ISRAEL llajtapica novioca noviahuan cazarangapajca ima preciotami pagana carca. Por ejemplo, novioca noviapaj familiamanca huaquin cosascunata, animalcunata o cullquitami cuna carca. Maipicarin trabajanapishmi carca. Jacobca Raquelhuan cazarangapajca siete huatacunatami paipaj suegropaj trabajarca (Génesis 29:17, 18, 20). ¿Imamantataj novioca noviahuan cazarangapajca ima preciota pagana carca?

Bibliamanta investigaj Carol Meyers shuti huarmica: “Ñaupa punllacunapica huaquin familiacunaca agriculturapimi trabajajcuna carca. Chaimi familiapaj ushushipish yaya mamata ayudashpa trabajaj carca. Pero cazarangapajca familiata chashna ayudanatami saquina carca. Chaimantami novioca familiamanca ima preciota pagana carca” ninmi. Shinallataj novio chashna preciota pagajpica ishquindij familiamanta alli apanacushpa, ayudanacushpami causana carcacuna. Ashtahuancarin novio ima preciota pagashpaca novia paihuan cazarangapaj ari ninacushcata, paihuan causanatapish ricuchingapajmi chaita ruraj carca.

Shuj novio noviapaj familiaman ima preciota pagashpaca noviata randishcataca mana nisha nircachu. Shuj libropica: “Shuj novioca noviapaj familiaman ima preciota pagashpaca noviata randicuj shinami cashcanga. Pero chaica mana chashnachu carca. Ashtahuanpish novioca noviapaj familiata valorashcamanta, noviata valorashcamantami shungumanta ima preciota pagarca” ninmi.

Cunan punllacunapish huaquin llajtacunapica cazarangapaj noviocuna noviapaj familiaman, ima preciota pagana o ima cosascunata cuna costumbremi tiyan. * Pero Diosta sirvij yaya mamacunaca imatapish mana yallitaj mañanachu can. Chashnami paicunaca alli shungu cashcata, cullquillapi mana yuyaj cashcata ricuchincuna (Filipenses 4:5; 1 Corintios 10:32, 33; 2 Timoteo 3:2). Cutin achcata mañajpica novioca tucui mañashcata charingacamachari noviahuanca mana cazarai tucunga. Ashtahuancarin novio precursor cashpaca, precursor canata saquishpachari paica tiempo completopi trabajanata decidinga.

Huaquin llajtacunapica noviapaj familiacuna noviota ama yallitaj pagachichunmi huaquin leycuna tiyan. Diosta sirvij yaya mamacunaca cai leycunatami cazuncuna. Cai leycunaca Diospaj munaita pajtachichunca mana jarcanchu. Chaimantami Jehová Diosca cai leycunata cazuchun munan (Romanos 13:1; Hechos 5:29).