Profeciacunaca Dios huillachun cachashca shimicunami can. Bibliapica, profetacunaca ‘Diospaj jucha illaj espíritu huillachijpi huillashcacuna’ ninmi (2 Pedro 1:​20, 21). Shinashpaca shuj profetaca Yaya Dios huillashcacunata chasquishpami shujtajcunaman huillan (Hechos 3:​18).

¿Yaya Diosca ima shinataj profetacunahuan parlarca?

 Yaya Dios paipaj yuyaicunata profetacunaman ima shina huillashcata ricushun:

•   Quillcashpami huillarca. Moisesman cushca chunga mandamientocunataca Yaya Diosllatajmi quillcashpa churarca (Éxodo 31:18).

•   Angelcunata utilizashpami huillarca. Por ejemplo, Moisés faraonhuan parlangapaj richunca shuj ángel ricurishpami imata parlanata huillarca (Éxodo 3:​2-4, 10). Shinallataj importante shimicunata nina cajpipish Yaya Diosca angelcunallatatajmi chaicunata dictachun cacharca. Por ejemplo, shuj angelca Moisestaca cashnami nirca: “Cai shimicunata quillcai: Cai shimicunahuanmi canhuanpish israelcunahuanpish ari ninacurcanchij” (Éxodo 34:27). a

•   Muscuipi shina ricuchishpami huillarca. Profetacunaca huaquinpica rijcharishca cashpallatajmi profeciacunata muscuipi shina ricurcacuna (Isaías 1:1; Habacuc 1:1). Huaquincunacarin chai muscuicunapi cashca shinami parlajcuna carca o imatapish rurajcuna carca (Lucas 9:​28-​36; Apocalipsis 1:​10-​17). Cutin shujtajcunaca paicunallataj mana imata rurai tucushpa, mana imata yuyai tucushpami muscuicunata shina ricurcacuna (Hechos 10:10, 11; 22:17-​21). Shinallataj Yaya Diosca huaquinpica profetacuna dormicujpimi muscuchishpa paipaj huillaicunata curca (Daniel 7:1; Hechos 16:​9, 10).

•   Paita sirvijcunamanmi yuyaita curca. Diosca paipaj profetacunaman yuyaita cushpami pai huillashcacunata quillcachun ayudarca. Chaimantami Bibliapica: “Dios Quillcachishcacunaca tucuimi Diosllataj yuyaita cushpa quillcachishca” nin (2 Timoteo 3:​16, Biblia en Quichua Chimborazo, 1989). Yaya Diosca paita sirvijcunaman paipaj yuyaita cungapajca paipaj espíritu santota o fuerzatami utilizarca. Yaya Dios yuyaicunata cujpipish profetacunami chai yuyaicunata ima palabracunahuan quillcanata agllarcacuna (2 Samuel 23:​1, 2).

¿Tucui profeciacunachu qꞌuipa punllacunapi ima tucuna cashcata ricuchin?

 Profeciacunaca mana siemprechu shamuj punllacunapi ima pasana cashcata huillan. Shinapish Dios huillashcacunamantaca la mayoriami shamuj punllacunapi imalla tucuna cashcata ricuchin. Por ejemplo, Diospaj profetacunaca israelitacunamanca paicuna mana allita rurashcamanta ima tucuna cashcatami cutin cutin advirtircacuna. Profetacuna chashna advirtishpami Diosta cazuj israelitacuna ima bendicioncunata chasquina cashcata huillarcacuna. Shinallataj Diosta mana cazuj israelitacuna ima llaquicunallata charina cashcatapishmi huillarcacuna (Jeremías 25:​4-6). Shinaca israelitacunallatajmi allita ruranata o mana allita ruranata decidina carca (Deuteronomio 30:19, 20).

Huaquin profeciacunaca shamuj punllacunapi ima tucuna cashcataca mana huillanchu

•   Shuj cutinca israelitacunaca Yaya Diosta ayudahuai nishpami mañarcacuna. Israelitacuna Yaya Diosta mana cazushcamantami Diosca paicunata mana ayudashachu nishpa huillachun shuj profetata cacharca (Jueces 6:​6-​10).

•   Shuj cutinca Jesús Samariamanta huarmihuan parlacushpaca, chai huarmipaj ñaupa causaipi imalla pasashcatami huillarca. Jesusca Dios ayudashcallamantami chaita yacharca. Jesús shamuj punllacunapi ima tucuna cashcata mana huillajpipish chai huarmica Jesús shuj profeta cashcatami intindirca (Juan 4:​17-​19).

•   Jesusta juzgana punllapica paipaj contracunaca: “Ñahuita huatashpa huajtashpaca: ‘¿Pitaj cantaca huajtanchij?’ Huillaiyari” nircacunami. Paicunaca Jesús shamuj punllacunapi ima tucuna cashcata huillachunca mana mañarcacunachu. Ashtahuanpish Dios cushca poderhuan pi paita huajtashcata huillachunmi mañarcacuna (Lucas 22:63, 64).