Jesuspa ruwasqankunamanta mana allinkunata rimaq escribakunawan fariseokunaqa wiñaypaq nisyu huchatam ruwachkarqaku. Chaymi manaraq hucha rimaq escribakunawan fariseokunaqa tanteananku karqa Jehova Dioswanña kanankupaq utaq satanaswan kanankupaq. Chaymi Jesus nirqa: “Allin sacha kaptikichikqa ruruykichikpas allinmi kanqa, mana allin sachakuna kaptikichikmi ichaqa ruruykichikpas mana allinchu kanqa, sachaqa rurunpim riqsichikun”, nispa (Mateo 12:33).

Jesusqa allin ruruq sacha hinam demoniokunata qarquspanqa allin kaqkunata ruwachkarqa, chaymi escribakunapawan fariseokunapa Jesusmanta rimasqankuqa yanqapuni karqa. Chaynaqa, ¿imatam qawachin yanqa rimasqankuqa? Chay ismusqa sachapa rurun hina kasqankutam. Chaymi Jesusqa qaqchaspan nirqa: “Yaw venenoyuq culebrakunapa mirayninkuna, ¿imaynamá allintaqa rimawaqchik mana allin runakuna kachkaspaykichikqa? Runaqa riman sunqunpi huntallaña kaqkunamantam”, nispa (Mateo 7:16, 17; 12:34).

Arí, sunqunchikpi imapas kasqanman hinam rimanchik, chaymi rimasqanchikman hina juzgasqa kasun. Chayraykum Jesusqa nirqa: “Juicio punchawpim chayraq runakunaqa cuentata qunqaku imapas yanqakuna rimasqankumanta. Chay punchawqa rimasqaykichikman hinam huchayuq utaq mana huchayuqpas kankichik”, nispa (Mateo 12:36, 37).

Escribakunawan fariseokunaqa Jesuspa imakunapas ruwasqanta yachaspankupas nirqakum: “Yachachikuq, ima milagrollatapas qawaykachiwaykuyá”, nispa. Jesuspa imakunapas ruwasqanta manaña kikinku rikuspapas, runakunapa willasqantaqa yacharqakum. Chaymi Jesusqa nirqaraq: “Diosta qipanchaq hinaspa mana allin runakuna, milagrotaraqmi mañakuchkanku, ichaqa manam ima milagrotapas qawanqakuchu aswanqa Diosmanta willakuq Jonaspa kaqllatam”, nispa (Mateo 12:38, 39).

Hinaspam Jesusqa ima niy munasqanmanta kaynataraq nirqa: “Imaynam Jonaspas hatun challwapa wiksanpi karqa kimsa punchaw hinaspa kimsa tuta, chaynam runapa churinpas allpapa sunqunpi kanqa kimsa punchaw hinaspa kimsa tuta”, nispa. Jonasqa hatun challwapa millpusqanmi karqa, chaymanta kawsaqlla lluqsisqanmi kawsarichkanmanpas hina karqa. Chaynata nispanmi Jesusqa wañukuspan kimsa punchawmanta kawsarichisqa kananmanta willakuchkarqa. Ichaqa qipa punchawkunataña  Jesus wañukuptinpas, religionkunapi punta apaqkunaqa hinallam Jesusmanta mana allinkunata rimarqaku (Mateo 27:63-66; 28:12-15). Manam chaynachu karqaku Jonaspa tiemponpi Ninive llaqtayuq runakunaqa. Paykunaqa Jonaspa willakusqanwanmi wanakurqaku, Jesuspa tiemponpi runakunam ichaqa mana wanakurqakuchu. Chaymantapas Salomonpa tiemponpi Saba nacionta kamachiq warmim, Salomonpa yachayninta uyariq karu llaqtamanta rirqa. Chaytapas willakuspanmi Jesus nirqa: “Salomonmantapas aswan riqsisqaraqmi kaypiqa kachkan”, nispa (Mateo 12:40-42).

Jesusqa chay tiempopi mana allin runakunatam tupachirqa manaña demonioyuq kaq huk runawan (Mateo 12:45). Chay runaqa ukunmanta demonio lluqsiruptinpas allin kaqkunata mana ruwaptinmi, kaqmanta chay lluqsiq demonio qanchis aswan mana allin demoniokunawanña payman kutiykururqa. Yaqa chaynam ñawpaq tiempopi Israel runakunapas chuyanchasqa kachkaspankupas Diosmanta willakuqkunata qipancharurqaku, chaynatam Jesustapas Diospa atiyninwan kachkaptinpas qipanchachkarqaku. Chaymi paykunaqa aswan mana allinpiraq kachkarqaku.

Chayna Jesus yachachichkaptinmi mamanwan wawqinkuna chayarurqaku. Chaymi waqtanpi kaqkuna Jesusta nirqaku: “Mamaykiwan wawqikikunam hawapi sayachkanku qanwan tupaykuyta munaspanku”, nispa. Hinaptinmi Jesusqa qatiqninkunata pimantapas aswan kuyasqanta qawachispan nirqa: “Mamaywan wawqiykunaqa Diospa palabranta uyarispa kasukuqkunam”, nispa (Lucas 8:20, 21). Chayta nispanmi qawachirqa ayllunta kuyaspanpas qatiqninkunawan kuska kasqan aswan allin kasqanta. Chaynam ñuqanchikpas iñiqmasinchikkunawanqa huk ayllu hinalla kanchik, chayqa anchatam kallpanchawanchik hukkuna imataña rimaptinkupas.