Seth * runaca: “Ñuca huarmipish ñucapish trabajo illajmi saquirircanchij. Ishqui huatacunatami ñucanchij familiaca asha cullquihuan ayudarcacuna. Huaquinpi ima trabajo ricurijllapimi trabajaj carcanchij. Chashna causacushcamantami ñuca huarmi Priscilaca yallitaj sustarishpa ungurca. Ñucapish imapaj mana valij cashca shinami sintirircani” ninmi.

“Chai llaquicunahuan cashpaca, Priscilaca Mateo 6:34-pi nishca shimicunatami siempre yuyarishpa causarca. Chaipica ‘caya punllaca imashi tucushun nishpa, ama chai yuyailla causaichijchu. Caya punIlapajca, cayallatajmi yuyari tucunguichij’ ninmi. Ñuca huarmica tucui shunguhuan Diosta mañashpami ñaupajman cati tucurca. Cutin ñucataca Salmo 55:22-pi nishca shimicunami cushichishpa ayudarca. Cai versota quillcaj runa shinami ñuca llaquicunata Jehová Diosman mingarcani. Dios ñucata ayudajtami sintircani. Cunan punllacunapica trabajota charishpapish Mateo 6:20-22-pi Jesús mandashcatami pajtachishpa causanchij. Shinallataj ishquindijmanta ashtahuan cꞌuyanacushpa, Diospaj alli amigocunami tucushcanchij” ninmi.

Cutin Jonathan runaca: “Ñucanchijca shuj uchilla negociotami charircanchij. Pero ñucanchij llajtapi achca problemacuna tiyajpimi negociocunaca ña mana valirca. Ñucanchij negociopish ña mana valijpimi achcata preocuparircanchij. Chai negociopi 20 huatacunata trabajashcaca yangamanta cashca shinami ricurirca. Ñuca huarmipish ñucapish cullquimantami pꞌiñanacui callarircanchij. Ñucanchij tarjeta de creditopica, cancunaca mana imata charinguichijchu ninata manchashpami imata mana randi tucurcanchij” ninmi.

“Imata ruranata yachangapajca Bibliatami leyircanchij. Yaya Dios paipaj espíritu santohuan ayudachunpishmi mañarcanchij. Shuj humilde trabajo ricurijpipish chaipi trabajanalla cashcatami entendircani. Minishtirishcacunallahuan causanatami yacharcanchij. Testigo de Jehovacuna cashcamantaca ñucanchij huauquicuna panicunaca cushichishpami ayudarcacuna. Jatun llaquicunata chꞌimbapuracujpipish achcatami ayudarcacuna” ninmi.

Raquel huarmica: “Ñuca cusa ñapish shitashpa rijpica achcata pꞌiñarishpami huacarcani. Ñuca shungu nanarishpami yallitaj llaquirircani. Pero cada punlla Diosta mañanataca mana saquircanichu. Diospajman cꞌuchuyajpica paica ñuca shunguta, ñuca yuyaicunatapish huaquichishpami ayudarca. Diosca ñuca nanaicunata jambij shinami ayudarca” ninmi.

“Diospaj Shimimi ñuca shungupi llaquichina yuyaita, yallitaj pꞌiñarina yuyaitapish saquichun ayudarca. Apóstol Pabloca Romanos 12:21-pica: ‘Ima millaita rurana yuyai mishachunca ama saquingui, ashtahuanpish allita rurashpa millaitaca mishangui’ nishca shimicunatami ñuca causaipi pajtachisha nircani” ninmi.

“Shuj amigopish achcatami ayudarca. Eclesiastés 3:6-ta leyishca qꞌuipaca cꞌuyaihuanmi: ‘Cambaj cusa shitashpa rishcamantaca ama yalli huacashpa causaichu’ nircami. Chaita uyana ñucapaj sinchi cajpipish ayudarcami. Chaimantami ñuca llaquicunapi yuyashpalla causanapaj randica cushichij cosascunata rurai callarircani” ninmi.

Elizabeth huarmica: “Ñuca cusa shitashpa rijpica ayudachunmi minishtircani. Shuj alli amigami ñucataca cada punlla ayudarca. Paica ñucahuan igual huacashpami cushichirca. Ñucata cꞌuyashcatapishmi ricuchirca. Ñuca nanaicunata jambichunca Dios ñuca amigata cachashcatami sintircani” ninmi.

