Jesusca gentecuna juchamanta quishpirichun, huiñai causaita charichunmi huañurca (Romanos 6:23; Efesios 1:7). Ashtahuanpish Jesusca huañungacamami Diosta cazurca. Chashnami gentecuna llaquicunata charishpapish Diosta cazui tucushcata ricuchirca (Hebreos 4:15).

 Shuj runalla huañushpa achca gentacunata quishpichi tucushcata ricushun.

1.   Jesús huañujpimi Diosca ñucanchij juchacunata perdonai tucun (Colosenses 1:14).

    Diosca punta runa Adanta rurashpaca jucha illajtami rurarca. Cai runaca paillatajmi Diosta mana cazunata agllashpa juchayuj tucurca. Chaimantami paipaj huahuacunapish juchayuj tucurcacuna. Bibliapica “shuj runa mana cazushcamantami achcacuna juchayujcuna tucurcacuna” ninmi (Romanos 5:19).

    Jesuspish jucha illajmi carca. Pero paica mana Adán shinachu juchata rurarca. Chaimantami ñucanchij juchacunamanta paipaj causaita cushpa quishpichi tucurca (1 Juan 2:2). Adán mana cazushcamantami tucui cai pachapi causajcunaca juchamanta mapayashca shina saquirishcanchij. Pero Jesuspi feta charishpami mapamanta chuyayacuj shina tucunchij.

    Adanca mana cazushcamantami ñucanchijtaca juchaman cꞌatuj shina curca. Pero Jesusca tigra randij shinami paipaj causaita cushpa ñucanchijta quishpichirca. Chaimantami ima juchata rurashpaca, ñucanchijmanta Dioshuan rimajta charinchij. Paica cashcata ruraj Jesucristomi (1 Juan 2:1).

2.   Jesusca “pipish paita crijca ama chingarishpa, ashtahuanpish huiñai causaita charichunmi” huañurca (Juan 3:16).

    Diosca huiñai causaita charichunmi Adantaca rurarca. Pero pai mana cazushcamantami huañurca. Adanpaj culpamantami, “juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchallishcamantaca, huañuica tucui runacunaman shamurca” (Romanos 5:12).

    Juchamanta, huañuimanta quishpichingapajmi Jesusca paipaj causaita curca. Shinami paipi feta charijcunaca quishpiri tucuncuna. Bibliapica: ‘Juchaca huañuimanmi apangapaj mandacurca. Chai shinallatajmi Mandaj Jesucristomantaca, mana cꞌuyaipajta cꞌuyaipish huiñai causaita cushpa huiñaipaj mandanga’ ninmi (Romanos 5:21).

    Manaraj huiñaita causacunchijchu. Pero ñallami Jehová Diosca pai nishcata pajtachishpa cazuj gentecunamanca huiñai causaita cunga. Shinallataj Jesusmantami huañushcacunatapish causachishpa huiñaita causachun ayudanga (Salmo 37:29; 1 Corintios 15:22).

3.   Jesusca huañungacamami Diosta cazurca. Chashnami gentecuna llaquicunata charishpapish Diosta cazui tucushcata ricuchirca (Filipenses 2:8, La Biblia, Traducción del Nuevo Mundo).

    Adanpaj yuyaipish cuerpopish jucha illajmi carca. Pero mana alli yuyashpami paipaj mana cashcata japishpa Diosta mana cazurca (Génesis 2:​16, 17; 3:6). Achca tiempo qꞌuipami, Diabloca: “Gentecunaca cꞌuyaimantaca Diosta mana cazuncunachu. Llaquicunata charishpaca Diosta sirvinata saquinllacunami” nishpa juchachirca (Job 2:4). Diablo chashna juchachijpipish, Jesusca llaquinaita huañuna cashpapish tucuipimi Diosta cazurca (Hebreos 7:​26). Chashnami Diablo nishcacuna llulla cashcata ricuchirca. Runacunaca llaquicunata charishpapish cꞌuyaimantami Diosta cazui tucuncuna.

