SHUJ valishca regalota chasquishpaca pagui ninami canchij. Jesusca 10 runacunata jambishpami ima shina pagui ninata yachachirca. “Paicunapuramanta shujca alliyachishca cashcata ricushpami, Taita Diosta sumajmari cangui nishpa caparishpa Jesuspajman tigramurca”. Chai qꞌuipaca Jesusca cashnami nirca: “¿Maipitagari iscuncunaca? Chungatamari alliyachircani” nircami (Lucas 17:12-17). Cai versocunapi ricushca shinaca shuj regalota cujpica pagui ninata utca cungarinchijllami.

Ña yachacushca shinaca Diosca tucuimanta yalli valishca regalotami cushca. Shinaca ¿chai regalota ñucanchijman cushcamantaca ima shinataj Diosta pagui nishun?

• Regalota cujta rijsishun. Huiñai causaitaca mana yangamanta chasquishunchu. Jesusca paipaj Yayata mañacushpaca cashnami nirca: “Huiñai causaita charinaca cashnami: Diostajca canlla cashcata rijsinami, Jesucristopish can cachashca cashcata crinami” nircami (Juan 17:3, QC, 1989). Caita yuyashun: Quiquin huahuaraj  cajpi, ama huañuchun shuj runa ayudashca cajpica ¿manachu chai runata ashtahuan rijsinata munanguiman? ¿Manachu imamantataj ayudarcangui nishpa tapunguiman? Jehová Diosca Jesustami cai Allpaman cachashpa huañuimanta quishpichirca. Chaimantami paita rijsichun, paipaj amigocuna cachun munan. Bibliapica: ‘Diospajman cꞌuchuyaichij, paipish cancunapajman cꞌuchuyangami’ ninmi (Santiago 4:8).

• Jesús huañushcatami crina canchij. Juan 3:36-pica cashnami nin: “Maijanpish Churita crijca, huiñai causaitami charin” ninmi. ¿Caita nishpaca imatataj nisha nin? Jesús huañushcapi crishcataca, ñucanchij ruraicunahuanmi ricuchina canchij (Santiago 2:17). ¿Maijantaj chai ruraicunaca? Dios imata munashcatami yachana canchij, qꞌuipaca ñucanchij causaipimi pajtachina canchij. * Shinallataj ñucanchijta perdonachun, shungupipish alli yuyaicunata charingapajmi Diosta mañana canchij. Chashnami shamuj punllacunapica alli, sumaj causaita huiñaipaj chasquishun (Hebreos 11:1).

• Jesús huañushcata yuyarina tandanacuimanmi rina canchij. Jesús huañushcata ama cungaringapajmi Jesusllataj cashna nirca: “Chaimanta caitaca, ñucata yuyarishpa ruracunguichijlla” nirca (Lucas 22:19). Caina huataca 20 millón gentecunami muyundij Allpapica Jesús huañushcata yuyaringapaj tandanacurcacuna. Cai huataca testigo de Jehovacunaca martes 11 de abriltami, inti huashicushca qꞌuipa Jesús huañushcata yuyarishun. Cai tandanacuipica Jesús imamanta huañushcata, pai huañushcamanta cunanpish, shamuj punllacunapipish ima bendicioncunata chasquinatami yachashun. Quiquintapishmi, Jesusta cachashcamanta Diosta agradicingapaj invitanchij.