LECCIÓN 03
¿Can Bibliai quirina ushanguichu?
Bibliai ashca pactachina shimiuna, camachishcaunas tupanchi. Maicambi can Biblia ima yachachishcara yachana munangui. Shinajpi cai sirtu, mana sirtu ashcara mana yachanguichari. ¿Ñaupa timpui quillcashca libroi tiaj pactachina shimiunara, camachishcaunara quirina ushanchichu? ¿Can sirtu pacha quirina ushangui Biblia ima nishcara cuna punzhaunai shamuj punzhaunais cushihua causanamanda? Ashca runauna caita quirinchimi. Canda animanchi canllara riparachu imarasha shina quirinchi.
1. ¿Biblia rimashca cuinta sirtu pacha pactaricachu?
Biblia “sirtu shimiunara” charin, mana llullasha quillcashca anuca (Eclesiastés 12:10). Sirtu pasaushcamanda, sirtu tiaj runaunamandas riman (leai Lucas 1:3, TNM; 3:1, 2). Ashca pasashcamanda cuintajcuna, arqueólogo runauna Bibliai tiaj fechaguna, runaunas, llactaunas, pasashcaunas sirtu ashcara rimanushca.
2. ¿Imarasha Bibliai quirinchi ñaupa timpui quillcashca libro ajpis?
Biblia ashca tunuunai ñaupachisha quillcashca libro ashca paihua punzhaunai. Shu ejemplo churasha, ciencia yachachishcaunahua parijulla riman. Astaumbas Bibliara quillcashcai ashca runauna mana quirinuca Biblia ima rimashcara chi temagunamanda. Shinajpi, cuna timpui ciencia ricuchin Biblia nishca sirtu ashcara. Paihua shimiuna “tucui huras quirinallami, cuna timpui, huiñai huiñaigamas” (Salmo 111:8).
3. ¿Imarasha shamuj punzhaunamanda Biblia nishcara quirinchi?
Biblia rimashca profeciaguna a “unaimanda chara mana rurashcaras” charin (Isaías 46:10). Ashca pasashca cosasguna manara pactarishcallaira Biblia mana pandasha ña rimaca. Astaumbas, cai timpui caran tunu pasaushcara ña quillcashca aca. Cai lecciombi maican Bibliamanda profeciagunara ricungaraunchi. ¡Sirtu pactarishcara ricusha manzharinchi!
MAS YACHAI
Ricushun imasna Biblia ciencia tupashcaunahua parijulla an, shinallara ricungaraunchi maican manzhanaita Biblia profeciagunara.
4. Biblia nishca cuinta ciencia riman
Ashca huatauna huashama runauna quirinuca Allpa ima ahuai ashcara. VIDEORA ricuichi.
Ricui Job libro 3.500 huatauna huasha quillcashcara. Leaichi Job 26:7, huasha catij tapuimanda rimaichi:
-
¿Imarasha ashca valij an yachangaj Biblia nishcara Allpa ‘mana imais huarcuriashcara’?
Biblia yacu ciclomanda riman: Indi lamar yacura puyuyachin, chi yacu tamia cuinta urman huasha lamar yacuma vultian. Ishqui patsaj huataunalla cai yacu ciclomanda ali intindishca aca. Shinajpi ricui Biblia huaranga huatauna ñaupajtara ña rimashca aca. Leaichi Job 36:27, 28, huasha catij tapuigunamanda rimaichi:
-
¿Imara mas gustangui cai alira intindichishcamanda?
-
¿Cai leashca textogunamanda canda yanapanzhu mas Bibliai confiangaj?
5. Biblia valishca tucunaunamanda ña rimashca aca
Leaichi Isaías 44:27-45:2, huasha catij tapuimanda rimaichi:
-
¿Imara Biblia rimaca Babilonia urmanamanda 200 huatauna manara pactarijllaira?
Shina ñaupa timpui sirtu pacha pasaca 539 huatai a.e.c. b shu rey Persia llactamanda Ciro shutiyuj paihua suldaruunahua Babilonia llactama icunuca. Chi llacta mayambi tiaj yacura largara rurasha chaquichinuca. Babilonia atun punguuna pascarisha saquirinuca, chiraigu icusha mana macanusha tucuchina ushanuca. Ña 2.500 huatauna huasha chi pasashca ajllaira, Babilonia shinallara catiun. Cuna ricui Biblia nishcara.
Leaichi Isaías 13:19, 20, huasha catij tapuimanda rimaichi:
-
¿Imasnara cai profecía pactarica?
Babilonia rumi muntun tucuca, cuna Irak llactaimi
6. Biblia ña rimashca aca cuna pasaushcara
Biblia ñucanchi timpura “puchucai timpuunai” ashcara nin (2 Timoteo 3:1). Ricui cai timpuunamanda ima ña rimashcara.
Leaichi Mateo 24:6, 7, huasha catij tapuimanda rimaichi:
-
Biblia ¿imara ña rimaca puchucai punzhaunai pasanamanda?
Leaichi 2 Timoteo 3:1-5, huasha catij tapuigunamanda rimaichi:
-
Biblia rimashca cuinta puchucai punzhaunai ¿imasna anunga ashca runauna?
-
Cai texto leashca cuinta ¿maicanda ricushcangui?
RUNAUNA CASNA NINUJPI: “Bibliai llulla quillcashcauna, runa iyaigunalla undachishca an nisha”.
-
¿Imara iyangui, imara mas quirichin Biblia sirtu ashcara?
IMARA YACHASHCANGUI
Ciencia, runa cuintashcauna, rimashca profeciagunas ricuchinun Bibliai quirina ushashcara.
Iyaringaj
-
¿Biblia rimashca cuinta pactaricachu?
-
¿Ima Biblia rimashcauna ciencia rimashca cuinta anun?
-
¿Can quiringuichu Biblia shamuj punzhaunai ima tucungaraushcara cuintashcara? ¿Imarasha shina iyangui?
RICUNGUI
Biblia cienciamanda rimasha ¿pandarinzhu?
“¿Biblia ciencia yachachishcahua pariju yachachinzhu?” (jw.org partii tiaj tema)
¿Imara ricuchin “puchucai timpuunai” causaushcara?
“Bibliamanda sucta rimashca profeciaguna cuna pactariushcara” (La Atalaya, 1 de mayo de 2011)
Ricui imasna Bibliamanda profeciaguna Grecia llactamanda pactarinuca.
Yachangui imasna Bibliamanda profeciaguna shu runara yanapanuca paihua iyaira Bibliamanda turcaringaj.
Cai temagunaras leana munanguichari
TAPUIGUNA
Jehovahuaj testigoguna Bibliamanda yachachinchi
Jehovahuaj testigogunahua gratis Bibliamanda yachashcai can munashca Bibliara utilizana ushangui. Astaumbas munasha camba ailluunara amigogunaras cumbirana ushangui canhua yachangaj.
