Arí kallpanchawanchikmi. Jehova Diosqa manam qunqanchu imawanpas unquq serviqninkunataqa. Chaymi bibliapi niwanchik unquruptinchikqa taytanchik Jehova kallpanchaspa yanapawananchikmanta (Salmos 41:3, Chuya Qellqa, CQ). Llumpayta unqusqanchikrayku mana hukmanyarunapaqmi kaykunapi kallpanchakunanchik:

1.   Diostam mañakunanchik. Mañakuptinchikqa taytanchik Jehova Diosmi runapa mana entiendey atinan hawkayaywan sunqunchikta tiyaykachinqa, hinaspam yanapaykuwasun mana hukmanyarunanchikpaq (Filipenses 4:6, 7).

2.   Sunqunchikmi kusisqa kanan. Bibliapim nin: ‘Kusisqalla sunquyuq runaqa sanuy-sanuymi kanqa. Llakisqalla sunquyuq runam ichaqa unqusqalla kanqa’, nispa (Proverbios 17:22, CQ). Kusisqa sunquyuq kayninchikqa yanapawasunmi mana hukmanyarunapaq chaynataq mana unqurunapaq.

3.   Diosninchik hamuq tiempopi imata ruwananpaq nisqanpim yuyaymanananchik. Ñakarichiwaqninchikkunata Diosninchik tukuchinanpi yuyaymanasqanchikmi unquptinchikpas yanapawasun mana hukmanyarunapaq (Romanos 12:12). Palabrapim niwanchik hamuq tiempopiqa manaña pipas unqunanchikmanta (Isaias 33:24, CQ). Hamuq tiempopiqa manañam unqusunchu mana hapiy atina unquykunawanqa nitaqmi yuyaqyasunñachu. Palabranpim niwanchik: ‘Hinaptinqa aychallanpas rikurirunqa musu kasqanpi hinaraqchá. Hinaptinqa rikurirunqa musu kasqanpi hina kallpayuqraqchá’, nispa (Job 33:25, CQ).

 Willakuy: Jehova Diospa testigonkunaqa manam iskayrayanikuchu imawanpas unquptiyku taytanchik Jehova Dios yanapawanankumantaqa (Marcos 2:17). Chayna kaptinpas imawanpas unquspaykuqa doctormanmi riniku. Ichaqa pipas unquptinqa manam ninikuchu imawan hampichikunankupaqqa, chaypaqqa sapakamam tantiakuna.