“Entiendeq kaymi yanapawanchik piwanpas hawkalla kawsakunapaq” (Declaración de Principios sobre la Tolerancia de la Unesco, 1995).

 Mana entiendeq kayñataqmi qallarichin mana respetakuq hinaspa chiqnikuq kayta. Yaqa llapanpim chayna kayqa tukunman chiqninakuypi utaq maqanakuypi.

 Achka runakunam mana chaynallatachu piensanku entiendeq runa kaymantaqa. Wakin runakunam piensanku entiendeq runaqa tukuy imata allinpaq hapiq kasqanta. Wakinñataqmi bibliapa nisqanman hina piensanku entiendeq runaqa hukkunapa imapas akllakusqanta respetaq kasqanta.

 ¿Yaqachu bibliaqa yanapawanchikman kayna sasachakuypa chawpinpi kawsachkaptinchikpas?

Bibliapa ima nisqanmantawan entiendeq kaymanta

 Bibliapim nin entiendeq runa kanapaq. Kaynatam nin: “Llapallan runakunayá yachachunku entiendeq runa kasqaykichikta”, nispa (Filipenses 4:5, Musuq pachapi kawsaqkunapaq Diospa palabran Mateo-Apocalipsis). Kallpanchawanchiktaqmi kuyakuq, respetakuq hinaspa hukkunapaq allin kaqkunata ruwanapaqpas. Chayraykum bibliapa chayna nisqanta kasukuqkunaqa mana pitapas harkakunkuchu imayna kawsakunankupaq tantiakuptinkupas. Manamá harkakunkuchu imapas tantiasqanku mana allin kaptinpas, manataqmi paykuna hinaqa piensankuchu.

 Chaywanpas bibliaqa runakuna imayna kawsakunapaqmi niwanchik. Bibliapim nin: “Yaw runa, [Diosqa] allin kaqtam nisurqanki”, nispa (Miqueas 6:8). Diosqa palabranpim niwanchik kusisqa kawsakunanchikpaq imata ruwanamanta (Isaias 48:17, 18).

 Diosqa manataqmi niwanchikchu pitapas juzganapaqqa. Bibliapim niwanchik: “Chullallam kamachikuykunata rikurichiq Diosqa [...], ¿pitaq qamqa kanki runamasikita juzganaykipaqqa?”, nispa (Santiago 4:12). Payqa saqin sapakama imapaqpas tantiakunanchiktam hinaspa chayman hina kananchiktam (Deuteronomio 30:19).

Bibliapa ima nisqanmantawan respetakuq kaymanta

 Bibliapim nin: “Llapallan runakunata respetaychik”, nispa (1 Pedro 2:17). Chayraykum bibliapa nisqankunata kasukuqkunaqa llapallan runakunata respetanku ima religionniyuqña kaptinkupas utaq imaynaña kawsakuptinkupas (Lucas 6:31). Chaywanqa manam nichkanchik lliw religionkunapa imayna creesqanku paykunapaq allin kasqantachu nitaq hukkunapa imapas tantiasqankuwan acuerdopi kasqankutachu. Testigokunaqa Jesus hinam lliw runakunata respetanankupaq kallpanchakunku.

 Jesusmi huk kutipi huk religionniyuq warmiwan parlarqa. Chay warmiwan yachaq qariqa manam qusanchu karqa, chayna uywanakuyqa manam Jesuspaqqa allinchu karqa. Chaywanpas Jesusqa respetowanmi parlapayarqa (Juan 4:9, 17-24).

 Jesus hinam testigokunapas pipas uyariyta munaptinqa imapi creesqankumanta willanku. Chaytaqa ruwanku ‘ancha respetowanmi’ (1 Pedro 3:15). Bibliam nin Diosta serviqkunaqa imapi creesqankuta aceptanankupaq mana pitapas obliganankupaq. Bibliapiqa nintaqmi: “Señorpa serviqninqa manam peleananchu, aswanqa llapallanwanmi kuyakuqllaña kanan”, nispa (2 Timoteo 2:24).

Bibliapa ima nisqanmantawan chiqninakuymanta

 Bibliapim niwanchik: ‘Llapallanwanyá hawkalla kaychik’, nispa (Hebreos 12:14). Hawkalla kayta munaq runaqa piwanpas hawkalla kawsakunanpaqmi kallpanchakun. Ichaqa manam bibliapi yachasqankunataqa yanqachanchu (Mateo 5:9). Bibliapiqa nintaqmi Diosta serviqkunaqa chiqniqnin runakunatapas kuyanankupaq. Chaywanqa nichkan mana allin ruwaqnin runakunatapas kuyanankupaqmi (Mateo 5:44).

 Proverbios 6:16-19 nisqanpim nin Diosqa mana allin ruwaykunata ‘chiqnisqanmanta’ utaq ‘millakusqanmanta’. Bibliaqa ninmi pipas huchanmanta wanakuspan cambiaptinqa hinaspa kamachikuyninkunata kasukuptinqa Diosqa pampachaykuspan yanapananmanta (Isaias 55:7).

Entiendeq kaymantawan respetakuq kaymanta bibliapa nisqankuna

 Tito 3:2 nisqanpim nin: ‘Ama hikutakuqyá kaychik, hinaspapas lliw runakunawanyá llampu sunqulla kaychik’, nispa.

 Mateo 7:12 nisqanpim nin: “Imaynam qamkunapas munankichik runamasikichik qamkunapaq imapas ruwananta, chaynatayá qamkunapas paykunapaq ruwaychik”, nispa.

 Josuey 24:15 nisqanpim nin: “Kunanyá akllakuychik pim yupaychayta”, nispa.

 Hechos 10:34 nisqanpim nin: “Diosqa manam pimanpas sayapakunchu”, nispa.

 Habacuc 1:12, 13 nisqanpim nin: ‘[Diosqa] manam qawayllaqa-qawakunqachu mana allinkunataqa’, nispa.

 Romanos 12:19 nisqanpim nin: “Diosmanyá saqiykuychik ruwasqankuman hina kutichipunanpaq. Chayna kasqanmantam ñawpaq qillqakunapi nin: ‘Ñuqa Jehova Diosmi a nini: “Mana allin ruwaqkunataqa ñuqam chinkachisaq, ñuqataqmi ruwasqankuman hina kutichipusaq”’”, nispa.

 Jehova Diosqa manam pitapas ninchu vengakunanpaqqa. Payqa ñam tantiarunña haykapi vengakuyta. Chaymanta astawan yachanaykipaq leey “¿Alguna vez se hará justicia en el mundo?” nisqanta.