Estados Unidos llactai causaj ashca maltauna rimanuca Yaya Diosta mañanushcara, shinajpi ansa maltaunallara caran punzha mañanun. Maicanguna tapurinun: “¿Diosta oracionda rurana ali sintiringajllachu valin?”.

•  ¿Imara an Diosta oracionda rurana?

•  ¿Diosta mañajpi sirtu pacha uyahuanzhu?

•  ¿Ima ministishcaunara Diosta mañana ushani?

•  ¿Imara iyanun shuj maltauna?

 Oracionda rurana an tucuira Ruraj Jehovahua cuintarina. Iyari imara an Dioshua cuintarina: pai tucui causajcunamanda yali ashallara, “Sirtu pacha caran ñucanchimanda pai mana caruichu” (Hechos 17:27). Astaun, Biblia ñucanchima cai sumaj cumbirashcara riman: “Diospajma mayanllayamuichi, shina rajpi pai cangunama mayanllayamungami” (Santiago 4:8).

 ¿Imara rurana ushangui Diospajma mayanllayangaj?

•   Diosta mañana. Chi an Dioshua cuintarina.

•   Bibliara estudiana. Chita rurajpi Dios canhua cuintan.

 Diosta mañasha, Bibliara estudiasha Dioshua cuintariushca cuinta tucun, chita rasha catisha Dioshua mas ali amigo tucungui.

 Jeremy nin: “Ahua pachai tiaj Atun Dios Jehovahua cuintarina, runauna mas valishca charishcami an”.

 Miranda nin: “Ñuca sintirishcaunara Jehovara cuintasha paihua mas mayanllayashcara sintirini”.

 Diosta quirishas, mañashas maicambi tapuringuichari ¿Dios sirtuchu ñucara uyahuangairi? nisha. Biblia nin: “Jehová orancionda mañashcara uyaj an” (Salmo 65:2). Astaumbas nin, can tucui ministishcaunamanda paita cuintarina ushangui. ¿Imarasha? Pai canda cuirana munashcamanda (1 Pedro 5:7).

 Caita iyari: ¿Manzhu camba amigogunahua ashca cuti cuintaringui? Shinallara Dioshua cuintarina ushangui. Tucui huras paihua cuintari, paihua shutira Jehová nisha rimasha (Salmo 86:5-7; 88:9). Astaumbas, Biblia nin mana saquisha Diosta mañana ushangui (1 Tesalonicenses 5:17).

 Moises nin: “Diosta mañana ñuca shungu ucui sintishcaunamanda ñuca ahua pacha Yayahua cuintarina an”.

 Karen nin: “Ñuca mamahua, mas ali amigogunahua cuintarishca cuinta tucui ñuca ministishcaunamanda Jehovara cuintani”.

 Biblia nin: “Canguna mañashcauna Diospa ñaupajpi uyarinauchu tucui mañashcahua, rugashcahua, agrasishcahua” (Filipenses 4:6).

 Shinashaga ¿tucui camba llaquiunamanda Diosta cuintarina ushanguichu? ¡Ari, ushanguimi! Bibliallara nin: “Churai camba aparishcara Jehová ahuai, paillara canda cuirangami” (Salmo 55:22).

 Shinajpi, mana can charishca llaquiunamandallara cuintana angui. Chantelle shuti malta huarmi nin: “Tucui huras Yaya Diosta ñucara yanapachu mañasha, paihua ali amiga ashcara mana ricuchinima. Shinallara ñuca quirini, Diosta mañaushcai ñaupa punda paita pagarachuna anchi, iyarisha ashca cosasgunamanda pagarachungaj charinchi”.

 Caita iyari: ¿Imamanda pagarachushca sintiringui? Iyari cai punzha can quinsa charishcaunamanda Jehovara pagarachungaj.

 Anita nin: “Shu sumaj sisahuaras ricusha, Jehová Diosta pagarachungaj oracionda rurana munanchi”.

 Brian nin: “Can mas gustashca Bibliamanda versiculora iyari, shinallara maican Jehová sumaj rurashcaunaras. Huasha chimanda shu oracionda rurasha pagarachungui”.