Imamantapas llumpayta preocupakuspaqa hukmanyaruchwanmi utaq unquruchwanmi. Chaywanqa astawanraqmi sasachakuchwan.

•  Noticiakunataqa amayá llumpaytaqa qawaychu nitaq uyariychu. Televisionpi, radiopi mana allinkunamanta willakusqankuta llumpayta qawaspaykiqa utaq uyarispaykiqa mancharikuspam aswan hukmanyasqa tarikuwaq.

   Bibliam nin: ‘Llakisqalla sunquyuq runam ichaqa unqusqalla kanqa’, nispa (Proverbios 17:22 a).

   Johnmi nin: “Noticiakuna qawaytam gustani, ichaqa chaykunawanqa hukmanyanim. Chaymi kallpanchakuni llumpayta mana qawanaypaq”, nispa.

   Ima niwaqtaq: ¿Sapa punchawraqchu noticiata qawanayki ima pasakusqanmanta yachanaykipaq icha wakin kutillapichu?

•  Tantiakuy sapa punchaw imakunata ruwanaykipaq. Tantiakuy imay horata hatarinaykipaq, mikunaykipaq, puñunaykipaq chaynataq ima ruwaynikita ruwanaykipaqpas. Chaykunapaq kallpanchakusqaykiqa yanapasunkim imamantapas llumpayta mana preocupakunaykipaq.

   Bibliam nin: ‘Allinta tantiarispa imapas ruwasqaqa apuyachikunmi’, nispa (Proverbios 21:5).

   Josephmi nin: “Coronavirus unquy qallaykuptinmi wasillaypi kasqayrayku yanqakunapi tiempoyta usuchirqani. Chaymi tantiakururqani sapa punchaw imay horapi imatapas ruwanaypaq. Chayna tantiakusqaywanqa tiempoytaqa manañam usuchirqanichu”, nispa.

   Ima niwaqtaq: ¿Qampas tantiakurunkiñachu imay horata imatapas ruwanaykipaq? ¿Chayqa yanapasuchkankichu ima ruwaynikikunatapas lliwta ruwanaykipaq?

•  Allin kaqkunallapi piensay. Amayá piensaychu “kaynata-waknata ruwayman karqa” nispaqa, nitaq “hamuq punchawkunapiqa kaymi utaq wakmi pasaruwanqa” nispapas. Chaynata piensaspaykiqa hukmanyaruwaqmi. Chaykunapi piensanaykimantaqa allinlla kasqaykipi piensaspa Diosta agradecekuy.

   Bibliam nin: “Agradecekuqtaqyá kaychik”, nispa (Colosenses 3:15).

   Lisam nin: “Bibliata leespayqa allin kaqkunallapim piensani, chayqa yanapawanmi hawkalla kanaypaq”, nispa.

   Ima niwaqtaq: ¿Sasachakuyllaykikunapi llumpayta piensasqaykichu qunqarachisunki vidaykipi tukuy allinkuna pasasusqaykita?

•  Hukkunatayá yanapay. Llakisqa kasqaykirayku sapallayki kanaykimantaqa hukkunata yanapanaykipaqyá kallpanchakuy.

   Bibliam nin: “Amayá kikillaykichikpa allinnikichiktachu maskaychikqa, aswanqa wakinnikichikpa allinnintayá”, nispa (Filipenses 2:4).

   Mariam nin: “Hukkunata yanapaspanchikqa ñuqanchikpas chaynataq paykunapas kusisqam tarikunqaku. Chaywanqa sasachakuyninchikpiqa manañam llumpaytaqa piensasunchu”, nispa.

   Ima niwaqtaq: ¿Pitataq yanapaykuwaq? ¿Imakunata ruwaspataq yanapaykuwaq?

•  Mana unqurunaykipaq cuidakuy. Chaypaqyá ejerciciokunata ruway, qanchis utaq pusaq horata puñuy, astawanqa verdurakunatawan frutakunata mikuy. Sanolla kasqaykiqa yanapasunkim imamantapas llumpayta mana preocupakunaykipaq.

   Bibliam nin: ‘Cuerponchikwan ejercicio ruwayqa [...] yanapawanchikmi’, nispa (1 Timoteo 4:8).

   Catherinem nin: “Ñawpaqtaqa wawaypiwanmi ejerciciota ruwaq lluqsiq kaniku, kunanñataqmi wasillaykupi kasqaykurayku manaña anchatachu lluqsiniku, chaymi tantiakuruniku imay horata ejerciciota wasillaykupi ruwanaykupaq, chayqa anchatam yanapawanku kusisqa chaynataq hawkalla kanaykupaq”, nispa.

   Ima niwaqtaq: ¿Mikuchkankichu verdurakunatawan frutakunata? ¿Ruwachkankichu ejerciciokunata?

 Kay yachachikuypi nisqankunaqa achka runakunatam yanapachkan imamantapas llumpayta mana preocupakunankupaq. Yanapachkantaqmi hamuq tiempopi imaynaña kawsakunamanta bibliapi yachachikuykunamanta yachasqankupas. Chaymanta astawan yachanaykipaq “¿Imaynañam Jesus kamachiptin kawsakusun?” niq yachachikuyta leey.