Camba huarmi camba familias ali cushi causanuchun yanapajpis, huaquimbi cungaimanda llaqui pasajpi yapa llaquirinchi (Santiago 4:14). Turmindusguna pasaushcai Yaya Dios ñucanchima yanapaira cunmi. Bibliamanda iyaiguna yachashcara can camba familias pactachijpimi, llaqui turmindus pasaujpis ahuantana ushangui.

BIBLIA NINMI: “Canguna tucui turbarishcara paihua ahuai churaichi, pai cangunara cuiranmi” (1 Pedro 5:7). Tucui huras iyarina angui Yaya Dios mana culpa charinzhu camba problemagunamandas (Santiago 1:13). Yaya Diospajma llutarijpi, paillami mas ali yanapanga (Hebreos 13:6). “Astaun canguna mañashcauna Diospa ñaupajpi uyarinauchu tucui mañashcahua.” (Filipenses 4:​6.)

Tucui punzha Yaya Diospa Shimira leasha estudiasha gustu cushi sintiringuimi. Shina sintirishami, can ricungui cierto pacha Jehová Diosga “pai tucui turmindariushcai ñucanchira cushiyachin” nishcara (2 Corintios 1:​3, 4; Romanos 15:4). Yaya Diosga “Diospa tucui intindinara pasaj cushi canguna shunguras, canguna iyairas huacachingami” (Filipenses 4:​6, 7, 13).

CAMANA USHANGUICHARI:

• Mana yapajta nusparisha imaras alira rangajpas Jehová Diospa yanapaira mañai

• Llaqui turmindus pasaushaga caita o chita ruranaras alira iyaripangui chi huasha ima ali ruranaras ajllangui

BIBLIA NINMI: “Iyayuj shungu charij yachaira chasquiun, sabiru rinriuna charij yachairas tupangahua mascaun” (Proverbios 18:15). Familiaibi caran duiñu ¿imara ministinun? Chita tucuira yachangaj alira riparana angui. Shinallara paigunahua cuintaringui paiguna rimashcaras uyapangui (Proverbios 20:5).

¿Imara tucungairi shu llaquishca aillu huañujpiga? Llaqui sintiriushaga shujcuna ñaupai ama pingaringuichu. Llaquirishaga iyaripangui Jesupas “huacacami” (Juan 11:35; Romanos 12:15). Shinallara ashca samana puñunas yapa ministishcami (Marcos 6:31). Ursaihuaj ashami problemaguna shamujpis ñaupama catina ushangui.

CAMANA USHANGUICHARI:

• Camba familiahua ali apanunusha cuintanunuj ana angui manara shu llaqui turmindus shamujllaira. Casna cuintanuj ajpimi turmindus shamujpi canhua cuintanungalla

• Can imasna llaqui turmindus pasaj runaunahua cuintanunungui

BIBLIA NINMI: “Canguna [...] shu sintinallahua, uquipurasna llaquinaucuna, llaquij shunguyujcuna, mansu shunguyujcuna” (1 Pedro 3:8). Camba amigoguna ursa yanapanara munanunmi, shina ashas mana yachanunmi imara rurana anun canda yanapangaj. Chiraigu paigunara mañangui imara rurana ushanun canda yanapangahua (Proverbios 12:25). Astaumbas mascangui canda yanapachun imasna Bibliamanda iyaigunara pactachingaj. Biblia yanapaihua ñaupama catinguimi (Santiago 5:14).

Yaya Diospi cierto pacha fera charijcunahua, Dios tucuira alichingarauni nishcara quirijcunahuas pasashami can ministishca yanapaira chasquina ushangui. Astaumbas shujcuna yapa llaquilla sintirijcunara cushiyachishami cambas cushiyangui. Jehovapi quirishcara pai pactachingarauni nishcaras shujcunama cuintapai. Shujcunara yanapasha catingui shinallara canda llaquijcunamanda yanapangaj munajcunamandas ama caruyanguichu (Hebreos 10:25; 1 Corintios 15:58).

CAMANA USHANGUICHARI:

• Shu ali amigohua cuintaringui shinallara pai yanapachumbas saquingui

• Can ministishcaunamanda shu rai rimangui caita o chita yanapahuai nisha