Colosenses 2:1-23
2 Ñuqaqa munani ancha kallpanchakusqayta yachanaykichiktam, kallpanchakuchkaniqa qamkunaraykum hinaspa Laodicea+ llaqtapi kaqkunaraykum, kallpanchakuchkanitaqmi llapallan mana riqsiwaqniykunaraykupas.
2 Kallpanchakuchkanitaqmi llapallaykichikpa sunquykichikta tiyaykachinaypaq,+ kuyanakuspa huklla kanaykichikpaq+ chaynataq imam kaqta entiendesqaykichikmanta bendicionkunata chaskinaykichikpaqpas, chaynapi Diospa pakasqan kaqkunamanta imam kaqta yachanaykichikpaq, chay pakasqa kaqqa Cristom*.+
3 Paypim sumaq pakasqa kachkan quri-qullqi hina tukuy yachayniyuq hinaspa yuyayniyuq kaypas.+
4 Kaytaqa nikichik sumaqllaña rimasqankuwan ama pipas engañasunaykichikpaqmi.
5 Qamkunawan kuska mana kaptiypas qamkunaqa sunqullaypim* kachkankichik, ñuqaqa kusikunim sumaqta rimanakuykuspa* imatapas ruwasqaykichikmanta+ hinaspa Cristopi iñisqaykichik allin takyasqa kasqanmanta.+
6 Hinaptinqa, señorninchik Jesucristota chaskisqaykichikman hinayá payta kasukuspa chaynalla kawsakuychik.
7 Imayna yachachisqa kasqaykichikman hinayá Jesuspi iñikusqaykichikrayku+ allin pirqasqa wasi hina hinaspa allin sapichasqa sacha hina kaychik.+ Chaymantapas manam qunqanaykichikchu haykapipas Dios agradecekuytaqa.+
8 Cuidakuychikyá, yanqañataq pipas pantarachisunkichikman runakunapa yachayninwan hinaspa costumbrenkuman hina yanqa rimaykunawan,+ chaykunaqa runakunapa piensayninman hinallam, manam Cristoman hinachu,
9 Jesucristopim Diospa imayna kayninkuna llapallan kachkan,+
10 payraykum tukuy ima allin kaqkuna qamkunapaqqa kachkan, payqa llapallan autoridadkunapa hinaspa llapallan gobiernokunapa kamachiqninmi.+
11 Paypi iñisqaykichikraykum qamkunaqa qari kaynikichikpi señalasqa hinaña karqankichik, señalasqa hinaqa karqankichik manam runakunapa ruwasqanman hinachu, aswanqa huchasapa cuerpoykichikpa munayninta saqispaykichikmi,+ chaynatam Cristopa qatiqninkunaqa señalachikunku.+
12 Qamkunaqa paywanmi pampasqa hina karqankichik Jesuspa bautizakusqanpi,+ chaymantapas kawsarichisqa hinam karqankichik+ Jesuswan kuska kasqaykichikrayku chaynataq atiyninwan Dios imakunatapas ruwasqankunamanta mana iskayrayasqaykichikrayku. Diosqariki Jesustam kawsarichirqa.+
13 Chaymantapas, huchaykichikrayku wañusqa kachkaptikichikmi hinaspa qari kaynikichikpi mana señalasqa kachkaptikichikmi Diosqa Jesucristowan kuskata kawsarichisurqankichik.+ Ñuqanchiktaqa sumaq sunqu kasqanraykum pampachaykuwarqanchik lliw huchanchikta,+
14 hinaspam contranchikpi qillqasqa+ kamachikuykunata+ chinkarachirqa.+ Chaytaqa chinkarachirqa Jesuspa ñakarisqan qirupi* clavowan takaruspanmi.+
15 Chaywantaqmi* gobiernokunatapas hinaspa autoridadkunatapas vencerqa,+ hinaspam presocharuspan lliw runakunaman qawachirqa* vencerusqanta yachanankupaq.
16 Chaynaqa manam pipas juzgasunaykichikchu ima mikusqaykichikmantaqa, tomasqaykichikmantaqa,+ fiesta ruwasqaykichikmantaqa, yuyarinaykichik llullu killa fiestamantaqa+ hinaspa samana punchaw* samanamantaqa.+
17 Tukuy chaykunaqa hamuq kaqkunapa llantuyllanmi,+ chaykunaqa Cristopim cumplikun.+
18 Amayá premio chaskinaykichiktaqa harkasunkichikchu+ humildetukuqkunaqa hinaspa angelkunata yupaychaqkunaqa, chay runakunaqa qawasqallankumanmi hapipakunku*, paykunaqa aychaman hinalla piensaspankum yanqakunamanta hatunchakunku,
19 manataqmi uma kaqtapas kasukunkuchu,+ uma hina kaqqa lliw cuerpotam kawsachin, umataqmi cuerpotaqa tullupa piezankunawan hinaspa ankukunawan hukllawasqata takyachin, umataqmi cuerpotaqa hinalla wiñachin Diospa munasqanman hina.+
20 Qamkunaqa Cristowan kuska wañuruspaykichikmi kay pachapi kaqkunata saqirurqankichikña.+ Hinaptinqa, ¿imanasqamá runakunapa kawsasqanman hinaqa kawsachkankichik? ¿Imanasqamá hinalla kasukuchkankichik+
21 “ama llachpaychu, ama malliychu, ama hapiychu” nisqa kamachikuykunataqa?
22 Chay kamachikuykunaqa rimachkan tomanapaq utaq mikunapaq kaqkunallamantam, tomanapaq utaq mikunapaq kaqkunaqa tomaruptinchik utaq mikuruptinchikmi chinkarun, chaymantapas chay kamachikuykunaqa runakunapa kamachikuyninman hinaspa yachachikuyninman hinallam kachkan.+
23 Chay kamachikuykunaqa sutillam qawakun munasqankuman hina yupaychasqankupi hinaspa humildetukusqankupi chaynataq cuerponkuta ñakarichisqankupi,+ chaykunaqa yachay tarinapaq hina rikchakuspanpas manam runakunataqa yanapanchu aychapa munayninta saqinankupaqqa.
Willakuykuna
^ Utaq: “Diospa akllasqanmi”.
^ Utaq: “Espirituypim”. Qaway kay palabrapa ima ninan kasqanta.
^ Utaq: “Ordenninpi”.
^ Utaq: “Kaspipi”. Qaway “ñakarichikuq qiru” niqpa ima ninan kasqanta.
^ Ichapas kanman: “Paywantaqmi”, niqpas.
^ Ñawpaqtaqa guerrapi vencechikuq soldadokunatam llapa runakunapa qawasqanta apamuqku.
^ Utaq: “Sabado”.
^ Kaypiqa Pabloqa rimachkarqa Dios mana yupaychaq runakuna taytachankuta chayllaraq yupaychayta qallarinankupaq rimasqankumantam.
