Apocalipsis 5:1-14
5 Tronopi tiyaqpa alliq* makinpiñataqmi+ rikururqani wankukuq qillqata hawanpipas ukunpipas qillqasqata, chayqa kachkasqa qanchis kutikama alli-allin sellasqam.
2 Rikururqanitaqmi kallpasapa angeltapas, payqa kallpawan qayakuspanmi nirqa: “¿Pitaq kanman kay wankukuq qillqata chaynataq qanchis kutikama sellasqa kasqantapas kichananpaq hinaqa?”, nispa.
3 Ichaqa manam pipas karqachu hanaq pachapipas, kay pachapipas nitaq allpa ukupipas chay wankukuq qillqata kichaspan leey atiqqa.
4 Chaymi ñuqaqa llumpayllataña waqayta qallaykurqani chay wankukuq qillqata kichananpaq hina chaynataq leenanpaq hina mana pipas kaptin.
5 Chaymi huknin kamachiq* niwarqa: “Amañayá waqaychu. Leonwan sutichasqa Juda ayllumanta kaq+ kamachiq Davidpa+ ayllunmi+ vencerun,+ vencerunqa wankukuq qillqata hinaspa qanchis kutikama sellasqa kasqanta kichananpaqmi”, nispa.
6 Hinaptinmi chay tronopa chawpinpi querubin sutiyuq tawa angelkunapa chawpinpi hinaspa chay kamachiqkunapa*+ chawpinpi rikurqani sayachkaq malta carnerota,+ chay carneroqa wañuchisqa hinam kachkasqa,+ kasqataqmi qanchis waqranpas chaynataq qanchis ñawinpas, chay ñawinkunaqa enteron kay pachaman Diospa kachamusqan qanchis espiritunkunam.+
7 Chay carnerom qunqayllamanta hamuruspan chay wankukuq qillqata chaskiykurqa trononpi tiyaqpa alliq makinmanta.+
8 Chay wankukuq qillqata chaskiykuptinñataqmi chay tawa angelkunaqa hinaspa 24 kamachiqkunaqa*+ chay carneropa ñawpaqninpi qunqurakuykurqaku, kamachiqkunaqa sapakamam arpayuqkama hinaspa inciensowan* huntasqa qurimanta tazonniyuqkama kachkasqaku. Inciensoqa Diospa runankunapa mañakusqankum.+
9 Paykunam musuq takita takispanku+ ninku: “Qamqa wankukuq qillqata hapiykuspa qanchis kutikama sellasqa kasqanta kichanaykipaq hinam kanki, qamqa wañuchisqam karqanki, hinaspapas Diospaqmi runakunata yawarnikiwan rantirqanki+ llapallan ayllukunamanta, tukuy rikchaq rimayniyuqkunamanta, lliw llaqtakunamanta hinaspa lliw nacionkunamanta.+
10 Diosniykupaqmi+ paykunataqa churaykurqanki kamachiqkuna hinaspa sacerdotekuna kananpaq,+ paykunaqa kay pachatam kamachinqaku”, nispa.+
11 Rikurqanitaqmi achkallaña angelkunatapas tronopa muyuriqninpi, tawa angelkunapa muyuriqninpi chaynataq kamachiqkunapa* muyuriqninpi, uyarirqanitaqmi paykunapa rimasqankutapas, chay achkallaña angelkunaqa kasqa pachak wara-waranqantin hinaspa millo-millonnintinmi,+
12 paykunam kallpawan qayakuspa nirqaku: “Wañuchisqa malta carnerollam+ kanman atiyniyuq, Diospa bendecisqan, yachayniyuq, kallpayuq, respetasqa, hatunchasqa hinaspa alabasqaqa”, nispa.+
13 Hanaq pachapi, kay pachapi, allpapa ukunpi+ hinaspa lamar quchapi tukuy ima unanchasqa kaqkunapa kayna nisqantam uyarirqani: “Tronopi tiyaqwan+ malta carneroyá+ kachun wiña-wiñaypaq alabasqa, respetasqa,+ hatunchasqa hinaspa atiyniyuq”, niqta.+
14 Chay tawa angelkunañataqmi nichkasqaku: “¡Chaynayá kachun*!”, nispanku. Chay kamachiqkunañataqmi* qunqurakuykuspanku Diosta yupaycharqaku.
Willakuykuna
^ Utaq: “Paña”.
^ Utaq: “Anciano”.
^ Utaq: “Ancianokunapa”.
^ Kayqa karqa miski asnaq kutacha hinam.
^ Utaq: “Ancianokunaqa”.
^ Utaq: “Ancianokunapa”.
^ Utaq: “¡Amen!”.
^ Utaq: “Ancianokunañataqmi”.
