Suj huahuita huachachiscka captin tatas primerisúspaj suj cusicuyta cayta atin o saycuchicuyta atin. Tal ves sorprendecuyta atincu yachayta ima ashca tiempo y esfuerso apan suj huahuitát atendéypaj. Huaquin cutis mana allít descansayta, piñacuyta, llaquicuyta, deprimicuyta, chay matrimoniuyquita mana allít ’ruapuyta atin. Chayraycu, ishcayniyquísh huaquin ajustesta ’ruanayquísh tian huahuitata atendéypaj y ckamcunapura cuidacunayquíshpaj. ¿Imaina principius Bibliamanta yanapacuyta atin enfrentáypaj cá mósoj cambios causayniyquishpi?

BIBLIA NISCKANTA: «Múnay alli y ususcka can [...], mana interesninllata mascan, mana provocascka senticun» (1 Corintios 13:4, 5). Suj mama primerisa ina, túcuy atenciunniyquita huahuitayquita ckonqui. Pero chay ’ruayta atin ima ckosayqui huijchuscka senticunanta, chayraycu ama ckonckaychu ima paytapas atenciunniyquita ckonayqui tían. Pacienciaan y bondaruan ckaáchiy payta precisasckayquita y ancha valorasckayquita yanapanta huahuitát atendéypaj.

«Ckamcuna, ckosas, paycunaan causas seguiychis [...] conforme unanchayuan» (1 Pedro 3:7.) Si ckam tata primerisu canqui, unánchay ima cunan huarmiyqui ashca tiempunmanta huahuitanta ckoncka, y chayraycu ancha llaquiscka, saycuscka o deprimiscka senticuyta atin mósoj responsabilidaresraycu. Huaquin cutis ckamhuan piñacuyta atin, pero ama pacienciayquita chincaychu, ímaj «pi mana chayllapi piñacun astaan súmaj suj ckari atiyníyojmanta can» (Proverbios 16:32). Allít ckáay imát precisan y ckópuy (Proverbios 14:29).

IMÁT ʼRUAYTA ATINQUI:

• Si tatan canqui: Yanápay huarmiyquita huahuitayquishta cuidayta, astaanpas tutaspipas. Tiempót sórckoy ’ruanasniyquimanta astaan tiempo huarmiyquian y huahuitayquian tiáypaj

• Si maman canqui: Áicap ckosayqui huahuitaan yanapát ckosuyta munan, sáckey yanapasuchun. Si mana allít ’ruan, ama criticaychu, munayhuan yacháchiy imaina ’ruayta

BIBLIA NISCKANTA: «Sujlla aicha cayta chayanancu tían» (Génesis 2:24). Cunan ima familiayqui suj mósoj herederu apin, ama ckonckaychu ima ckam y conyugeyqui mana sackenquísh «sujlla aicha» cayta. Ashcata esforsacuychis matrimoniuyqui mana debilitacunánpaj.

Huarmi, ckosayquita agradecenayqui tían yanapanta y animuta ckosusckanraycu. Palabras agradecimientumanta suj aliviu cayta atincu (Proverbios 12:18). Ckosa, huarmiyquita nípuy ima ashcata munanqui y valoranqui, y aicát aprecianqui túcuy familiaraycu ’ruasckanta (Proverbios 31:10, 28).

«Sapa suj mascas seguinan tian, mana paypa ventajanllata manapé suj persunamantapas» (1 Corintios 10:24.) Conyugeyquípaj astaan sumaj casckanta ’rúay y esforsacusckanraycu agradécey. ’Rimáypaj y uyaricunayquíshpaj tiempota sorckoychis. Relaciones sexualesmanta tratacuptin ckamllapi mana pensanayqui tían, manapé conyugeyqui necesidarninmantapas. Biblia cachan: «Chaymanta ama privacuychis, ckamcunapura de acuerdo tianayquísh tían» (1 Corintios 7:3-5). Caymanta honestidarhuan ’rimaychis. Pacienciaan y unanchacus chayna matrimoniuyquish sinchiyácoj ’rin.

IMÁT ’RUAYTA ATINQUI:

• Ama ckonckaychu tiempota sorckoyta sapallan conyugeyquian tiáypaj

• Ckaachinacuychis ima munanacusckayquishta utuquitas imastisuan, suj cartita o suj regalitút ’ruanacus

BIBLIA NISCKANTA: «Utuquitamantapacha Yáyap ’Rimayninta ’rejseranqui, ima ckeshpíypaj yachayníyoj ’ruasuyta atin» (2 Timoteo 3:15). Ckáay imaina huahuitayquita yachachiyta. Unanchanayqui tían ima capacidarnin aprendéypaj, aun manáraj huachachiscka cas, ancha ashca can. Suj ejemplu, na mamanpa huicsanpi tias ’rejsisuyta atin, ckam ’rimaptiyqui, si llaquiscka o piñacus o cusiscka tianqui. Huachasckanmantapacha leepuyta atinqui aunque mana unanchan, chay atun captin yanapayta atin, leeyta gustapunánpaj.

Ama pensaychu ima huahuitayqui, utuckita casckanta Yayamanta ’rimapúypaj. Paypa ñauckenpi Jehovát orápuy (Deuteronomio 11:19). Cuscas pujllaptiyquísh, ’rimápuy túcuy imastismanta ima Yaya ’ruara (Salmos 78:3, 4). Huahuitayqui huiñas ’ris, ckáaj ’rin imaina ckam Jehovát ashcata munanqui y paypas Jehovát munayta apréndej ’rin.

IMÁT ’RUAYTA ATINQUI:

• Yacháypaj imaina huaayquita uyuayta, Jehovát oraciunpi máñay yachayta apíypaj

• Huahuitayqui ligerót aprendenánpaj súmaj palabrastas repetinánpaj nípuy