•   7 de septiembre de 2022 The Guardian nishca periódico nin: “China llacta riman cai huata indi mas shinzhi rupachiushca, shinallara tucui huataunamanda yacu mas chaquirishca”.

•   26 de agosto de 2022 Noticias de la ONU nishca riman: “África maican llactaunai chuscu huatamanda yacu yapa chaquiriushca cai huata shinallara catinga”.

•   23 de agosto de 2022 BBC News nishca caita nin: “500 pasashca huataunamanda cai huata Europa partii chaupi yali llactaunai yacu yapa chaquirisha catinga”.

 Ashca caimanda yachajcuna rimanun casna yacu chaquirinauna catinga shinallara mas shinzhi tucunga. ¿Shamuj punzhai cai llaqui alichinamanda shu chapanara charinchichu? Biblia caimanda ¿imara nin?

 Biblia nin ñucanchi punzhaunai cai pasanara:

•   ‘Shinzhi yarcai timpuuna, huaquin partiunai’ tiangami (Lucas 21:11).

 Yacu chaquirijpi ansalla micunauna tian. Micuna illashcamanda llaquiuna huañuiguna tian, cai ricuchin Biblia rimashca profecía pactariushcara (Apocalipsis 6:6, 8).

 Biblia intindichin imarasha cai llaqui mirarisha catiushca. Casna riman:

•   “Mana charinzhu [...] puriuj runa paihua purinara pushangaj (Jeremías 10:23).

 Cai intindichin runauna paigunallara ali mandangaj mana ushashcara. Paiguna mandangaj mana ushashcaraigu allpa chaquiriun yacuunas tucuririanun.

•   Ashca cientificoguna quirinun runauna rurashcamanda intiru mundui indi yapa rupachisha yacuunara chaquichiun.

•   Runauna cullquira yapa munashcamanda, gobiernoguna shamuj punzhai pasanara mana iyarisha rurashcamanda ashca sachaunara tucuchirianun, shinallara allpai tiajcunara huajlichinun, runauna caita rurashcamanda valishca yacuunara chaquichirianun.

 Shinajpis Biblia shu gustu chapanara cun.

 Biblia riman Yaya Dios yacu chaquirinaunara alichinga. ¿Imasnara ruranga?

1.  1. Dios ‘cai pachara tulajcunara tulanga’ (Apocalipsis 11:18). Manaliuna, cullquira llaquijcuna, allpara huajlichijcunaras Yaya Dios tucuchisha yacu chaquirinaunara alichinga (2 Timoteo 3:1, 2).

2.  2. “Chaquishca pambas [...] azafrán shina sisayangami” (Isaías 35:1, 6, 7). Dios alichingami allpai yapa chaquirinauna tiashcara, cai allpara shu gustu paraíso rurangami.

3.  3. “Can allpara cuirangui, ashca iñachu ashca aparichumbas rurangui” (Salmo 65:9). Yaya Dios bendiciashcahua ashca micunauna, chuyaj yacuunas tianga tucuigunaj.