Jesusta Getsemani huertapi hapiruptinkum apostolninkunaqa mancharikuspa lluptikurqaku. Pedrowan Jesuspa ‘huknin qatiqninmi’ ichaqa lluptisqankumanta kutirimurqaku. Chay huknin qatiqninqa yaqapaschá apostol Juan karqa (Juan 18:15; 19:35; 21:24). Paykunaqa Anaspa wasinman Jesusta pusaptinkuchá qipanta qatirqaku. Sacerdotekunapa kamachiqnin Caifaspa wasinman Jesusta pusanankupaq Anas kamachiptinpas karullantam qatirqaku. Paykunaqa llakisqachá hinaspa mancharisqachá kachkarqaku Jesusmanta chaynataq kikinkumantapas.

Juanqa sacerdotekunata kamachiqpa riqsisqanmi karqa, chaymi Caifaspa wasinpa pationman mana sasachakuspallan yaykururqa. Pedrom ichaqa hawallapi qiparurqa, chaymi Juanqa kutirispan punkuta cuidaq warmita nirqa Pedropas yaykunanpaq. Hinaptinmi chay warmiqa Pedrotapas yaykuchirqa.

Chay patiopi kaq runakunañataqmi chiriptin qunikunankupaq ninata ratachirqaku. Pedropas qunikunanpaqmi paykunawan kuska tiyaykurqa, hinaspam suyarqa Jesusta juzgasqanku imapi tukunanta (Mateo 26:58). Pedrota yaykuchiq warmiqa achkipa kasqanpim Pedrota riqsiruspan nirqa: “Qampasriki wak runapa huknin qatiqninmi kanki, ¿aw?”, nispan (Juan 18:17). Hukkunapas Pedrota riqsiruspankum nirqaku Jesuspa puriqmasin kasqanmanta (Mateo 26:69, 71-73; Marcos 14:70).

Hinaptinmi Pedroqa mancharikuspan hukkunapas mana riqsirunanpaq punku lawman rirqa. Jesuspa puriqmasin kasqanta negakuspanmi nirqa: “¡Manam riqsinichu nitaq yachanichu imamanta rimapayawasqaykita!”, nispa (Marcos 14:67, 68). Hinaspapas juraspanraqmi nirqa: “Llullakuptiyqa Diosyá castigawachun, chay runataqa manam riqsinichu”, nispa (Mateo 26:74).

Chaykamaqa hinallam Jesustaqa juzgachkarqaku, chaytaqa yaqapaschá ruwarqaku Caifaspa wasinpa altosninpi. Pedrowan chaypi kaqkunaqa rikurqakuchá Jesuspa contranpi rimanankupaq yaykuqkunata chaynataq lluqsimuqkunatapas.

Galilea law runakunapa rimasqan usuta Pedro rimasqanraykum chaypi kaqkunaqa musyarurqaku llullakusqanta. Chaypiqa kachkarqataqmi Malcopa ayllunpas, chay Malcopa rinrintam Pedroqa Getsemani huertapi qurururqa. Malcopa ayllunpas Pedrotam nirqa: “Paywanmi huertapi ñuqa rikurqayki, ¿icha manachu?”, nispa. Pedrom ichaqa kaqmanta negakurqa, chaykamaqa kimsa kutikamañam negakurqa, hinaptinmi Jesuspa nisqanman hina chaylla gallo waqarurqa (Juan 13:38; 18:26, 27).

Pedro kimsa kutikamaña negaptinqa Jesusqa altospim kachkarqa, chaymantaqa rikurqachá patiopi kaqkunataqa. Chaymantam Jesusqa Pedrota qawariykurqa. Chaywanqa Pedroqa maynatachá hukmanyarurqa. Payqa yuyarirurqam cenachkaptinku Jesuspa ima nisqanta. ¡Mayna llakisqachá tarikurqa! ¡Maynatachá negarusqanmantaqa pesapakurqa! Chaymi chaymanta lluqsiruspan aminankama waqakurqa (Lucas 22:61, 62).

Pedroqa allin iñiyniyuq chaynataq Diosman sunqu kasqanpaq hapikuspanpas Jesustam negarurqa. Jesustaqa rimasqankunata muyuchispam juzgachkarqaku huchasapa mana allin runata hina. Pedroqa yacharqam Jesusqa mana huchayuq kasqanta chaynataq ‘rimasqankuna wiñay kawsay qukuq’ kasqantapas,  chaymi payqa atinman karqa Jesuspa favorninpi rimayta, ichaqa manam chaytachu ruwarqa, aswanqa negarurqam (Juan 6:68).

¿Imatam chaymanta yachachwan? Allin iñiyniyuq hinaspa Diosman sunqu kaspapas qunqayllamantam mana allinman wichiykuchwan ima sasachakuypipas utaq ima tentacionpipas tarikuspaqa. Chaymi manaraq imapas kachkaptin allinta yuyaymanananchik imata ruwanamanta. Chaynaqa, yuyaymanasunyá Pedrota imam pasasqanpi.