PAWAKACHAQ arañapa ñawinkunaqa allintapunim yanapan maykama pawananta tanteananpaq chaynapi imapas munasqanta hapirunanpaq. ¿Imaynataq chay ñawinqa?

Kaypi yuyaymanay: Pawakachaq arañaqa hatun kaq ñawinkunapa imayna kasqantam allinta servichikun. Chay sapa ñawinpa ukunpim kan achka capachakuna. Chay capachakunamanta iskaynin verde achkita qawaspanpas, hukninmi chuyay-chuyayta qawan huknin capachañataqmi antata. Anta-antata astawan qawaptinqa chay rikusqanmi aswan hichpallapiña ñawinmanta tarikun. Chayna qawasqanmi arañata yanapan rikusqanta kamas hapirunanpaq maykama pawananpaq.

Yachayniyoq runakunam chay pawakachaq arañapa chayna kasqanta qatipakuyta munanku alli-allin fotota horqoq camarata ruwanankupaq hinaspa imapas maypi kasqanta yachaq robotkunata ruwanankupaqpas. Internetpi ScienceNOW nisqanman hinaqa, pawakachaq arañaqa taksachalla (0.5 cm) hinaspa chuspipa ñutqonmanta aswan uchuy ñutqochayoq kaspanpas, tukuy imata qawan hinaspapas allintam tantean pawananpaq, chayna kasqanqa admirakunapaqmi.

¿Imatam piensanki? ¿Kikillanchu rikurirqa icha unanchasqachu karqa pawakachaq arañapa anta-anta qawasqanqa?