Bibliapiqa manam imatapas ninchu wawanta mana munaspan huk warmi abortasqanmantaqa, ichaqa bibliapi wakin textokunata leespam yachanchik wiksayuq warmi abortananta Jehova Dios mana munasqanta. Payqa sulluchallaraq wawatapas anchatam kuyan.

 Jehova Dios unanchawasqanchikraykum kawsakunchik (Genesis 9:6; Salmos 36:9 a). Wiksallapiraq kaq wawapas kachkan Jehova Dios munaptinmi. Chayraykum pi warmipas wawayuq kayta mana munaspan abortaspanqa kawsaq wawata wañurachisqanrayku huchapi tarikun.

 Serviqninkunatam Jehova Dios kaynata kamachirqa: “Sichu runakuna maqanakuchkaspa wiksayuq warmita manaraq tiemponpi unqurachiptinku wawachapas chaynataq mamanpas mana wañuptinqa, chayta ruwaqmi juezpa qayllanpi chay warmipa qusanpa hayka mañakusqan qullqita qunan. Wawacha utaq maman wañuruptinmi ichaqa wañuchiq runapas wañuchisqa kanan”, nispa (Exodo 21:22, 23, TNM). b

•  ¿Sulluchallaraq kaq wawapas Diospaqa kawsaq runañachu?

•  ¿Diosqa pampachanmanchu kikinmanta abortaq warmitaqa?

•  ¿Wiksayuq warmi utaq wiksanpi wawan wañuypa patanpi kaptinkuqa, abortayqa allinchu kanman?

 Diospaqa kawsaq runaqa kanchik warmipa wiksayakurusqanmantapacham. Bibliapiqa manaraq naceq wawamanta rimaspanpas kawsaq runamanta hinañam rimachkan. Chaymanta qatiqninpi astawan yachaykusunchik.

•   Jehova Dios yuyayta quptinmi David kaynata qillqarqa: ‘Sulluchallaraq kachkaptiymi rikuwarqankiña ñuqataqa’, nispa (Salmos 139:16). Chaywanmi yachanchik David manaraq nacechkaspanpas Jehova Diospaqa kawsaq runaña kasqanta.

•   Jehova Diosmi Jeremiastaqa akllarqaña paymanta willakunanpaq manaraq nacechkaptin. Chaymi Jehova Dios Jeremiasmanta rimaspan nirqa: ‘Mamaykipa wiksanpi manaraqpas unanchachkaspaymi riqsirqaykiña. Manaraqpas nacechkaptikim qamtaqa sapaqchakurqaykiña. Nacionkunamanmi ñuqamanta willakunaykipaq churarqaykiña’, nispa (Jeremias 1:5).

•   Bibliata qillqaq Lucas sutiyuq doctorpas griego rimaypi bibliata qillqasqanpim manaraq naceq wawamanta rimaspan hinaspa chayraq nacesqa wawamanta rimaspan chaynalla kasqankuta nirqa (Lucas 1:41; 2:12, 16).

 Arí, Jehova Diosqa pampachanmanmi. Chayraykum mana allin ruwasqanmanta wanakuspanqa manaña ñakakunanchu. Bibliapim nin: “Tayta Diosqa llakipayakuqmi. Tayta Diosqa kuyapayakuqmi. [...] Intipa qispimunantam intipa siqaykunanmanta karuncharun. Chaynam mana kasukusqanchiktapas ñuqanchikmanta karuncharun”, nispa (Salmos 103:8-12). c Arí, Jehova Diosqa pampachanmi huchanmanta wanakuqtaqa (Salmos 86:5).

 Bibliapim niwanchik manaraq naceq wawapas Diospaqqa kawsaq runaña kasqanta, chaymi wiksayuq warmipa vidan peligropiña kaptinpas utaq wawapa vidan peligropiña kaptinpas abortayqa hucha kanman.

 Sichu wachakuptin mamanpa vidan utaq chay naceq wawapa vidan peligropi kaptinqa, ¿imatam ruwachwan? Chayna kaptinqa qusanmi utaq huk kaqnin ayllunmi tantianan wawapa vidanta salvananpaq utaq warmipa vidanta salvananpaq.