2 Samuel 24:1-25
24 Jehova Diosmi kaqmanta Israel runakunapaq piñakururqa.+ Piñakururqaqa Davidta hukkaqnin umachaptinmi, nirqam: “Juda ayllutawan Israelpi wakin ayllukunatayá+ yuparuy”, nispa.+
2 Chaymi Davidqa soldadokunapa kamachiqnin Joabta+ nirqa: “Llapallan Israel ayllukunatayá Dan llaqtamanta Beer-seba llaqtakama+ yuparamuy hayka kasqanta yachanaypaq”, nispa.
3 Joabñataqmi Davidta nirqa: “Jehova Diosyá runakunataqa 100 kuti mastaraq mirachichun, chaynapi kikiki qawanaykipaq. Chaynaqa kamachiqlláy, ¿imapaqtaq yupachiyta munachkanki?”, nispa.
4 Chaywanpas kamachiq Davidqa manam uyariyta munarqachu Joabpa hinaspa soldadokunata kamachiqkunapa nisqantaqa. Chaymi kamachiq Davidpa kasqanmanta lluqsirqaku Israel runakunata yupaq.+
5 Jordan mayuta chimparuspankum Aroer llaqtapi samarurqaku,+ samarurqakutaqmi llaqtapa hichpan wayqupipas. Chaymantam pasarqaku Gad runakunapa allpan lawman, chaymantañataqmi rirqaku Jazer llaqtaman.+
6 Chaymantam rirqaku Galaad allpanta+ hinaspa Tatim-hodsi allpanta, hinaspam chayarurqaku Dan-jaan llaqtaman. Chaymantam muyurqaku Sidon lawman.+
7 Hinaspankum chayarurqaku murallayuq Tiro llaqtaman+ hinaspa Hev runakunapa+ chaynataq Canaan runakunapa allpanman. Hinaspankum tukurqaku Beer-seba llaqtapi,+ chayqa karqa Juda ayllupa allpan Negueb qichwapim.+
8 Chaynatam Israel nacionpi llaqtakunata muyuramurqaku isqun killa 20 punchawpi, hinaspam Jerusalenman kutimurqaku.
9 Hinaptinmi Joabqa kamachiq Davidman willarqa hayka runakuna kasqanta. Juda ayllupim karqa 500.000 qarikuna, wakin Israel ayllukunapiñataqmi karqa 800.000 espadayuq soldadokuna.+
10 Runakunata yuparachispanmi Davidqa mana hawkachu tarikurqa,+ hinaspam Jehova Diosta nirqa: “Kay ruwasqaywanmi llumpayta huchallikuruni.+ Jehova Dioslláy, huchaymantayá pampachaykullaway,+ mana umayuq hinam ruwarullani”, nispa.+
11 David tutapayta hatariruptinmi Jehova Diosqa willakuqnin* Gadta+ rimapayarqa. Payqa karqa musquypi hina* qawaq Davidpa runanmi. Gadtam Dios nirqa:
12 “Davidtayá nimuy: ‘Jehova Diosmi nin: “Kimsamantayá mayqintapas akllakuy”’”, nispa.+
13 Chaymi Gadqa Davidta nimurqa: “¿Mayqintataq akllakunki? ¿Qanchis wata kay llaqtapi muchuy* kanantachu?+ ¿Chiqnisuqnikikuna kimsa killa qatikachasunaykitachu?+ ¿Icha kimsa punchaw kay llaqtapi unquy kanantachu?+ Chaynaqa, allinta tantiaspaykiyá niway kamachimuwaqniyman willamunaypaq”, nispa.
14 Hinaptinmi Davidqa Gadta nirqa: “Kayqa llumpay llakikuypaqmi, Jehova Diospa makinman wichiymi+ aswan allinqa runakunapa makinman wichiymantaqa,+ Diosqa ancha llakipayakuqmi”, nispa.+
15 Hinaptinmi Jehova Diosqa Israel runakunata unquywan hapirachirqa.+ Chayqa karqa tutapaymanta Diospa nisqan horakamam. Chay unquywanmi Dan llaqtamanta Beer-seba llaqtakama+ 70.000 runakuna wañururqa.+
16 Jerusalen llaqtapi runakunata chinkarachinanpaq makinta angel haywariptinmi Jehova Diosqa runakunamanta llakipayarikuspan+ chay wañuchiq angelta nirqa: “¡Chayllataña! Amaña makikita haywarayayñachu”, nispa. Jehova Diospa angelninqa Arauna sutiyuq runapa iranpa hichpanpim kachkarqa.+ Araunaqa karqa Jebus runam.+
17 Runakunata wañuchiq angelta David rikuruspanmi Jehova Diosta nirqa: “Ñuqam huchallikurullani. Ñuqam pantarullani. Kay runakunaqa*,+ ¿imatataq ruwarunku? Ñuqatawan taytaypa ayllunkunatayá castigawaykuqa”, nispa.+
18 Chay punchawmi Gadqa Davidman rispan nirqa: “Araunapa iranman rispaykiyá Jehova Diospaq altarta* pirqapamuy”, nispa.+
19 Chaymi Davidqa Gadpa nisqanta kasukurqa hinaspa Jehova Diospa kamachisqantapas.
20 Araunaqa urayta qawarimuspanmi kamachiq Davidtawan runankunata rikuramurqa, hinaspanmi taripamuspan Davidpa ñawpaqninpi qunqurakuykuspan kumuykurqa.
21 Araunam Davidta nirqa: “Kamachiqlláy, ¿imanasqataq watukaykamullawanki?”, nispa. Davidñataqmi nirqa: “Jehova Diospaq altarta ruwanaypaqmi iraykita rantiq hamuchkani, chaynapi unquy chinkananpaq”, nispa.+
22 Araunañataqmi Davidta nirqa: “Kamachiqlláy, irataqa quyllam-quyki, Diospaqyá munasqaykita kañapuy. Kayqaya torokunapas nakaspa Diospaq kañapunaykipaq, trillana kullupas chaynataq yugukunapas chaywan kañanaykipaq.
23 Kamachiqlláy, tukuy kaykunatam quyki”, nispa. Araunaqa nirqataqmi: “Jehova Diosyá bendecisunki”, nispa.
24 Kamachiq Davidñataqmi Araunata nirqa: “Amayá quyllaqa-quwaychu, rantisqaykim. Manam Jehova Diosniypaqqa kañapuymanchu mana qullqiypa chanintaqa”, nispa. Chaymi Davidqa medio kilo masnin* qullqiwan iratawan torokunata rantirurqa.+
25 Chaypim Davidqa Jehova Diospaq altarta+ ruwapurqa hinaspam animalta nakaspan kañapurqa. Nakapurqataqmi Dioswan hawkalla kasqanrayku animalkunatapas. Chaymi Jehova Diosqa uyariykurqa Israel llaqtapaq mañakusqanta,+ hinaptinmi chay unquyqa chinkarurqa.
Willakuykuna
^ Utaq: “Profetan”.
^ Utaq: “Revelacionpi”.
^ Utaq: “Yarqay”.
^ Hebreo rimaypiqa nichkan: “Ovejakunaqa”, nispam.
^ Qaway kay palabrapa ima ninan kasqanta.
^ Utaq: “50 siclo”. Qaway B14 kaq yachachikuyta.
