Jishu discipulusninta nera «ckamcúnap lusniyquísh canchachun ckarispa ñauckenpi, paycuna ckaanancúpaj alli ’ruanasniyquishta y Tatayquishta ima cielupi tían gloriát ckonancúpaj» (Mateo 5:16). Cháypaj internet allít utilisaycu. Sitiuycu oficial jw.org can, maypi túcuy informaciun creenciasniycumanta y ’ruasckaycumanta llojsin. ¿Imát tárej ’rinqui?

Contestásoj ’rin tapunasniyquita ima cutis cutis ’ruacunqui. Tarinqui respuestas huaquin tapunasmanta ancha importantes, ima gente ’ruacora. Shojta (6) cá tapunasmanta contestacun trataduspi ¿Huaquin punchau usuyta sackesúysh?, ¿Pichus munduta cachan? y ¿Huañusckas cutis causayta atincu? ima astaan 600 ckalluspi tradusiscka tían. Astaanpas Traducción del Nuevo Mundo astaan 130 ckalluspi tárej ’rinqui; ashca librus Bibliát estudiáypaj, astaanpas folletu Alli huillanas Yáyap partenmanta, y revistas astaan mósoj La Atalaya y ¡Despertad! Ashca cá revistasmanta, librus y tratadus internetpi leeyta o uyariyta aticun o descargayta atinqui, MP3, PDF o EPUB. Si munanqui huaquin paginasta ckalluyquipi imprímiy ckaachíypaj picunasta interesascka tiancu Biblia nisckanpi. Ashca vidius ckalluspi señasmanta tiancu, historias Bibliamanta ashca sentimientusuan leesckas, historias Bibliamanta teatru ina y súmaj melodías uyaríypaj suj momentu descansashcaptiyqui.

Jehóvap testigusninmanta yacháypaj. Sitiu internetmanta túcuy mósoj noticiasta apin y vidius ’ruasckaycumanta túcuy mundupi, sujcunata yanapáypaj presisasckancupi, y mana alli imastismanta ima nockaycumanta nincu y ’ruaaycu. Nátaj, niaycupas atun tantacunas ckayllanchacuptin, ninpas imaina comunicacuyta sucursalesniycuan.

Cá página internetmanta yanapaaycu verda chayanánpaj túcuy lugaresman Ashpamanta astaan carusmanpas chayna tucuycuna Bibliamanta aprendenancúpaj, Antartidapipas. Oraycu «Yáyap ’Rimaynin ligerút cuyucus seguinanta» túcuy ashpapi paypa gloriánpaj (2 Tesalonicenses 3:1).

• ¿Imaina yanapan sitiu jw.org astaan persunasta verdata Bibliamanta ’rejsinancúpaj?

• ¿Imát ’rejsiyta munanquiman sitiuycupi?