Jehova Diospa testigonkunaqa iskay kutikamam semanapi huñunakuniku. Huñunakusqayku wasitam sutichaniku “Jehova Diospa testigonkunapa huñunakunanku wasi”, nispa. ¿Imapaqmi huñunakuniku? ¿Yanapasunkimanchu huñunakuyniykuman riyqa?

•  ¿Imapaqmi huñunakuniku?

•  ¿Yanapasunkimanchu huñunakuyniykuman riyqa?

•  Wakin musu-sipaskunam ninku

 Huñunakunikuqa bibliamanta yachanapaqmi, chaynapi ruwayman churaspa kusisqa kawsakunaykupaq. Huñunakuykunaman riyqa yanapasunkim:

•   Diosmanta chiqap kaqta yachanaykipaq.

•   Imanasqa imapas pasakusqanmanta yachanaykipaq.

•   Allin runa kanaykipaq.

•   Allin amistadkunata tarinaykipaq.

 Kayta willasqayki: Huñunakunayku wasipiqa yachaniku kay allpa pachanchikta Dios kamachiptin imaynaña kawsakunanchikmantam (Mateo 6:9, 10; 24:14; Lucas 4:43).

 Arí, yanapasunkim. Huñunakuyniykupi bibliamanta yachachikuykunaqa yanapasunkim allin yuyayniyuq runa kanaykipaq (Proverbios 4:5, Chuya Qellqa, CQ). Chay yachasqaykiqa yanapasunkim allinta tantiakuspa kusisqa kawsakunaykipaq. Chaymantapas kay tapukuykunamantam yachanki:

•   ¿Imapaqtaq kawsakunchik?

•   ¿Dioschu huchayuq ñakarinanchikpaq?

•   ¿Wañukuptinchikqa hinallaraqchu almanchik maypipas kawsan?

 Chaymantapas sapa semana tukuytam huñunakusqaykupiqa puntamanta kayna tapukuykunamanta yachachimuwanku:

•   ¿Imanasqataq ancha allin bibliawan yanapachikuyqa?

•   ¿Pitaq llakinchikkunapi yanapaykuwachwan?

•   ¿Imatataq Diosqa ñuqanchikpaq ña ruwachkanña?

 Brendam nin: “Huk kaqnin estudiaqmasiytam huñunakuyninchikman pusarqani. Kuskam tiyarqaniku hinaspam huñunakuyninchikpi estudianapaq qillqanchiktapas kuska qawarqaniku. Huñunakuy tukuytam payqa niwarqa iñiqmasinchikkunapa rimarisqanku ancha sumaqllaña kasqanta. Niwarqataqmi iglesianpiqa mana ñuqanchikpa hinachu qillqankuna nitaq videonkunapas kasqanta”, nispa.

 Kayta willasqayki: Huñunakuyniykupiqa manam qullqitaqa mañanikuchu.

 Huñunakuypi riqsisqayki runakunaqa kallpanchasunkim. Bibliapa nisqanman hinaqa kallpanchanakunapaqtaqmi huñunakunchik (Hebreos 10:24, 25). Kunan tiempoqa yaqa lliw runam kikillankupaq munaq kanku, ichaqa huñunakuypiqa Diosta kuyaq hinaspa runamasinkuna kuyaq runakunatam tarinchik, chayqa anchatam kallpanchawanchik.

 Elisam nin: “Wakin punchawqa llamkayniymantam pisipasqa hinaspa llakisqa lluqsimuni, ichaqa huñunakuyman riptiyqa iñiqmasinchikkunam kusikuyllawanña chaskiykuwanku, chayqa kusichiwanmi. Chaymi wasiyman kutispaypas kusisqa tarikuni hinaspam paqarinnintintapas kusisqallaña llamkayniymanpas rini”, nispa.

 Kayta willasqayki: Enterollan allpa pachapim achka-achka runakuna Jehova Diospa testigonkunawan kuska huñunakunku 60.000 masnin huñunakunanku wasikunapi. Sapa watam yaqa 1.500 huñunakuna wasikunata ruwaniku huñunakuyniykuman runakuna astawan hamusqankurayku. a