Ñaupaman parlashca Luis runaca shungu ungüitami charin. Paica ishqui cutinmi huañunamanta quishpirirca. Causangapajca cada punllami 16 horascunata oxigenota churarina can. Luisca: “Ñucaca siempremi Diosta mañani. Mañashca qꞌuipaca, Dios paipaj espirituhuan ñucata  sinchiyachijtami sintini. Diosta mañanami causashpa catichun ayudan. Chaimantami Dios ñucata cuidacushcataca tucui shunguhuan crini” ninmi.

Petra huarmica 80 yalli huatacunatami charin. Paica: “Ñucaca tucuitami rurasha nini. Pero ña mana valinichu. Yuyajyashpa ña mana tucuita rurai tucushcata yachanaca sinchimi cashca. Ungüimantaca jambicunata ubyashpallami causani. Shaicushcami sintirini. Jesusca paipaj Yayataca: ‘Llaquita mana apana cajpica, ñucamanta cai llaquita anchuchipai’ nircami. Cai shimicunapimi achca cutin yuyani. Jesús chashna mañajpica Diosca llaquicunata chꞌimbapurachunmi fuerzata cushpa ayudarca. Diosca ñucamanpish fuerzata cushpami ayudan. Tucui punllacunami Diosta mañani. Chashnami cushilla sintirini” ninmi (Mateo 26:39, QIC, 1986).

Julián runaca esclerosis ungüihuanmi * casi 30 huatacunata causan. Paica: “Ñucaca shuj empresapimi trabajaj carcani. Cunanca silla de ruedapi cashpapish shujtajcunata ayudashpami cushilla causani. Shujtajcunata ayudanami ñucanchij llaquicunapi ama yalli yuyachun ayudan. Ashtahuanpish Diosca, cancuna llaquicunapi cajpica ñucaca cuidashami ninmi. Cai shimicunaca ñucapimi pajtarishca. Shinallataj Apóstol Pablo shinami ñucapish ‘imatapish rurai tucuna fuerzata Dios ñucaman cujpimi, tucui imatapish rurai tucunilla’ ninmi.” (Filipenses 4:13, NM).

Antonioca: “Ñuca yayata shuj carro llapishpa huañuchijpica mana cri tucurcanichu. Paica ima culpata mana charishcamantaca mana huañunachu carca. Pero ñucaca mana imata rurai tucurcanichu. Manaraj huañushpaca ñuca yayaca pichca punllacunatami hospitalpi huañunalla carca. Ñuca mamapaj ñaupajpica mana huacasha nircanichu. Pero ñucalla cashpaca achcatami huacarcani. ¿Imamantataj ñuca yayaca huañuna carca? nishpami achca cutin huacarcani” ninmi.

“Ama yalli llaquilla causangapajmi Jehová Diosta cutin cutin mañarcani. Chashnami tranquilo sintirircani. Diospaj Shimipi ima nishcatami yuyarircani. Chaipica ‘ima punlla ima tucuna cashpaca, chashna tucunllami’ ninmi. Jehová Diosca mana llullanchu, ñuca yayata cutin causachijpica paihuanmi tupanacusha” ninmi (Eclesiastés 9:11; Juan 11:25; Tito 1:2).

Punta yachaipi parlashca Robert runapish chashnallatajmi yuyan. Paica: “Jehová Diosta mañajpica Filipenses 4:6, 7- pi nishca shinami tranquilo sintirircanchij. Televisionpi noticiata huillajcuna tapunaman shamujpica, ñucanchijca huañushcacuna causarinamanta tranquilomi parlarcanchij. Ñucanchij churi avión urmajpi huañujpipish, paihuan imata rurashcatami cushilla yuyarinchij. Paihuan cushilla causashcatami ashtahuan yuyarishpa causanchij” ninmi.

Shinallataj: “Ñucanchij crishcacunamanta televisionpi tranquilo parlacushcatami shujtaj testigo de Jehovacunaca ricushcacuna carca. Paicunamanca: Cancuna ñucanchijmanta mañashcamantami tranquilo parlai pudircanchij nircanchijmi. Ñucanchij huauquicuna panicuna chashna cushichijpica, Jehová Dios ñucachijta cushichicushcatami sintircanchij” ninmi.

Ima shinami ricushcanchij, Diosca tucui laya llaquicunata charij gentecunatami cushichishpa ayudai tucun. Cantapish ayudasha ninmi. Ima llaquicunata charishpapish chai llaquicunata mishangapajmi ayudata chasqui tucungui. * Chaimanta Jehová Diospaj ayudata mashcai. Paica, “tucuipi cushichij Diosmi”can (2 Corintios 1:3).