Mana. Ñaupa quillcashcaunara ricusha riparashcanchi Biblia chi tunullara ashcara, huaranga huataunai quillcaunamanda shuj copiagunara rurashcallaira.

 Tuparinushca huaranga ñaupa Biblia quillcashcaunara. Maican quillcashcaunai ansa turcarishcaunara charinun, chita ricuchinmi copia ruraushcai ansa pandarishcauna charishcara. Maican cai turcarishcauna mana Biblia yachachishcaunara turcarinzhu. Shinajpi, maican quillcashcaunai ashca turcarishcaunara charinun. Cai turcarishcauna ashca huatauna huashai ruranushca Biblia yachachishcara turcachingaj. Ishqui ejemplogunara ricushun:

1.   Maican ñaupa Bibliagunai cai shimiunara tupanchi 1 Juan 5:7​pi: “Ahua pachai quinsa rimaj tian: Yaya Dios, Causana Shimi, Ispiritu. Cai quinsa shujllami”. Shinajpi, ñaupa revisashca quillcashcaunai cai shimiunara mana charinun punda quillcashca Bibliai mana ricurishcamanda. Huasha yapanushca.  a Chimanda, mushuj revisashca Bibliagunai cai shimiunara mana churanushca.

2.   Diospa quiquin shuti ñaupa punda quillcashca Bibliagunai ashca huaranga cuti ricurinuca, shinajpi ashca Bibliagunai Diospa shutira churana randi “Señor” o “Dios” churanushca.

 Cuna punzhaunai ashca Biblia quillcashcauna tian, chi quillcashcaunara ricusha riparana ushanchi imai pandariushcara.  b Chita ¿imasnara ruranushca? ¿Cuna charishca Bibliagunai quirina ushanchichu?

•   Escrituras Hebreas (Antiguo Testamento) nishcamanda rimasha Bibliamanda yachaj runa Wiliam Henry Green nica: “Ñaupa quillcashca librogunara ricusha riparanchi Bibliai tiaj yachachishcaunara sirtu pacha quirina ushanchi”.

•   Bibliamanda yachaj Frederick Bruce, Escrituras Griegas Cristianas o Nuevo Testamento nishcamanda casna nisha quillcaca: “Nuevo Testamentomanda ashca copiaguna tian sirtu ashcara ricungaj, mana shinachu tucun shuj ñaupa ricsishca librogunahua, shinajpi mana pis rimanun chi quillcashcauna pandarishcara”.

•   Sir Frederick Kenyon shuti, ñaupa Biblia quillcashcamanda yachaj nica shu runa “intiru Biblia paihua maquii apisha tucui shunguhua quirina ushan chi libro Diospa Shimi ashcara, ashca huatauna pasashas Bibliai tiaj yachachishcauna mana turcarinushcachu”.

•   Judioguna, Jesusta catijcunas Bibliamanda copiara ruraushcai Diosta sirvijcuna pandarishcaunara chillaira saquinuca (Números 20:12; 2 Samuel 11: 2-4; Gálatas 2:11-14).  c Shinallara Diospa llacta pai mandashcaunara mana pactachishcamanda, maicanguna mana ali yachachishcamanda cuintashcaunara saquinuca (Oseas 4:2; Malaquías 2:8, 9; Mateo 23:8, 9; 1 Juan 5:21). Bibliai tiashca tunu copiasha, cai copiara rurajcuna ricuchinuca mana llulla ashcara shinallara Diospa shimi ashca valichishcara.

•   ¿Manzhu ricunchi Bibliara quillcachij Dios, mana saquishcachu runauna paihua sirtu shimira turcanuchu? (Isaías 40:8; 1 Pedro 1:24, 25).  d Pai mana munacachu Biblia ñaupa timpu runaunajlla achu; astaun cuna timpui ñucanchijpas valirichu (1 Corintios 10:11). Astaumbas, Biblia nin: “Ñaupa huras Quillcashcauna ñucanchira yachachingaj quillcanushca aca, ñucanchi ahuantana shungumanda, Quillcashcauna cariyachishcamandas, ali chapanara charingaj” (Romanos 15:4).

•   Jesús, paita catijcunas Escrituras Hebreasmanda quillcashcaunara yachachij anuca, paiguna quirij anuca sirtu shimi ashcara (Lucas 4:16-21; Hechos 17:1-3).