Genesis 3:1-24
3 Jehova Diospa unanchasqan llapallan purun animalkunamantam culebraqa+ sakrillaña karqa. Chay culebram warmita nirqa: “¿Dioschu nisurqankichik huertapi llapallan sachakunapa rurunta mana mikunaykichikpaq?”, nispa.+
2 Warmiñataqmi nirqa: “Huertapi sachakunapa ruruntaqa mikuymankum.+
3 Huertapa chawpinpi sachapa rurunmantam ichaqa Dios nirqa:+ ‘Amam mikunkichikchu, amataqmi llachpayllapas-llachpankichikchu. Manachayqa wañurunkichikmi’”, nispa.
4 Hinaptinmi culebraqa warmita nirqa: “Manapunim wañunkichikchu.+
5 Diosqa yachanmi maypacham mikuruptikichikqa ñawikichik kicharikuruptin Dios hinaña allin kaqtapas hinaspa mana allin kaqtapas yachaqña rikurirunaykichikta”, nispa.+
6 Chaymi warmiqa sachapa rurunta qawarqa mikunapaq allin kasqanta, qawarqataqmi munayllapaqña kasqantapas. Chay sachaqa sumaqllañam karqa. Chaymi chay sachapa rurunta pallaruspan mikururqa.+ Chaymantam qusanmanpas quykurqa hinaptinmi paypas mikururqa.+
7 Chaymi ñawinku kicharikuruptin qalalla kasqankuta qawakuykuspa higospa llaqinta* siraspanku pachakurqaku*.+
8 Tardeykuqtam wayrapa pukurimusqan horata qariwan warmiqa Jehova Diospa qayamusqanta huertapi uyarirurqaku. Chaymi Jehova Diosmanta pakakururqaku sachakunapa ukunpi.
9 Jehova Diosqa achka kutikamam runata qayarqa “¿maypitaq kachkanki?” nispa.
10 Runañataqmi nirqa: “Qayamuwasqaykitam huerta ukupi uyarirurqani, chaymi qalalla kasqayrayku mancharikuspay pakakururqani”, nispa.
11 Diosñataqmi nirqa: “¿Pitaq nisurqanki qalalla kasqaykita?+ ¿Icha ‘amam mikunkichu’ nisqay sachapa rurunta mikurunki?”, nispa.+
12 Qariñataqmi nirqa: “Quwasqayki warmim chay sachapa rurunta quykuwarqa, hinaptinmi mikururqani”, nispa.
13 Chaymi Jehova Diosqa warmita nirqa: “¿Imatataq kayta ruwarunki?”, nispa. Warmiñataqmi nirqa: “Culebram umacharuwarqa, chaymi mikururqani”, nispa.+
14 Hinaptinmi Jehova Diosqa culebrata nirqa:+ “Kay ruwasqaykiraykum llapallan uywa animalkunamanta hinaspa llapallan purun animalkunamanta ñakasqa kanki. Chaymi qasqunpa purinki, hinaspam wañunayki punchawkama allpata mikunki.
15 Qamtawan+ warmitam+ chiqninachisqayki,+ chiqninachisaqtaqmi qampa miraynikitawan+ warmipa miraynintapas.+ Qanmi talonninta kachunki,+ payñataqmi umaykita chamchanqa”,+ nispa.
16 Warmitañataqmi nirqa: “Wiksayuq kaspaykim llumpayta ñakarinki, nanaywantaqmi wachakunkipas. Qusaykimantapas manapunim rakikuytaqa munankichu, paypa kamachisqantaqmi kankipas”, nispa.
17 Adantañataqmi* nirqa: “Warmikita kasukuspa ‘amam mikunkichu’ nisqay+ sachapa rurunta mikusqaykiraykum kay allpa pacha ñakasqa kanqa.+ Wañunayki punchawkamam llumpayta llamkaspayki mikuyta tarinki.+
18 Allpamantam wiñamunqa kichkakuna hinaspa kichkayuq qurakuna*, allpamanta wiñamuqtam mikunki.
19 Allpamanta ruwasqa kasqaykiraykum allpaman kutiykunaykikama llumpayta llamkaspayki mikunaykita tarinki. Allpallamantam kanki,+ allpallamantaqmi kutiykunkipas”, nispa.+
20 Chaymantam Adanqa warminta Evawan* suticharqa llapallan runakuna paymanta mirananrayku.+
21 Chaymantapas Jehova Diosqa Adanpaqwan Evapaqmi ruwapurqa qaramanta hatun pachata chaywan pachakunankupaq.+
22 Hinaspam Jehova Dios nirqa: “Runaqa ñuqanchik hinam allin kaqtapas hinaspa mana allin kaqtapas yachaqña rikurirun.+ Chaynaqa, yanqañataq kawsay qukuq sachapa rurunta+ pallaruspa mikurunman hinaspa wiñaypaq kawsaqña rikurirunman”, nispa.
23 Chaymi Jehova Diosqa Eden huertamanta runata qarqururqa+ huklawpiña llamkaspa tarpunanpaq, payqa allpamanta ruwasqam karqa.+
24 Runata qarquruspanñataqmi Eden huertapa inti qispimunan lawpi querubin angelkunata churarurqa,+ churarqataqmi mana sayaykuspa muyuq linwachkaq espadatapas. Chayna wichqasqam karqa kawsay qukuq sachaman riq ñanqa.
Willakuykuna
^ Utaq: “Wiqawninpa muyuriqninta tapakurqaku”.
^ Utaq: “Rapinta”.
^ “Adan” ninanqa: “Allpa pachapi runa” utaq “runakuna”, ninanmi.
^ Utaq: “Cardoskuna”.
^ “Eva” ninanqa: “Kawsaq”, ninanmi.
