Isaias 64:1-12
64 ¡Mayna allinraq kanman karqa hanaq pachata llikchiruspa uraykamuyniki!
¡Ñawpaqnikipi urqukunata katkatatachiyniki!
2 ¡Yakuta timpuchiq chaki yanta hinach kanman karqa!
¡Chayna kaptinqa chiqnisuqnikikunach sutikita yachanmanku,nacionkunach ñawpaqnikipi katkatatanmanku!
3 Mana rikusqayku kaqkunatam ruwarqanki, mana suyasqayku kaqkunatam ruwarqanki.+
Uraykamuptikim urqukunapas ñawpaqnikipi katkatatarqa.+
4 Huk Diosmantaqa manam uyarikurqachu, haykapipas manam uyarikurqachu.
Qanmanta huk Diostaqa manam pipas rikurqachu,mana amispa suyaqkunapaq imapas ruwaqtaqa manam pipas rikurqachu.+
5 Allin kaqta kusisqa ruwaqkunawan tupaykuqmi rirqanki,+yuyasuqnikikunawan tupaykuqmi rirqanki,ñannikipi puriqkunawan tupaykuqmi rirqanki.
Huchallapi purisqaykuraykum qamqa piñakurqanki.+
Una-unaymi huchallapi purirqaniku, ¿yaqaraqchu yanapaykusqa kaymanku?
6 Llapallaykum millakuypaqña rikuriruniku,allin ruwayniykuqa warmipa yawarpakunanpaq latapa hinam.+
Llapallaykum llaqi* hina chakisaqku,pantasqallaykum wayra hina apawanqaku.
7 Manam pipas kanchu sutikimanta qayakusuqnikiqa,manam pipas kanchu maskasuqnikiqa, manam pipas kanchu hapipakusuqnikiqa.
Qamqa manañam qawariwankikuñachu,+huchaykuraykum qalaypaqña kachkaniku.
8 Jehova Diosllayku, kunanqa qanmi taytayku kanki.+
Ñuqaykuqa mitum kaniku, qamñataqmi ruwawaqniyku kanki,+llapallaykum makikiwan ruwasqaykikuna kaniku.
9 Jehova Dioslláy, amayá llumpaytaqa piñakuychu,+pantasqaykutaqa amayá wiñaypaqqa yuyarayaychu.
Ama hina kaspayá qawarillawayku, llapallaykum runaykikuna kallaniku.
10 Sapaqchasqayki llaqtaykikunam kunanqa chunniqña.
Sion muqum chunnirun,Jerusalenmi pasaypaq mana imayuq qiparun.+
11 Ñawpaq abueloykupa hatunchasunayki chuya wasiykutam* kañarunku,kuyayllapaq wasiykutam kañarunku,+kuyayllapaq kaqkunapas llapallanmi purmarun.
12 Jehova Dioslláy, ¿manachu imatapas ruwanki? ¿Manachu imatapas ninki?
¿Hinallachu saqinki ñakarichiwanankuta?+
