Jesusqa pascua fiestata 30 kaq watapi ruwananpaqmi Jerusalenpi kachkarqa. Chaypim Diospa atiyninwan imakunatapas ruwaptin achka runakuna musyakurqaku Jesusqa Diospa churin kasqanmanta. Chayta qawaspanmi judiokunapa huknin kamachiqnin fariseo kaq Nicodemo sutiyuq runa uyarayarqaraq. Hinaspanmi Jesusmanta astawan yachayta munaspan tutallan watukurqa kamachiqmasinkuna ama rikurunanpaq, chaynapi pipas paymanta ama imatapas rimanankupaq.

Jesustam Nicodemo nirqa: “Yachachikuq, yachanikum qamqa yachachinaykipaq Diosmanta hamusqaykita, manamriki kay ruwasqayki milagrokunataqa pipas ruwanmanchu paywan Dios mana kaptinqa”, nispa. Jesusñataqmi nirqa: “Musuqmanta pipas mana nacespanqa manam Diospa munaychakuynintaqa rikunmanchu”, nispa (Juan 3:2, 3).

Nicodemoñataqmi nirqa: “¿Imaynamá pipas nacenman yuyaqña kachkaspanqa? Manamá mamanpa wiksanman kaqllamanta yaykuruspanqa nacenmanchu, ¿aw?”, nispa (Juan 3:4).

Mana chayna kasqanta qawachinanpaqmi Jesusqa nirqa: “Yakumantawan espiritumanta pipas mana nacespanqa, Diospa munaychakuyninmanqa manam yaykunmanchu”, nispa (Juan 3:5). Jesusqa bautizakuspanmi “yakumantawan espiritumanta” nacerqa chuya espiritu payman uraykamuptin. Chaymi hanaq pachamanta Dios nimurqa: “Paymi churiy, paytam kuyani hinaspapas chaskinim”, nispa (Mateo 3:16, 17). Chaynata nispanmi Diosqa qawachirqa churin hanaq pachaman kutinanmanta hinaspa qipakunamanpas kamachiqña kananmanta. 33 kaq watapipas pentecostes fiestapim Diosqa Jesuspa qatiqninkunaman chuya espiritunta uraykachirqa, chayta chaskisqankum qawachirqa hanaq pachaman rinankupaq akllasqa kasqankuta utaq kaqmanta nacechkaq hina kasqankuta (Hechos 2:1-4).

Tukuy chaykunamanta Nicodemo mana sumaqta yachaptinmi Jesusqa imapaq kay pachaman hamusqanmanta yachachinanpaq nirqaraq: “Imaynam Moisespas culebrata chunniqpi huqarirqa, chaynam runapa churinpas huqarisqa kanan. Chaynapi haykam paypi iñiqkuna wiñay kawsayniyuq kanankupaq”, nispa (Juan 3:14, 15).

Una-unay watakuna manaraq Jesus nacechkaptinmi culebrawan kachurachikuq Israel runakunaqa, Moisespa ruwasqan broncemanta culebrata qawananku karqa mana wañurunankupaq (Numeros 21:9). Chaynallataqmi huchamantawan wañuymanta librakuy munaqqa chaynataq wiñay kawsayta haypay munaqkunaqa Jesuspi iñinanku. Chaymantam Jesusqa Jehova Diosmanta rimaspan nirqa: “Diosqa ancha-anchatam runakunata kuyarqa chaymi sapallan churinta qumurqa haykam paypi iñiqqa mana wañuchisqa kanankupaq, aswanqa wiñay kawsayniyuq kanankupaq”, nispa (Juan 3:16). Jesusqa suqta killallaraq Diosmanta willakuchkaspanmi qawachirqaña wiñay kawsayta haypanapaq yanapawaqninchik kasqanmanta.

Jesusqa Nicodemotam nirqaraq: “Diosqariki churintaqa kachamurqa manam runakunata juzgananpaqchu [utaq manam wañuchisqa kanankupaqchu], aswanqa paynintakama runakuna salvakunankupaqmi”, nispa (Juan 3:17).

Nicodemoqa hukkunata manchakuspanmi Jesusta tuta watukurqa, chaymi Jesusqa kikinpa  tukuy ima ruwasqanta achkiwan tupachispan nirqa: “Achkim runakunaman hamurqa, runakunam ichaqa achkimantaqa tutayayta kuyarqaku ruwasqanku mana allin kasqanrayku, chayraykum juzgasqa kanku. Mana allin ruwaq runaqa chiqninmi achkitaqa, hinaspam achkimanqa mana asuykunchu ruwasqankuna mana qawachisqa kananpaq. Allin kaqta ruwaqmi ichaqa achkiman asuykun ruwasqankuna Diospa munayninman hina kasqanta qawachinanpaq”, nispa (Juan 3:19-21).

Chaynata Jesuspa nisqanwanqa, maynatachá Nicodemoqa Jesusmanta tukuy uyarisqanpi yuyaymananan karqa.