Caipi yuyai: Karenca shuj fiestapimi can. Paipaj amiga Rebeca shamucujtami ricun.

Paica ishqui cervezacunatami charicun, “¿ashata ubyasha ninguichu?, ña mana huahuachu cangui ubyashpaca allimi sintiringui” nishpami Karenta nin.

Karenca huambraraj cashcamantami mana ubyasha nin. Shinallataj Rebecahuanpish mana pingaipi saquirisha ninchu. “Rebecaca alli solterami can, pai ubyajpica ñucapish ubyanallami cani, mana drogachu can nishpami” Karenca yuyan.

¿Can Karen cashpaca imatataj ruranguiman?

Karen laya imata agllana cashpaca manaraj imata rurashpami alli yuyana cangui. Chashnami cambaj causaipi ima ashtahuan valishca cashcata entendingui. Shinallataj shujtajcuna nishcallata mana rurashpami, imata ruragricushpapish canca allita rurangui (1 Corintios 9:26, 27).

Allita rurangapajca imataj ayudanga? Catij 4 tapuicunapi yuyai.

Can imata alli rurai tucushcata yachashpaca mana manchashpami imatapish alli rurangui.

BIBLIACA CAITAMI YACHACHIN. Apóstol Pabloca: “Ñucaca panda panda rimaj cashpapish, imata nicushcataca yachanimi” nircami (2 Corintios 11:6, Biblia en Quichua Chimborazo, 1989). Pabloca Bibliamantami alli yacharca. Chaimantami shujtajcuna paimanta mana allita rimashpa pandachisha nijpipish paica imata ruranata alli yacharca (2 Corintios 10:10; 11:5).

CAI TAPUICUNATA CUTICHI ¿Canca imataj alli rurai tucungui?

¿Shungumanta cuj, allita ruraj, cꞌuyaj, ari nishcata pajtachijchu cangui o ima shinataj cangui?

Shuj huasipi shujlla columna mana sinchi cajpica, huasica urmai tucunmi. Chashnallatajmi canpish imapi mana sinchi cashpaca llaquipi urmai tucungui.

BIBLIACA CAITAMI YACHACHIN. Apostól Pabloca imapipish pandarijlla cashcata yachashpami caita quillcarca: “Ñuca ucu yuyaipica, Dios mandashcallahuanmi cushicuni. Ashtahuanpish ñuca cuerpopi caj miembrocunapica, shujtaj mandashcatami ricuni. Paimi ñuca yuyaita mandajhuan macanacucun. Chaica ñuca cuerpopi caj miembrocunatami juchapaj mandashcata rurachun huatashpa apacun. Ñuca ucu yuyaipica, Dios mandashcallahuanmi cushicuni” (Romanos 7:22, 23).

CAI TAPUICUNATA CUTICHI ¿Imapitaj pandarinilla? ¿Mana pandaringapajca imatataj rurai tucuni?

¿Shuj taxita japishpaca gasolina tucuringacama chaillapitaj chaillapitaj vueltata cushpa purichun mañanguimanchu? Mana. Yangamantami achcata paganguiman.

¿Caica imatataj yachachin? Imata ruranata alli yachashpaca mana yangamanta puricuj shinachu cangui, imata rurashpapish mana pandarishpami allita rurangui.

BIBLIACA CAITAMI YACHACHIN. Apóstol Pabloca: ‘ñucaca mishanataj yuyaihuanmi callpani’ nircami (1 Corintios 9:26). Paica yangamanta causaj shinaca mana causarcachu. Ashtahuanpish paipaj causaipi imata ruranataca allimi yacharca (Filipenses 3:12-14).

TAPURI ¿Shamuj huatapica imatataj rurasha nini? Quimsa yuyaicunata quillcai.

Imapi crishcata mana alli yachashpaca imatapish mana alli agllai tucunguichu. Huaquin animalcunaca paipaj ladopi caj cosacunapaj color shina tucunllami. Shinallatajmi cambaj amigocuna laya cangapaj imatapish ruranguiman. Chaita rurashpaca cambaj ima ashtahuan valishcatami cungaringui.

Imapi crishcata alli yachashpaca shujtajcuna mana allita rurajpipish canpish mana chashnallataj ruranguichu.

BIBLIACA CAITAMI YACHACHIN. Danielca paipaj yaya mamamantapish Diospaj llajtamantapish caruyachijpica huambrallami cashca canga. Shina cashpapish paipaj shungupica “Diospaj mandashcacunata cazunataca manataj saquishachu” nircami (Daniel 1:8). Danielca paipaj crishcacunata mana cungarishpami allita rurashpa causarca.

CAI TAPUICUNATA CUTICHI ¿Imapitaj cringui?¿Diospi cringuichu? ¿Imamantataj Diospi cringui? ¿Dios tiyashcata cringapajca imataj ayudashca?

¿Diospaj mandashcacunaca canta ayudanchu? ¿Imamantataj chaita cringui?

Sapiyashca yurataca acapana shamushpapish mana urmachinchu. Pꞌangacunataca huairaca caiman chaiman apanllami. ¿Maijan layataj casha ningui? Sapiyashca yura shina cangapajca ¿ñucapajca imataj ashtahuan valishca can?, nishpami alli tapurina cangui. Chashnami ¿Allichu rijsirini?, nishca tapuita cutichingui.