Santiago 2:1-26
2 Ñuca huauquicunalla, cancunaca jatunyachishca ñucanchij Amito Jesucristota crishca qꞌuipaca, ¿ima nishpataj maijancunataca jatunyachicunguichij cutin shujtajcunataca yangapi churacunguichij?
2 Shuj runachari paipaj maqui dedocunapi oro anillocunata churarishca, achijnicuj sumaj churanata churarishca cancunapaj tandanacuiman ringa. Shinallataj shuj pobre runachari mapa churanata churarishca ringa.
3 ¿Achijnicuj sumaj churanata churarishca runataca alli nishpa “Canca cai alli ladopi tiyari” nicunguichijchu? ¿Cutin pobre runataca “Canca chaillapi shayari” mana cashpaca “Ñuca chaqui saruna chai cꞌuchullapi tiyari” nicunguichijchu?
4 Chashna rurashpaca cancunaca, ¿manachu shuj runataca caishuj runatapish yalli alli cashcata shina ricucunguichij? ¿Shinallataj manachu juezcuna shina tucushpa millaita rurashpa juzgacunguichij?
5 Ñuca cꞌuyashca huauquicuna, caita uyapaichij. ¿Manachu Diosca cai pacha gentecunapaj ñaupajpi pobre cajcunataca crishcapi charijcuna cachun agllarca? Diosca paita cꞌuyajcunaman cusha nishca Gobiernota herenciata shina chasquichunmi paicunataca agllarca.
6 Shinapish cancunaca pobrecunataca yangapimi churashcanguichij. ¿Manachu charij runacunallataj cancunataca llaquichincuna, tribunalcunamanpish apancuna?
7 Diosca cancunamanca alli shutitami curca. ¿Manachu charij runacunaca chai shutitapish cꞌamincuna?
8 Dios quillcachishcapica: “Can quiquin cꞌuyarij shinallataj shujtajcunatapish cꞌuyangui” ninmi. Chaimanta Reypaj jatun leyta cazushpaca cancunaca allitami ruranguichij.
9 Shinapish shujcunata jatunyachinata, caishujcunata yangapi churanata mana saquishpaca juchatami ruracunguichij. Leypish cancuna culpayuj cashcatami ricuchin.
10 Chaimanta maijanpish tucui Leyta pajtachicushpapish shujlla mandashcapi pandarishpaca tucui Leyta mana pajtachishcamantami culpayuj can.
11 Diosca: “Ama huainayangui” nircami. Shinallataj: “Ama huañuchingui” nircami. Canca mana huainayashpapish huañuchishpaca leyta mana pajtachishcamantami culpayuj cangui.
12 Cancunaca huatashcamanta cacharichishca llajtami canguichij. Chai llajtaman cushca leypi nishca shinami juzgashca canguichij. Chaimanta chai leypi nishca shina causashpa, parlashpa catichij.
13 Mana llaquij runataca Diospish mana llaquishpami juzganga. Ashtahuanpish llaquij runaca paita juzgajpica mishangami.
14 Ñuca huauquicunalla, ¿maijanpish feta charinimi nishpapish alli ruraicunahuan mana ricuchijpica imapajtaj valingayari? Chai feca paitaca mana quishpichi tucunchu ¿nachu?
15 Maijan huauqui mana cashpaca maijan pani churanata minishtijpi,* chai punllapaj mana suficiente micunata charijpi
16 cancunamanta maijanpish “Allilla ripangui, churanatapish churaringui, alli micungui” ningachari. Shina nishpapish paicuna causangapaj ima minishtishcata mana cushpaca, ¿ima allitaj cangari?
17 Chashnallatajmi alli ruraicunata mana rurajpica ñucanchij fepish huañushca can.
18 Shinapish maijan runaca: “Canca fetami charingui. Ñucaca alli ruraicunatami rurani. Alli ruraicunata mana rurashpa feta charishcataca ricuchi. Ñucaca feta charishcataca alli ruraicunata rurashpami ricuchisha” ningachari.
19 Canca shujlla Dios tiyashcatami cringui ¿nachu? Chashna crishpaca allitami rurangui. Demoniocunapish* Dios tiyashcata crincunami. Paita manchashpa chujchuncunapishmi.
20 Yuyai illaj runa, alli ruraicunata mana rurajpica cambaj fepish imapaj mana valij cashcataca ¿manachu yachangui?
21 ¿Manachu ñucanchij yaya Abrahantaca pai imata rurashcamanta Diosca cashcata rurajmi can nirca? Paitaca paipaj churi Isaacta altar jahuapi churashca qꞌuipami Diosca cashcata rurajmi cangui nirca.
22 Ricui, Abrahanca feta charishcataca paipaj ruraicunahuanmi ricuchirca. Paipaj ruraicunahuanmi paipaj fe sinchi cashcata ricuchirca.
23 Dios quillcachishcapi nishca shinami pajtarirca. Chaipica: “Abrahanca Jehová* Diospimi feta churarca. Chaimantami Diosca paitaca cashcata rurajta shina ricurca” ninmi. Paica Jehová* Diospaj amigo nishcapishmi carca.
24 Cancuna ricushca shinaca shuj runaca mana feta charishcallamantachu cashcata ruraj nishca can. Ashtahuanpish paipaj alli ruraicunamantami cashcata ruraj nishca can.
25 Chashnallataj huainayaj huarmi Rahabca paipaj llajtata pacalla ricunaman rij runacunataca alli chasquishpami shujtaj ñanta richun ayudarca. ¿Manachu chaita rurashca qꞌuipa paica cashcata ruraj nishca carca?
26 Ima shinami samai* illajpica cuerpoca huañushca can. Chashnallatajmi alli ruraicunata mana rurajpica ñucanchij feca huañushca can.
Notacuna
^ Griego rimaipica: “lluchulla cajpi” ninmi.
^ O “Supaicunapish”.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “espíritu” ninmi.
