Ari, Biblia mana ciencia libro ashallara cienciamanda rimasha parijulla yachachin. Catishcai yachangaraunchi maican Bibliamanda yachachishcaunara. Ricungui imasna Biblia ciencia tupashcaunahua parijulla an, shinallara Biblia quillcashca timpui ashca shu tunu iyaiguna tianuca.

•   Ahua pachas, cai Allpa shu callarishca charinunmi (Génesis 1:1). Chi randi, ñaupa timpui causaj runauna quirij anuca tucui tiashcauna cungaimanda ricurishcara, shinallara mana pis rurashcara. Babiloniamanda runauna quirij anuca mundura pagarichij yanga diosguna lamar yacuunamanda llucshinushcara. Shu cuintashcauna ninun cai mundu shu atun lulunmanda llucshishca an nisha.

•   Ahua pachai, cai Allpai tucui tiajcuna Dios churashca leygunara catishcamanda paiguna puistui tianun, paiguna tarbanara ruranun (Job 38:33; Jeremías 33:25). Shinajpi ashca partiunai runa cuintashcaunara catisha maicanguna quirinun cungaimanda llaqui tiajpi, milli diosguna ñucanchira turmindachinun nisha.

•   Allpa mana ima ahuais huarcuriaun (Job 26:7). Ñaupa timpui causaj runauna quirij anuca munduga shu disco cuinta pamba ashcara, shinallara cai Allpa shu atun runa ahuai tiashcara, manashaga yahuati, búfalo animal ahuai tiaj cuinta ashcara.

•   Tamiashcamanda yacuuna, lamar yacu pacchauna tianun, yacu rupajyajpi puyuuna tucusha ahuama sicasha tamian maican partiunai rasu urman, shina rasha Allpai yacu tiasha catin (Job 36:27, 28; Eclesiastés 1:7; Isaías 55:10; Amós 9:6). Ñaupa timpui griego runauna iyaj anuca yacuuna lamar ucumanda shamushcara. Cai iyaigunara quirisha catinuca 300 huatauna huashallai.

•   Urcuuna llucshinushca shinallara chingarinushca, maican tiaj urcuuna lamar ucui tianuca (Salmo 104:6, 8). Shinajpi huaquin runa cuintashcauna ninun diosguna cuna urcuuna ricurij cuinta ruranuca nisha.

•   Chuyaj causangaj mandashcauna mana unguringaj yanapanun. Diospa Ley israelita runaunara mandaca shu huañushcara llangajpi armarina ashcara, astaumbas pasachij ungüi apij runauna shu timpumanda caruyashca causana anuca shujcunamanda shinallara runa ismaunara ali pambanuchu mandaca (Levítico 11:28; 13:1-5; Deuteronomio 23:13). Shinajpi chi timpui causaj egipcio runauna ismaunara utilizaj anuca shu pomada rurasha chugrishcaunai cacusha alichingaj.

 Maican runauna rimanun Biblia cienciamanda rimasha pandarin nisha. Shinajpi Bibliara ali estudiasha ricuchin chita mana sirtu ashcara. Ricushun huaquin ciencia ejemplogunamanda Biblia ima nishcara.

 Runauna ninun: Bibliaga nin ahua pachai, Allpai tucui tiajcunara sucta punzhaunallai rurashca an nisha.

 Biblia sirtu yachachina: Biblia yachachin huaranga huaranga huatauna huashai Yaya Dios ahua pachai, Allpai tucui tiajcunara rurarca (Génesis 1:1). Astaumbas, Biblia mana pitijta rimanzhu masna timpu duran Génesis capítulo 1 rimashca rurana punzhauna. Chita rimana randimanda Génesis 2:4 ricuchin Dios tucui timpu “ahua pacha, cai Allparas” rurangaj shu “punzha” ashcara.

 Runauna ninun: Biblia nin quihuauna Indi manara tiajllaira rurashca aca, shinajpi Indi illajpi fotosíntesis nishcara mana tiashcamanda quihuauna, yurauna mana tiana ushashcanga nisha (Génesis 1:11, 16).

 Biblia sirtu yachachina: Biblia nin quihuaunara Dios manara rurajllaira “ahua pachara” rurarca shinallara tucui chibi tiaj estrellagunara, shu atun estrella Indi an (Génesis 1:1). Ñaupa punda punzhai rurangaj timpui Allpa indimanda ansa luz charica. Quinsa rurangaj punzhai atmósfera nishcara ña mas punzhayashca tucuca. Chimanda Allpai fotosíntesis rurangaj ministishca luz charica (Génesis 1:3-5, 12, 13). Huasha cai Allpamanda Indira ña ali ricuna usharica (Génesis 1:16).

 Runauna ninun: Bibliaga nin Indi cai Allpara muyuriun nisha.

 Biblia sirtu yachachina: Eclesiastés 1:5 nin: “Indi llucshin shinallara icun; huasha dsaslla tigran llucshimushca puistumandallara cutillara llucshingaj”. Cai texto rimashcaunahua Biblia ricuchin cai Allpamanda Indi imasna ricurishcara. Chimanda tucui runauna ninun “Indi llucshin” o “Indi icun” nisha, shina rimanun paiguna yachashallara Allpa Indira muyuriushcara.

 Runauna ninun: Biblia nin cai Allpa suni pamba an nisha.

 Biblia sirtu yachachina: Biblia “cai pacha puchucai pundagama” nisha mana intindichina munan cai Allpa suni pamba ashcara (Hechos 1:8). Astaun Biblia “cai Allpamanda chuscu ladoguna” rimasha intiru Allpamanda riman. Shinallara cuna punzhaunai “los cuatro puntos cardinales” nishcara rimasha chimandallara rimanchi (Isaías 11:12; Lucas 13:29).