Latinoamérica partii ashca huaranga runauna tianun, ashca runauna comunidadgunai causanun, paiguna quiquin shimira yachanaras charinun. Chi runauna Bibliamanda yachanuchu munanchi, chiraigu ñucanchi publicacionguna 130 yali Latinoamericamanda shimiunama pasachinchi. a Ashca chibi tiajcuna Jehovahuaj testigoguna anun, paiguna Biblia mandashcara casushcamanda shuj runauna yachanara mana catisha llaquiuna charinushca. ¿Imasnara cuyashca cullquira paigunara yanapangaj utilizashcanchi?

 México llacta huichol comunidadbi, ñucanchi huauquiuna respetuhua rimanuca iglesia istaunai mana satiringaraunchi Biblia cuntra rishcamanda nisha. b Shinajpi 4 de diciembre de 2017 huatai, huaquin piñarishca runauna huauquiunara, paigunahua tiaj runaunaras macanuca. Comunidadmanda ichunuca, paiguna cosasgunara huajlichinuca astaumbas cuti tigramunujpi huañuchishun nisha rimanuca.

 Mayan llactaunai causaj huauquiuna ministishcaunahua yanapanuca. Agustín shuti huauqui cuintan paiguna huasima tigrangaj ima ministinuca, pai nin: “cullqui mana charicanchi shu abogado pagangaj ñucanchira yanapachu”.

 Ñucanchi huauquiuna Diosta lugar adurana mana charishcaraigu, Centroamericamanda sucursal uctalla yanapanuca. Ñaupa punda, apuunara mañanuca ima tucushcara ali yachangaj. Huasha, Jehovahuaj testigoguna Comité de Coordinadores Cuerpo Gobernantemanda huauquiuna chasquinuca, Departamento de Asuntos Legales central mundialmanda sucursalhua shu demanda churanuchu huichol huauquiunara difindingaj. Cai demanda México llactama mas valishca tribunalma pactaca, cai an Suprema Corte de Justicia de la Nación.

 Huasha shuj llactamanda abogadoguna shu discurso puruntunuca alira intindichingaj runauna comunidadmanda yachanara respetana, cuirana ashcara shinallara comunidadguna runaunara cuirana, respetana ashcara maibi causanujpis.

 8 de julio de 2020 huatai, Corte Suprema de Justicia, Jehovahuaj testigoguna partima tucusha mandaca tucui chi comunidadmanda llucchisha cachashcaunara tigrangaj saquinuchu. Agustín huauqui tucuigunamanda rimasha nin: “Cushi, pagarachushca anchi huauquiuna yanapashcamanda. Mana imaras rurana ushashcanchimaca paiguna mana yanapajpi”.

 Ecuador llactai, San Juan de Ilumán Otavalo partii, ñucanchi runa shimi rimaj huauquiuna chi tunu turmindusgunallara charinuca. 2014 huatai, municipio permiso cushcahua Reinomanda Yachana Huasira shayachingaj callarinuca, shinajpi shu sacerdote 100 runaunara tandachica huasi shayachinara saquinuchu. Comunidadmanda runauna huauquiunara mandanuca paiguna tandarinaunara saquinuchu.

 Ecuador sucursalmanda, central mundialmanda departamentos de Asuntos Legales tarbanuca ñucanchi huauquiunara difindingaj. Cai tucushcauna tribunalgunama apanuca, shina comunidad huauquiunara saquica cuti tandarinuchu shinallara Reinomanda Yachana Huasira shayachinara tucuchinuchu. Shinajpi huauquiuna huasha llaquiuna mana charinuchu, ñucanchi abogadoguna mas valij tribunalgunara mañanuca comunidadguna derechos humanos internacionales nishcara respetanuchu.

 16 de julio de 2020 huatai, Ecuadormanda mas valij tribunal Corte Constitucional, cai tucushcara ricuca. Abogadoguna Ecuadormanda huauquiuna anuca. Paigunahua shuj llactamanda tucushcara difindingaj chuscu ali abogado huauquiuna tianuca. COVID-19 pasachij ungüi tiashcamanda, chi tandarinara Internetmanda ruranuca. Cai tunu caudsayachina Jehovahuaj testigoguna punda rurashca an.  c Abogadoguna ricuchinuca tucui comunidadgunai causaj runaunara respetana ashcara.

 Ñucanchi Otavalomanda huauquiuna Corte Constitucional ima ajllashcara chaparianun, cai yanapai chasquishcamanda yapa pagarachushca sintirinun. Quichua Ilumán congregacionmanda shu tandarijcunara cuiraj César shutiyuj nica: “Jehová paihua organizacionhua paita sirvijcunara ashca yanapanmi ansa tiaj partiunai”.

 Tucui yanapaj abogadoguna Jehovahuaj testigoguna anuca, cullquira mana cubrasha cushihua tarbanuca. Shinajpi cai caudsayachinaunara rurangaj, puruntungaj cullqui, timpu ministirica. Ñucanchi huauquiuna 380 horasguna utilizanuca México caudsayachinara puruntungaj, shinallara 240 horasguna documentosgunara shuj shimima pasachingaj utilizanuca. Shinallara shuj llactaunamanda 40 abogadoguna Ecuadormanda caudsayachinai ashca horasguna pasanuca. ¿Imasnara cai caudsayachinaunai ministishcara pagana ushanuca ñucanchi huauquiunara yanapangaj? Canguna cuyashca cullquihua donate.mt1130.com Internetpi. Ashca pagarachu canguna cuyaj shungu ricuchishcamanda.