

   Bibliaca caitami yachachin: “Yallitaj resintirinata, yallitaj pꞌiñarinata, coleranata, caparinata, llaquichij shimicunata rimanata, tucui mana allitapish saquichij” (Efesios 4:31).

   Cashna tapuri: ‘Ñuca familiataca: “¿Cancunataca ima shinataj tratani?” nishpa tapujpica ¿paicunaca imatashi ningacuna? ¿Paicunahuan mana de acuerdo cashpaca yallitaj pꞌiñarinichu o ñuca ima yuyashcataca alaja shimicunahuanchu parlani?’.

•   Canllapi ama yuyaichu. Ña cazarashpaca cambaj huarmipaj o cusapaj munashcacunatarajmi punta lugarpi churana cangui.

   Bibliaca caitami yachachin: “Chaimanta quiquinlla alli canata mashcanapaj randica, shujtajcunapaj allita mashcashpa catichij” (1 Corintios 10:24).

   Cashna tapuri: ‘¿Siemprechu ñuca munashcata rurani? ¿Shujtajcunaca ñucallapi yuyashcata o shujtajcunamanta preocuparishcatachu yuyancuna? ¿Imacunallata rurashpataj mana ñucallapi yuyashcata ricuchini?’.

•   Humilde cangapaj esforzari. Shuj alli cusa o alli huarmi cashpaca pandarishpapish, perdonta mañana cashcatami yachan.

   Bibliaca caitami yachachin: “Tucuicunami achca cutin pandarinchij” (Santiago 3:2).

   Cashna tapuri: ‘¿Pandarishcata reconocinichu? ¿Shujtajcuna ñuca imapi mejorana cashcata consejajpica pꞌiñarinichu?’.

•   Cullquita alli administrangapaj esforzari. Cullquita alli administranata yachajca matrimonio ucupi cullquimanta ima problemacuna mana tanto tiyachunmi ayudanga.

   Bibliaca caitami yachachin: “Cancunamanta maijanpish shuj torreta shayachisha nishpaca tucuchingacama rurangapajca, ¿manachu mashna cullquita minishtishcata puntapica alli yuyarin?” (Lucas 14:28).

   Cashna tapuri: ‘¿Ñucaca cullquita alli administranatachu yachani o siemprechu dibicunata charini? ¿Cullquita alli administranataca ima shinataj ricuchishcani?’.

•   Diosta alli sirvingapaj esforzari. Can testigo de Jehová cashpaca punllantami Bibliata liyina cangui, tandanacuicunamanpishmi rina cangui.

   Bibliaca caitami yachachin: “Diosmanta yachana munaita yuyaipi charijcunaca cushicuncunami” (Mateo 5:3).

   Cashna tapuri: ‘¿Bibliata liyingapaj, tandanacuicunaman ringapajpish esforzaricunichu? ¿Diosta sirvinata punta lugarpi churanapaj randica shujtaj cosascunatachu punta lugarpi churani?’.

 Can ima decidishcapi yuyai: Can cazarasha nishpaca alli cusa alli huarmi cangapajmi esforzarina cangui. Alli joven o alli soltera cangapaj esforzarishpaca alli huarmihuan o alli cusahuanmi cazarangui.