¿SHUJTAJCUNATA AMA PꞌIÑANGAPAJCA IMATATAJ RURANA CANCHIJ?
3 | Pꞌiñanata ñucanchij yuyaimanta anchuchishunchij
Bibliapica cashnami nin:
“Cancunapaj yuyaita mushujyachirashpa, shujtaj causaita causaichij. Chashna cashpami Diospaj munai ima cashcata, ima mana paipaj munai cashcata, ima shina cashcatataj alli agllai tucunguichij” (ROMANOS 12:2).
¿Imatataj nisha nin?
Jehová Diosca ñucanchij yuyashcacunata ricuracunmi (Jeremías 17:10). Mana ñucanchij nishcacunallata o ñucanchij rurashcacunallatachu ricuna canchij. Shujtajcunata pꞌiñanaca ñucanchij yuyaipi, shungupimi callarin. Chaimantami ñucanchij ima mana alli yuyashcata, ima mana alli sintishcataca tucuita anchuchina canchij. Chashnami ñucanchij yuyaita, ñucanchij shunguta mushujyachishpa shujtajcunata pꞌiñanata saquishun.
Caita rurai:
Shujtaj llajtamanta o shujtaj razamanta cajcunamanta canllataj imata yuyashcata, imata sintishcata yuyari. Cashna nishpa tapuri: “¿Shujtajcunataca ñahuita ricushpallachu juzgani? ¿O paicunata alli rijsingapajchu esforzarini?”. Shujtajcunata pꞌiñanamanta o llaquichinamanta parlaj peliculacunata, redes socialescunata o internetpi tiyashcacunataca ama ricuichu.
Diospaj Shimica ñucanchij shungupi shujtajcunata pꞌiñana yuyaicuna ama tiyachunmi ayudan
Ñucanchij shungupi imata yuyashcata, imata sintishcata ñucanchijllataj reconocirinaca mana jahuallachu can. Pero Diospaj Shimimi ñucanchij “shungu imalla yuyashcata, munashcatapish” ricuchichun ayudan (Hebreos 4:12). Chaimanta Biblia yachachishcacunahuan, can yuyashcacunahuan chꞌimbapurashpa ricui. Qꞌuipaca Biblia yachachishcacunata pajtachishpa Dios yuyashca shina yuyangapaj esforzari. Diospaj Shimica ñucanchij shungupi shujtajcunata pꞌiñana yuyaicuna ama tiyachunmi ayudan (2 Corintios 10:4, 5).
