Warmaykiqa yachanmi manapas chunka hora tutata chayamunantaqa, ichaqa chisi tutam chayamurqa yaqa chawpi tutataña. Chaymantapas yachankum isqon horata celularninku apaganankuta, ichaqa kay semanallapim iskay kutikamaña warmaykita tarirqanki chawpi tuta pasaytaña mensajekuna apachichkaqta.

Warmaykikunaqa manam kasukunkuchu. Ichaqa puntatam yachanayki imanasqa mana kasukusqankuta. Icha imapas pasasqanraykulla kamachisqaykitaqa mana ruwarqakuchu.

Mana clarota niptiki. Wakin mozo-sipaskunam tayta-mamankuta mana kasukunkuchu pruebanankuraykulla. Piensarisun kaypi, tayta-mamakunam ninman kamachisqankuta mana kasukuptinkuqa ima castigotapas chaskinankumanta, mozo-sipasñataqmi mana kasukunmanchu tayta-mamakunapa cumplinanta otaq mana cumplinanta qawananraykulla. ¿Chaywanqa nichkanchikchu manaña haykapipas kasukunanmanta? Manam chaynachu. Mozo-sipaskunaqa wakinpim mana kasukunkuchu kamachikuykuna mana sutilla kaptin otaq nisqankuta tayta-mamakuna mana cumpliptinku.

Llumpayta controlaptiki. Wakin tayta-mamakunam llumpayta controlanku achka kamachikuykunata warmankuman qospanku. Warmanku mana kasukuptinqa piñakuspankum astawanraq achka kamachikuykunata qonku, chaykunaqa astawanraqmi sasachan. Tayta-mamakunamantawan mozo-sipaskunamanta rimaq huk librom nin: “Warmankuta astawan controlaptinkum warmakunaqa astawan mana kasukunkuchu”, nispa (Parent/Teen Breakthrough). Mana puriy munaq llamata waskawan chutapayaptikiqa astawanmi tiyakuykun chaynapim ñakarichinki, chaynam kanman warmaykita astawan controlaptikiqa.

Warmakunata castigaspaqa ñakarichinchikmi, chayqa manam allinchu. Corregiyñataqmi warmakunaman sumaqta willay hinaspa yachachiy, chay ruwayqa ancha allinmi. ¿Imaynatam mozo-sipasyaq warmaykita yachachiwaq kamachisqaykita kasukunankupaq?

Clarota rimay. Mozo-sipasyaq warmaykikunaqa allintam entiendenanku mana kasukuptinku ima pasananmanta. (Imatam Biblia yachachin: Galatas 6:7.)

Kaytam ruwawaq: Qellqay ima kamachikuykuna nisqaykimanta hinaspa tapukuy sichu llumpay achka, pisilla otaq wakinkuna manaña yanapasqanmanta. Warmayki cumplisqanman hina ichapas wakintaqa cambiawaq.

Manataqmi kamachikuqllañaqa kanaykichu. Warmaykiqa piensanmanmi pasaq semanata mana imanasqaykirayku kay kutipipas mana kasukuptin, mana imananaykimanta. (Imatam Biblia yachachin: Mateo 5:37.)

Kaytam ruwawaq: Castigotaqa churanayki imapipas mana kasukusqanman hinam. Warmayki imay hora chayamunanpaq nisqaykita mana kasukuptinqa, niwaqmi aswan temprano chayamunanpaq, chaymi castigon kanman.

Entiendeqmi kanayki. Chayna kasqaykitam warmaykiman qawachinayki kasukuptin astawan paypi confiaspayki. (Imatam Biblia yachachin: Filipenses 4:5.)

Kaytam ruwawaq: Warmaykiwan tiyaykuspa rimaychik kamachikuykunamanta. Paypas rimarinmanmi mana kasukuptin ima pasananmanta. Mozo-sipasyaqkunaqa astawanmi kasukunku kamachikuykunatawan castigo chaskinankumanta paykunapas rimarispanku.

Allin runa kananpaq yanapay. Kamachikuykunata warmayki kasukunallanpichuqaya piensanaykiqa, astawanmi tanteoyoq kananpaq yanapanayki. (Qaway “Tanteoyoq allin runa kananpaq yanapay” nisqanta.) (Imatam Biblia yachachin: 1 Pedro 3:16.)

Kaytam ruwawaq: Yanapakuyta Bibliapi maskay, chaypim tarikun kayna niq consejokuna. ‘Pisi experienciayoq runakunamanmi’ yachayta qon, hinaspapas mozo-sipaskunatam yanapan ‘entiendespa yachaywan allinkunata akllanankupaq’ (Proverbios 1:1-4).