Diosmi ñucanchijta Ruraj, ñucanchij Yaya can. Paica ñucanchijta yalli, allimi yachan. Ñucanchijta cꞌuyashcamantami ayudanata munan. Paimanta caruyashpa ñucanchijlla causachunca mana rurarcachu (Jeremías 10:23). Ima shinami uchilla huahuacunaca yaya mama ayudachun minishtin, shinallatajmi ñucanchijpish Dios ayudachun minishtinchij (Isaías 48:​17, 18). Bibliapi tiyacuj mandashcacunaca Dios cushca sumaj regalomi can. 2 Timoteo 3:​16-ta rezapai.

Dios mandashcacunaca cunan punllacunapi cushilla causachun, shamuj punllacunapipish achca bendicioncunata charichunmi ayudan. Dios ñucanchijta rurashcamantami paipaj ayudataca cushicushpa chasquina canchij. Salmo 19:​7, 11; Apocalipsis 4:​11-ta rezapai.

Bibliapi huaquin mandashcacunaca ñucanchij chꞌican chꞌican ruraicunata Dios munashca shina alli agllachunmi ayudan (Deuteronomio 22:8). Bibliapi mandashcacunata ima shina pajtachinata yachangapajca allimi yuyana canchij (Proverbios 2:​10-​12). Causaica Dios cushca regalomi can nishpami Bibliaca yachachin. Chaimantami trabajopi, huasipi cashpa, maita rishpapish cuidarichun ayudan. Hechos 17:​28-ta rezapai.

Jesusca ishqui alli mandashcacunamantami parlarca. Punta mandashcapica gentecuna  imapaj causashcatami ricuchirca: Diosta rijsingapaj, paita cꞌuyangapaj, paita tucui shunguhuan servingapaj. Cai mandashcatami imata ruragricushpapish yuyarina canchij (Proverbios 3:6). Cai mandashcata pajtachishpaca, Diospaj amigocuna tucushpami huiñai huiñaita cushilla causashun. Mateo 22:​36-​38-ta rezapai.

Qꞌuipa mandashcapica shujtajcunahuan alli apanacuchunmi yachachin (1 Corintios 13:​4-7). Cai mandashcata pajtachishpaca, Dios ricushca shinami ñucanchijpish shujtajcunata ricushun. Mateo 7:​12; 22:​39, 40-ta rezapai.

Bibliapi mandashcacunaca familiapi tandanacushpa cushilla causachunmi ayudan (Efesios 4:32; Colosenses 3:​12, 14). Biblia yachachishcacunaca cusa huarmipish alli causachunmi ayudan. Cazarashcacunaca mana chꞌicanyanachu can nishpami Bibliaca yachachin. Génesis 2:​24-ta rezapai.

Bibliapi mandashcacunata cazunaca trabajota charingapaj, cushilla causangapajmi ayudan. Achca trabajocunapica mana llullaj, mana shuhuaj, alli trabajajcunatami mashcan (Proverbios 10:​4, 26; Hebreos 13:18). Diospaj Shimica ashalla charishcacunahuan cushilla causachun, charij tucunata mashcanapaj randica Diospaj amigo tucunata mashcachunmi ayudan. Mateo 6:​24, 25, 33; 1 Timoteo 6:​8-​10-ta rezapai.

Bibliapi mandashcacunaca ñucanchij alli causachunmi ayudan. Bibliapica ama machanguichij nishpami mandan. Chaita cazushpaca ungüicunata, llaquicunatapish mana charishunchu (Proverbios 14:30; 22:​24, 25; 23:20). Jehová Diosca ashallata ubyachunca mana jarcanchu (Salmo 104:15; 1 Corintios 6:​10). Bibliapi mandashcacunaca ñucanchij ruraicunata, yuyaicunatapish alli cuidachunmi ayudan (Salmo 119:​97-​100). Mana ñucanchij alli causasha nishcallamantachu Bibliapi mandashcacunata pajtachinchij, Diosta jatunyachingapajmi pajtachinchij. Mateo 5:​14-​16-ta rezapai.