70 discipulocuna Jesuspaj ñaupajpi mana alli ricurishcamanta o paita catinata saquishcamanta Jesús callarichishca micuipi mana cashcataca mana yuyanachu canchij. Ashtahuanpish chai micuipi Jesús paipaj 12 apostolcunallahuan casha nishcatami yuyarina canchij.

12 apostolcunapish, 70 discipulocunapishmi Jesuspaj ñaupajpica alli ricurircacuna. Jesusca paita catijcunapuramantami 12 cꞌaricunata paipaj apostolcuna cachun agllarca (Lucas 6:​12-16). Galileapi cashpaca Diospaj Gobiernomanta huillachun, ungushcacunatapish alliyachichunmi paipaj 12 apostolcunata cayarca (Lucas 9:​1-6). Chai huashaca Judeapi cashpaca Jesusca 70 discipulocunatami ishqui ishqui huillanaman richun cacharca (Lucas 9:51; 10:1). Shinashpaca Jesusca huaquin ladocunapimi discipulocunata charirca.

Jesusta catij judiocunaca cada huatami Pascua micuita rurajcuna carca. Chai micuitaca paicunapaj familiacunahuanmi rurajcuna cashcanga (Éxodo 12:​17-20). Jesusca pai huañuna horas ña chayamugrijpimi paipaj apostolcunahuan Jerusalenman rirca. Pero Pascua micuimanca Judea, Galilea y Pereapi caj tucui discipulocunataca mana cayarcachu. Jesusca paipaj 12 apostolcunallahuanmi canata munarca. Chaimi: “Ñucaca llaquita manaraj apashpami, cai Pascua micuita cancunahuan micunata achcata munarcani” nirca (Lucas 22:15).

Jesusca cai pachamanta juchata anchuchij Diospaj Malta Ovejami carca. Chaimantami huañuna carca (Juan 1:29). Judiocunaca Diosman sacrificiocunataca achca huatacunatami Jerusalenpi cujcuna carca. Chaimantami Jesusca Jerusalenpi huañuna carca. Israelitacunaca Jehová Dios paicunata Egiptomanta llujshishcata yuyaringapajmi Pascua micuita rurajcuna carca. Pero Jesús paipaj causaita cushcamantami gentecunaca juchamanta, huañuimanta quishpirigrirca. Chaimantami Jesuspaj sacrificioca ashtahuan valishca carca (1 Corintios 5:​7, 8). Shinallataj Jesús huañushcamantami 12 apostolcunaca congregacionta callarichijcuna tucurcacuna (Efesios 2:​20-22). Jahua pacha Jerusalenca 12 callari rumicunatami charin. Chai ‘12 rumicunapica 12 apostolcunapaj shuticunami’ quillcashca can (Apocalipsis 21:​10-14). Shinaca Jehová Diosta alli sirvij apostolcunaca Diospaj munai pajtarichunmi ayudana carca. Chaimantami Jesusca paicunallahuan Pascua micuita micurca. Ashtahuancarin chai qꞌuipaca paicunallahuan pai callarichishca micuitapishmi micurca.

Jesuspaj 70 discipulocunapish, caishuj discipulocunapish chai micuipica mana carcacunachu. Pero Jesús callarichishca micuimantaca Jehová Diosta alli sirvij tucui discipulocunapishmi beneficiari tucurcacuna. Chai tutapica Jesusca tucui ungidocunahuan shuj gobiernopi mandangapajmi ari ninacurca. Chaimantami tucui ungidocuna chai ari ninacuimanta beneficiari tucurcacuna (Lucas 22:​29, 30).