Exodo 15:1-27
15 Chay kutipim Moiseswan Israelpa mirayninkuna Jehova Diospaq kaynata takirqaku:+
“Jehova Diospaqmi takipusaq, payqa ancha riqsisqam rikurirun,+payqa caballotawan sillakuqnintam lamar quchaman wischuykurqa.+
2 Jehova* Diosmi kallpa quwaqniyqa hinaspa atiy quwaqniyqa, payqa wañuymanta harkaykuwaqniymi.+
Paymi Diosniyqa, payllatam yupaychasaq.+ Payqa taytaypa Diosninmi,+ paytam ñuqallayqa hatunchallasaq.+
3 Jehova Diosqa guerrapi alli-allin peleaqmi,+ paypa sutinmi Jehova.+
4 Lamar quchamanmi Egipto nacionta kamachiqpa* carretankunata hinaspa tropankunata wischuykurqa,+allin peleaq runankunatapas Puka lamar quchamanmi chinkaykachirqa.+
5 Timpuyllaña-timpuq yakum paykunataqa pamparurqa, hinaptinmi yaku ukuman rumi hina chinkaykurqaku.+
6 Ancha atiyniyuqmi alliq* makillaykiqa Jehova Diosnilláy.+
Chiqnikuqtapas wañuchiqmi alliq makillaykiqa Jehova Diosnilláy.
7 Ancha atiyniyuq kasqaykiraykum chiqnisuqnikikunataqa pinqayman churarunki.+
Piñakuynikiwanmi pajata nina rupachkaq hina paykunataqa chinkarachinki.
8 Pukuykuptillaykim yakuqa iskayman rakikururqa,hinaspam mana kutiykuspan hinallapi takyarurqa.
Timpuyllaña-timpuq lamar qucham hinallapi takyarurqa.
9 Chiqnisuqniki runam nirqa: ‘¡Haypanaykamam qatisaq! ¡Qichusqaytam rakinakusaq!’, nispa.
Nirqataqmi: ‘¡Sunquy tiyanankamam paykunataqa imatapas ruwasaq!
¡Espadaywanmi paykunataqa wañuchisaq!’, nispa.+
10 Ichaqa pukuykuptillaykim chiqnisuqnikikunataqa yaku pamparurqa,+manchakuypaq lamar quchamanmi paykunaqa titi hina chinkaykurqaku.
11 Jehova Dioslláy, qam hina Diosqa manam pipas kanchu,+qanmanta aswan chuyaqa manam pipas kanchu.+
Qamllam kanki takispa hatunchanayku Diosqa. Qamllam kanki imatapas suma-sumaqta ruwaq Diosqa.+
12 Alliq makikita haywariptikim chiqnisuqnikikunataqa allpa pacha millpururqa.+
13 Imaña kaptinpas hinalla kuyakuq kasqaykiraykum runaykikunataqa ñakarisqankumanta hurqumuspa pusamurqanki.+
Akllasqayki allpamanmi paykunataqa pusanki.
14 Huklaw llaqtayuq runakunam tukuy chaykunamanta yachanqaku,+ hinaspam manchakuymanta katkatatanqaku.
Filistea runakunaqa manchakuyllamantañam kanqaku.
15 Chay punchawqa Edom runakunata kamachiqkunam manchakuymanta katkatatanqaku.
Moab runakunata ancha riqsisqa kamachiqkunam katkatatanqaku.+
Canaan lawpi yachaqkunapas* manchakuymantam kanqaku.+
16 Paykunaqa manchakuyllawanñam kanqaku.+
Atiyniyuq kasqaykiraykum rumi hina hinallapi paykunaqa qiparunqaku.
Chaynam kanqa paykunapa allpanta runaykikuna pasanankukama Jehova Diosnilláy,akllasqayki runaykikuna+ chayninta rinankukama.+
17 Runaykikunataqa hurqumuspaykim pusanki urquykiman.+
Chayqa yachanaykipaq akllakusqaykim Jehova Dioslláy.
Chay chuya wasikiqa makikiwan ruwakusqaykim Jehova Diosnilláy.
18 Jehova Diosmi wiña-wiñaypaq kamachinqa.+
19 Egiptota kamachiqpa caballonkunapi hinaspa carretankunapi riqkunam lamar quchaman yaykurqaku,+hinaptinmi Jehova Diosqa yakuta maymi kasqanman kutiykachispan pamparurqa.+
Israelpa mirayninkunam ichaqa chaki pampanta chimparqaku”,+ nispa.
20 Aaronpa panin Miriamñataqmi panderetata* hapispa tusustin lluqsirqa, hinaptinmi paypa qipanta lliw warmikuna panderetata salsalyachistin chaynataq tusustin lluqsirqaku. Miriamqa karqa Diosmanta willakuqmi*.
21 Paymi qarikuna takiptin paypas takispan nirqa:
“Jehova Diospaqyá takiychik, payqa ancha riqsisqam rikurirun.+
Payqa caballotawan sillakuqnintam lamar quchaman wischuykurqa”, nispa.+
22 Chaymantam Moisesqa Puka lamar quchamanta huklawmanña Israelpa mirayninkunata pusarqa. Sur sutiyuq chunniq qichwantam kimsa punchaw puriyta rirqaku, chaypiqa manam yakutapas tarirqakuchu.
23 Hinaspam Mara* sutiyuq sitiomanña chayarurqaku,+ ichaqa manam chaypi yakutaqa tomayta atirqakuchu qatqi kasqanrayku. Chayraykum chaylawtaqa suticharqaku Marawan.
24 Yaku qatqi kasqanraykum Israelpa mirayninkunaqa Moisesmanta rimaspa+ nirqaku: “¿Ima yakutataq tomasunchik?”, nispa.
25 Moisesñataqmi Jehova Diosta qayakurqa,+ Jehova Diosñataqmi taksa sachachata qawaykachirqa. Hinaptinmi chayta yakuman Moises wischuykuptin yakuqa manaña qatqirqachu.
Chaypim Diosqa huk kamachikuyta qurqa chay kamachikuyman hina kawsakunankupaq, chaypitaqmi Diosqa yachayta munarqa sunqunkupi imayna kasqankuta.+
26 Diosmi paykunata nirqa: “Ñuqa Jehova Diosqa manam Egipto runakunata hinaqa ima unquywanpas ñakarichisqaykichikchu+ nisqaykunata uyariptikichikqa, munasqayman hina imatapas ruwaptikichikqa, kamachisqaykunata kasukuptikichikqa hinaspa kamachisqaykunata mana qunqaptikichikqa.+ Ñuqa Jehova Diosqa sanollatam kachisqaykichik”, nispa.+
27 Chaymantam Elinman* chayarurqaku. Chaypiqa 12 pukyukunam karqa, karqataqmi 70 palmera sachakunapas. Chaymi pukyukunapa waqtanpi samarqaku.
Willakuykuna
^ Kaypi Jehova sutitaqa Jah nispapas nichwanmi.
^ Utaq: “Faraonpa”.
^ Utaq: “Paña”.
^ Utaq: “Tiyaqkunapas”.
^ Utaq: “Profetisam”.
^ Utaq: “Salsalyata”.
^ “Mara” ninanqa: “Qatqi”, ninanmi.
^ Utaq: “Elim sitioman”.
