Shujtajcunataca pi ña mana pꞌiñangachu
Ñucanchij shungumanta pꞌiñana yuyaita anchuchishpapish shujtajcuna pꞌiñachunca mana jarcai tucunchijchu. Pꞌiñaj gentecuna tiyashcamantami achcacunaca sufrishpa causancuna. Shinapish ¿cai llaquitaca pitaj anchuchi tucun?
Jehová Diosllami pꞌiñana yuyaicunataca para siempre anchuchi tucun. Chaitami Bibliaca yachachin (Proverbios 20:22).
DIOSMI SHUJTAJCUNATA PꞌIÑANA YUYAICUNATA TUCUCHINGA
-
1. DIOSCA SATANASTAMI TUCUCHINGA. Satanás Diospaj contra tucushcamantami cunanca achca pꞌiñajcuna tiyan. Yaya Diosca Satanastapish, pai shina shujtajcunata pꞌiñajcunatapishmi tucuchinga (Salmo 37:38; Romanos 16:20).
-
2. DIOSCA SATANASTA CAZUJ MANA ALLI GENTECUNATAMI TUCUCHINGA. Yaya Diosca pꞌiñanata yachachij mana alli politicocunata, religionta pushajcunatapishmi tucuchinga. Shinallataj shujtajcunata shuhuashpa jatun negociocunata rurashpa causaj gentecunatapishmi tucuchinga (2 Pedro 3:13).
-
3. DIOSCA JUCHAYUJ CANAMANTAMI QUISHPICHINGA. Bibliapi nishca shinaca tucuicuna juchayujcuna cashcamantami maipica mana alli yuyaicunata charinchij o mana allicunata ruranchij (Romanos 5:12). Chaimantami huaquinpica shujtajcunata pꞌiñai tucunchij. Pero Yayitu Diosmi ñucanchijta juchayuj canamanta quishpichinga. Chashnami shujtajcunata pꞌiñanatapish ña mana yuyashun (Isaías 54:13).
BIBLIAPICA QꞌUIPA PUNLLAPI MANA PꞌIÑAJ GENTECUNA CAUSANATAMI YACHACHIN
-
1. LLAQUICHIJCUNACA TUCURINGAMI. Diospaj Gobiernomi cashcata rurashpa tucui cai Allpata mandanga. Cai Gobiernoca mana nunca tucuringachu (Daniel 2:44). Ñahuita ricushpalla juzgajcuna o shujtajcunata yangachijcunaca ña mana tiyangachu. Cunan punllacunapi sufricuj gentecunataca Yaya Diosmi ayudanga (Lucas 18:7).
-
2. TUCUICUNAMI SUMAJTA APANACUSHPA CAUSASHUN. Guerracuna, pꞌiñanacuicuna ña mana tiyashcamantaca mana pi sufringachu (Salmo 46:9). Cai Allpapica tucuicunahuan sumajta apanacujcunallami tiyanga. Chashnami tranquilo causaita charishun (Salmo 72:7).
-
3. TUCUICUNAMI ALAJA CAUSAITA CHARISHUN. Gentecunaca caishujmanta chaishujmanta cꞌuyanacushpami causashun (Mateo 22:39). Ña mana sufrishunchu. Ñucanchij causaipi imalla llaquicunata charishcatapish ña mana yuyarishunchu (Isaías 65:17). Cai Allpapi pꞌiñaj gentecuna ña mana tiyajpica tucuicunami ‘yallitaj sumaj causaipi cushicushun’ (Salmo 37:11).
¿Chashna causanata munanguimanchu? Cunanllatajmi muyundij Allpamanta testigo de Jehovacunaca shujtajcunata mana pꞌiñashpa causacuncuna. ¿Imamantataj chashna causacuncuna? Paicunaca Diospaj Shimipi tiyaj consejocunatami pajtachincuna (Salmo 37:8). Paicunaca chꞌican chꞌican llajtacunamanta cashpapish, chꞌican chꞌican costumbrecunata charishpapish shuj familia shinami cꞌuyanacushpa causacuncuna (Isaías 2:2-4).
Pi llaquichishcamanta o yanganchishcamanta ama yallitaj pꞌiñaringapajca testigo de Jehovacunami imata ruranata yachachi tucun. Paicunahuan yachacushpaca shujtajcunata pꞌiñanata saquishpa tucuicunata cꞌuyanatami yachangui. Shujtaj gentecunata o hasta quiquinta pꞌiñajcunatapishmi alli tratanata yachangui. Chashnami cunan punllacunallapitaj tucuicunahuan alli apanacushcamanta cushilla causangui. Pero tucuimanta yallica Diospaj Gobierno mandashca Allpapi causangapaj imata rurana cashcatami yachangui. Chaipica shujtajcunata pꞌiñajcunaca ña mana tiyangachu (Salmo 37:29).
Caitapish yachai
HUILLAJ
¿Diospaj Gobiernoca imatataj ruranga?
Jesusca Diospaj Gobiernolla cai Allpapi tiyaj tucui llaquicunata tucuchina cashcatami yacharca. ¿Yaya Diosca paipaj gobiernopi confiachunca imatataj rurashca?
RIJCHARI
Yangamanta juzgana: Mana allita juzganaca tucuringami
¿Yangamanta juzganata tucuchingapajca Diospaj Gobiernoca ima chuscu cosascunatataj ruranga?
