2 Corintios 7:1-16
7 Chaimanta cꞌuyashca huauquicuna, cai sumaj allicunata Dios cusha nishcamanta ñucanchij cuerpotapish, espiritutapish mapayachijcunataca tucuita anchuchishunchij. Chashnami Diosta manchashpa ashtahuan jucha illajcuna tucushun.
2 Ñucanchijta cancunapaj shungupi chasquipaichij. Ñucanchijca pita mana llaquichishcanchijchu, pita mana pandachishcanchijchu, ñucanchij allipajllaca pitapish mana umashcanchijchu.
3 Cancunata juchachingapajllaca mana chashna ninichu. Huañushpapish, causashpapish ima shinami ña nircani cancunataca ñucanchij shungupimi charinchij.
4 Cancunamanca mana pacashpami tucuita parlani. Cancunamantami yallitaj cushicuni. Ñuca shungupica tranquilomi sintirini. Tucui llaquicunahuan cashpapish yallitaj cushillami cani.
5 Macedonia llajtaman chayashpaca mana tranquilo sintirircanchijchu. Ashtahuanpish tucui laya llaquicunatami charishpa catircanchij. Gentecunaca ñucanchij contrami carcacuna. Huauqui panicunamantapish yallitajmi sustarishca carcanchij.
6 Shina cajpipish llaquilla cajcunata cushichij Diosmi Titota visitanaman cachashpa ñucanchijtaca cushichirca.
7 Tito shamushcallamantaca mana cushicurcanchijchu. Ashtahuanpish cancuna Titota animashpa cachashcamantami cushicurcanchij. Paimi cancuna ñucata yallitaj ricunata munashcata, yallitaj llaquilla cashcatapish, ñucamanta cancuna sustarishca cashcatapish parlarca. Chaita uyashpacarin ashtahuanmi cushicurcani.
8 Chaimanta ñuca cachashca cartahuan llaquilla sintichishca cashpapish mana llaquirinichu. Puntapica cancunata llaquillata sintichishcamantami ñucapish llaquilla sintirircani. Shinapish asha tiempollatami llaquilla carcanguichij.
9 Mana cancuna llaquilla cashcamantachu cushicuni, ashtahuanpish cancuna llaquirishpa arrepintirishcamantami cushicuni. Cancunaca Dios munashca shinami llaquirircanguichij. Chaimantami ñucanchij nishca shimicunaca cancunataca ima dañota mana rurarca.
10 Dios munashca shina llaquirinaca arrepintirishpa quishpirinamanmi apan. Chaimantaca pi mana llaquirinchu. Ashtahuanpish cai pacha gentecuna shina llaquirinaca huañuimanmi apan.
11 Cancunaca Dios munashca shinami llaquirircanguichij. Chaimantami cancunaca allita rurangapaj achcata esforzaringuichij. Cancunapaj shutita chuyayachircanguichij, mana allita rurashcamanta llaquirircanguichij, Diosta mancharcanguichij, arrepintirisha nircanguichij, tucui shunguhuan Diosta sirvircanguichij, mana alli ruraicunatapishmi saquircanguichij. Tucui caicunata rurashpaca allitami rurarcanguichij.
12 Cancunaman quillcashpaca juchata ruraj runamanta, juchata rurashpa llaquita apaj runamantapish mana quillcarcanichu. Ashtahuanpish Diospaj ñaupajpi, gentecunapaj ñaupajpi ñucanchij nishcata cazucushcata yachangapajmi chashna quillcarcani.
13 Chaimi ñucanchijtaca cushichishca.
Cushilla sintirishpapish, Tito cushilla cajta ricushpami ashtahuan cushicurcanchij. Tucui cancunami paitaca animarcanguichij.
14 Cancunamanta Titoman allicunata parlashpaca mana pingai saquirishcanichu. Ashtahuanpish cancunaman tucui ima nishcaca ciertomi carca. Shinallataj cancunamanta achcata cushicushpa Titoman parlashcapish ciertomi carca.
15 Titoca cancuna manchaihuan, chujchuihuan paita chasquishcata yuyarishpa, tucuicuna cazucujta yuyarishpami cancunataca ashtahuan cꞌuyashpa catin.
16 Tucui imatapish cancuna alli rurana cashcatami confiani. Chaimantami cushicuni.
