Punta tayta-mamanchikta Jehova Dios unanchaspanmi warmankuta yachachinankupaq kamachirqa (Colosenses 3:20). Tayta-mamakunam warmankuta yachachinanku Jehova Diosta kuyanankupaq hinaspa wiñaspanku allin runakuna kanankupaqpas (2 Timoteo 1:5; 3:15). Chaymantapas, yachanankum sonqonkupi ima kasqanta. Chaypaqqa, ancha allinmi ejemploykichikwan yachachiynikichik. Warmaykichikman Diospa Palabranta yachachinaykichikpaqqa, qamkunapa sonqoykichikpim puntataqa kanan (Salmo 40:8).

BIBLIAM NIN: “Chaylla uyariqyá kaychik, rimaychikpas allinta tanteaspayá” (Santiago 1:19). Qamqa munankichá warmaykikuna qanwan parlarinanta. Chaypaqqa, chaylla uyariqmi kanayki chaynapi hawkalla mana penqakuspa rimanankupaq (Santiago 3:18). Piñakunaykita otaq qaqchanaykita musyaspankuqa, yaqapaschá mana lliwtachu willasunki. Chaymi pacienciakunayki hinaspa kuyasqaykitapas ninayki (Mateo 3:17; 1 Corintios 8:1).

¿IMATAM RUWAWAQ?

• Warmaykikuna qanwan rimayta munaptinqa chaylla uyariy

• Warmaykikunawan sapa kuti rimay, ama suyaychu sasachakuykuna kanantaraqqa

BIBLIAM NIN: “Yachaywanmi ruran yachayniyoq runakunaqa” (Proverbios 13:16). Mozo-sipaskunam wakinpiqa mana musyakuspa otaq yaparispa rimanku, chaymi paykunapa ima niy munasqanta entiendenayki. Bibliam nin: “Manaraq allinta uyarichkaspan rimaq runaqa mana tanteoyoq kasqantam qawachikun”, nispa (Proverbios 18:13). Ama chayllaqa piñakuruychu (Proverbios 19:11).

¿IMATAM RUWAWAQ?

• Warmayki imataña willakuptinpas hawkalla uyariy

• Yuyariy warmallaraq kaspayki ima ancha allin qampaq kasqanta hinaspa imayna sientekusqaykitapas

BIBLIAM NIN: “Churilláy, kasukuyá taytaykipa anyasusqaykitaqa. Churilláy, amayá qonqaychu mamaykipa yachachisusqaykitaqa” (Proverbios 1:8). Jehova Diosqa iskayninkutam tayta-mamakunataqa kamachirqa warmankuta yachachinankupaq. Chaymi iskayninku yachachinanku respetakuq hinaspa kasukuq kanankupaq (Efesios 6:1-3). Warmakunaqa musyankum tayta-mamanku mana ‘huk pensamientolla’ kaptinkuqa (1 Corintios 1:10). Chaymi tanteasqaykichik mana tupaptinqa sapaykichikpi allichanaykichik, manachayqa manam respetasunkichikmanchu.

¿IMATAM RUWAWAQ?

• Warmaykichikta imayna correginaykichikpaq tanteaychik

• Warmaykichikta imayna yachachinaykichikpaq mana chaynallata tanteaspaykichikqa, qawaychik imanasqa mana chaynalla piensasqaykichikta

BIBLIAM NIN: “Imaynam kawsananpaqyá yachachiy warmataqa” (Proverbios 22:6). Warmaykita allinta yachachinaykipaqqa ñawpaqmantaraqmi tanteanayki imayna yachachiyta hinaspa imayna corregiytapas (Salmo 127:4; Proverbios 29:17). Corregiyqa manam maqayllachu, aswanqa imarayku imatapas kamachisqaykita entiendechiymi (Proverbios 28:7). Yachachinaykitaqmi Diospa Palabranta kuyananpaq hinaspa chaypi nisqankuna allinninpaq kasqanpi yuyaymanananpaqpas (Salmo 1:2). Chaymi yanapanqa allin concienciayoq kananpaq (Hebreos 5:14).

¿IMATAM RUWAWAQ?

• Warmaykikunata yanapay Diospi hapipakunankupaq

• Warmaykikunata yanapay Internetpi mana allinkunata hinaspa abusaqkunatapas qepanchanankupaq