Roma nacionta kamachiq Augustom runakunata kamachirqa nacesqanku llaqtapi padronachikunankupaq. Joseyqa Belen llaqtachapim nacerqa, chaymi Mariawan kuska rirqa Belenpi padronachikunanpaq. Belenqa Jerusalenpa hichpanpim karqa.

Belenmanqa achkallaña runakunam padronachikuq rirqaku. Chaymi Joseywan Mariaqa maypi samapakunankupaq mana tarisqankurayku uywakunapa sayananmanña yaykururqaku. Chaypim Mariaqa Jesusta unqukurqa, hinaspam pañalkunawan wankuykuspan uywakunapa mikunan artesaman siriykachirqa.

Chay Belen llaqtapi Jesus nacenanmantam Jehova Diosqa ña willachirqaña (Miqueas 5:2). Diosmi kamachiq Augustowan runakunata qayachirqa nacesqanku llaqtaman rispa padronachikunankupaq. Chaynapim Jesusqa Belenpi nacerqa abuelon kamachiq David hina.

Jesuspa nacesqan tutaqa michiqkunam chakrapi kachkarqaku, hinaptinmi Diospa kanchaynin muyuriqninkupi rikuriykurqa. Paykunamanqa rikuriykurqataqmi huk angelpas, hinaspam nirqa: “Ama manchakuychikchu, llapallan runakunapa kusikunanpaq sumaq willakuytam willasqaykichik, kunanmi Davidpa llaqtanpi nacerun salvasuqnikichik, payqariki señorninchik Cristom. Sutillam wawachata tarinkichik pañalwan wankusqata uywakunaman qarana artesapi siriykachisqata”, nispa. Chayllataqmi achkallaña angelkunapas rikuriykuspa nirqaku: “Diosyá hanaq pachapi hatunchasqa kachun, kay pachapipas Diospa kuyapayasqan runakunapaqyá hawkayay kachun”, nispanku (Lucas 2:10-14).

Chaymantam angelkuna chinkaruptin michiqkunaqa ninakurqaku: “Hakuchikpuni Belenman hinaspa qawamusunchik Jehova Diospa niwasqanchikman hina chaypi ima pasasqanta”, nispa (Lucas 2:15). Hinaspam chaylla rispanku angelpa willakusqanman hina wawachataqa artesapi tarirurqaku. Tukuy chaykunamanta michiqkuna willakuptinkum uyariqninkunaqa qawanakurqakuraq. Mariañataqmi sunqullanpi waqaycharqa, hinaspam yuyaymanarqa ima ninan kasqanpi.

Kunanqa runakunam ninku Jesusqa 25 diciembre killapi nacesqanta. Ichaqa diciembre killapiqa llumpa-llumpaytam Belen llaqtapiqa chirikuq hinaspa parakuq, wakinpiqa ritiqraqmi. Chaymi michiqkunaqa mana chakrapiqa puñuqkuchu. Manataqmi kamachiq Augustoqa chayna tiempopichu runakuna padronachikuq rinankupaqqa kamachinman karqa, mana chayqa contranpi hatariyta munaqkunachiki mana kasukunmankuchu karqa. Chayraykum nichwan Jesusqa usyay tiempopiraq nacesqanta, chayqa yaqachá octubre killa kanman karqa.