Jesús huañushcamanta tapuicuna

•   ¿Gentecunata quishpichingapajca imamantataj Jesusca llaquinaita huañuna carca? ¿Adán juchapi urmashca huashaca ima nishpataj Diosca huañuita mana anchuchirca?

   Bibliapica: “Juchaca huañuitami cun” ninmi (Romanos 6:​23). Shinallataj Diosca Adantaca mana cazushpaca huañunguimi nircami (Génesis 3:3). Diosca mana llullaj cashcamantami Adán mana cazujpica huañuchun saquirca (Tito 1:2). Chashnami Adanca paipaj huahuacunataca mana juchayujllata rurarca. Ashtahuanpish huañuna llaquipi churarca.

   Gentecunaca juchayuj cashcamantami huañuna can. Pero Diosca cꞌuyashpami quishpichisha nirca (Efesios 1:7). Chaipajca paipaj shujlla Churi Jesustami ñucanchijmanta huañuchun cacharca. Chashnami Diosca llaquij, allita ruraj cashcata ricuchirca.

•   ¿Jesusca ima punllataj huañurca?

   Bibliapica Pascua fiestata ruracui punlla 3 chishipimi Jesusca huañurca ninmi (Marcos 15:33-​37). Calendariopi ricushpaca huata 33, viernes 1 de abrilta huañushcatami ricunchij.

•   ¿Jesusca maipitaj huañurca?

   Jesustaca Uma Tullu shuti lugarpimi huañuchircacuna. Chai lugartaca hebreo rimaipica Gólgota nisha ninmi (Juan 19:17, 18). Jesuspaj punllacunapica Gólgota nishca lugarca Jerusalenpaj pircacunamanta canllamanmi saquirirca (Hebreos 13:12). Bibliapica Jesusta huañuchicujta carumantami ricurcacuna ninmi. Chaimantami Jesusta shuj urcupi huañuchishcata yuyachin (Marcos 15:40). Shinapish Gólgota nishca lugar maipi saquirishcataca mana yachai tucunchijchu.

•   ¿Jesusca shuj cruzpichu huañurca?

   Achcacunaca Jesusca shuj cruzpimi huañurca nincunami. Pero Bibliapica shuj caspipi huarcushpa huañushcatami nin (Hechos 5:30). Bibliata quillcajcunaca Jesús ima shina huañushcata parlangapajmi griego rimaipi ishqui shimicunata churarcacuna: staurós y xýlon. Achca estudiashcacunaca: “Cai shimicunaca mana shuj cruz cashcatachu ricuchin. Ashtahuanpish shuj caspi o shuj poste cashcatami ricuchin” nincunami.

•   ¿Jesús huañushcata yuyaringapajca imatataj rurana canchij?

   Judiocunapaj Pascua fiesta tutapimi Jesusca paita catijcunahuan shuj uchilla micunitata rurangapaj tandanacurca. Chai tandanacuipimi: “Ñucata yuyarishpa, caitaca ruracunguichijlla” nishpa mandarca (1 Corintios 11:24). Asha horascuna qꞌuipallami paita huañuchircacuna.

   Bibliapica Jesustaca Pascua fiestapi huañuchina ovejahuanmi chꞌimbapuran (1 Corintios 5:7). Pascua fiestapimi judiocunaca Jehová Dios ima shina Egiptomanta llujshichishcata yuyarijcuna carca. Chai shinallatajmi Jesús huañushcata yuyarina tandanacuipica ñucanchijta juchamanta, huañuimanta quishpichishcata yuyarinchij. Judiocunaca huatapi shuj cutinmi 14 de nisán punllapi Pascua fiestata rurajcuna carca. Shinallatajmi apostolcunapaj punllacunapipish discipulocunaca Jesús huañushcata yuyaringapajca huatapi shuj cutinlla rurajcuna carca.

   Cunan punllacunapipish muyundij Allpapi huaranga huaranga gentecunaca 14 de nisán punllapimi Jesús huañushcata yuyarincuna.