PUNTO 4
Jesús ¿pita an?
1. Jesusga ¿maimandara shamuca?
¿Imarasha tucui tunu runauna Jesushua cuintaringaj munanuca? (MATEO 11:29; MARCOS 10:13-16)
Manara Allpama shamushcallaira Jesusga ahua pachai causaca. Chibi shu espíritu aca (Juan 8:23). Jehová Diosga, Jesusta ñaupa punda rurashca. Jesusga tucui tiajcunara rurangaj paihua Yayara yanapaca (Proverbios 8:22, 23, 30). Jesusta rurangahua Jehová Diosta pis mana yanapacachu. Chiraigumanda Biblia nin: Jesusga “Diospa sapalla churi” an nisha (Juan 1:14). Shinallara Yaya Dios partimanda rimaj ashcamanda Bibliaga Jesusta nin “Shimi”. Leapai Colosenses 1:15, 16.
2. ¿Imarasha Jesús Allpama shamuca?
Yaya Dios paihua Churira Allpama cachamuca. Jesusta pagarichingahua, María shuti huarmira ajllaca. Mariaga pi carihuas mana llutarishca aca. Chiraigu Jesusga runa yayara mana charicachu (Lucas 1:30-35). Jesusga ¿imaraigumanda Allpama shamuca? 1) Yaya Diosmanda ali yachachingahua shamuca. 2) Turmindusguna ricurijpis Yaya Diosta imasna sirvinara ricuchingahua shamuca. 3) Paihua causaira cusha, ñucanchira ‘randiuj’ shina quishpichingahuas shamuca. Leapai Mateo 20:28.
3. Ñucanchiga ¿imarasha quishpirinara ministinchi?
Yaya Diosga Adanda nicami, ñucara mana casusha huañunguimi. Dios mana munacachu Adán huañuchu. Chiraigu Adán uchara mana rashca ajpi, pis mana rucuyasha huañunmaca (Génesis 2:16, 17; 5:5). Bibliaga ricuchinmi, Adanmanda intiru mundui huañui “icuca”. Adán uchara pasachishcamanda tucuiguna huañunchi. Chiraigu quishpirinara ministinchi. Leapai Romanos 5:12; 6:23.
Huañunamandaga ¿pita ñucanchira quishpichi ushan? Tucui runauna uchayuj pagarishcamanda, pitas mana quishpichina ushanchichu. Huañushaga ñucanchi quiquin uchamanda paganchi. Leapai Romanos 3:23.
4. Jesús ¿imarasha huañuca?
Jesusga ucha illaj aca, mana ima huras uchacachu. Chiraigu, mana paihua uchamanda huañucachu. Ñucanchi uchamanda pagangahua huañuca. Yaya Dios paihua Churira cachamuca, tucui runaunamanda huañungaj. Shina rasha runaunama llaquishcara ricuchica. Shinallara Jesús paihua Yaya mandashcara uyasha, paihuas runaunama llaquishcara ricuchica. Uchamanda, huañuimandas runaunara quishpichingahua Jesús huañuca. Leapai Juan 3:16; Romanos 5:18, 19.
Jesús ¿imarasha huañuca? nishca video ricui.
5. Jesús cuna punzhai ¿imara ruraun?
Jesús cai Allpama shamushcai ashca ungushcaunara alichica, huañushcaunara causachica, turmindus apajcunaras yanapaca. Shina rasha ricuchicami pai mandanai shinallara rurangaraushcara (Mateo 15:30, 31; Juan 5:28). Jesús huañushca huasha, Yaya Diosga paita cuti causachica, ahua pachai causachu (Efesios 1:20). Ahua pachai Jesusga paihua Yaya ali maqui partima chapana aca, Allpara mandana apina punzhagama (Hebreos 10:12, 13). Cunan punzhai Jesús ñami ahua pachai mandaun. Randi, paita catijcuna Jesús mandaun nisha, intiru mundui cuintarianun. Leapai Ricuchina (Apocalipsis) 11:15; Mateo 24:14.
Yaya Dios cushca ushaihuami Jesusga manalira ruraj runaunara, turmindusgunaras ñalla tucuchinga. Jesuspi fera charijcuna, paita casujcunas ali gustu Allpai, cushi causangaranun. Leapai Mateo 5:5.
