IMATAM BIBLIA NIN
Jesus
¿Jesusqa Dioschu?
“Manam pipas Diostaqa rikurqachu haykapipas.” (Juan 1:18)
¿IMATAM RUNAKUNA NINKU?
Wakin runakunam piensanku Jesusqa Diospa Churin kasqanmanta, Diosñataq Taytan kasqanmanta. Wakinmi ichaqa mana chaynatachu piensanku.
¿IMATAM BIBLIA NIN?
Jesusqa manam tukuy atiyniyoq Dioschu. Payqa Diospa kamachisqanmi. Jesusmi nin: ‘Taytaqa ñoqamantaqa mayormi’, nispa (Juan 14:28, Chuya Qellqa edición revisada 2012). Bibliam nin: “Manam pipas Diostaqa rikurqachu haykapipas”, nispa (Juan 1:18). Jesustaqa achka runakunam rikurqaku, Dios kaptinqa manachá pipas rikunmanchu karqa.
Apostolkunapa tiempopi kaq cristianokunapas manam nirqakuchu Jesus Dios kasqanmantaqa. Apostol Juanmi nirqa: “Kaykunataqa qellqarqani Jesusqa Diospa Churin Cristo kasqan creenaykichikpaqmi, creespaykichikñataq payrayku wiñay kawsayniyoq kanaykichikpaq”, nispa (Juan 20:31). *
¿Imayna tiempopim Jesusqa nacerqa?
‘Michiqkunam ovejankuta tuta cuidarqaku.’ (Lucas 2:8)
¿IMATAM RUNAKUNA NINKU?
Wakin runakunaqa Jesuspa nacesqantam diciembre killapa 25 punchawninpi yuyarinku. Wakinñataq enero killapa qallariynin punchawkunapi.
¿IMATAM BIBLIA NIN?
Bibliaqa manam willanchu imay punchawpi Jesus nacesqanmantaqa. Ichaqa willakunmi imayna tiempopi nacesqanmanta, ninmi: ‘Belen llaqtapa hichpan purunpi michiqkuna ovejankuta tuta cuidasqankumanta’, nispa (Lucas 2:8). Chay michiqkunaqa manachá purun sitiokunapiqa cuidanmankuchu karqa diciembre hinaspa enero killakunapiqa. ¿Imanasqa?
Chay killakunapiqa Jesuspa nacesqan lawpiqa llumpaytam chirin. Bibliam willakun chay killakunapiqa llumpay chiri para ‘kasqankurayku katkatatasqankumanta’ (Esdras 10:9, 13; Jeremias 36:22). Chayna tiempopiqa manam allinchu karqa ‘purun’ sitiokunapi michiyqa.
¿Jesusqa kawsarimurqachu?
‘Dios Taytam kawsarichimurqa Jesusta.’ (Hechos 3:15)
¿IMATAM RUNAKUNA NINKU?
Wakinqa manam creenkuchu kawsariypiqa nitaq Jesuspa kawsarisqanpipas.
¿IMATAM BIBLIA NIN?
Jesusmi qatiqninkunaman willakurqa ‘ñakarichinankumanta [chaynataq] wañurachiptinku kimsa punchawmanta kawsarimunanmantapas’ (Mateo 16:21). Payqa kawsariruspanmi rikuriykurqa ‘pichqa pachak masnin huñunasqa wawqe-paninkunaman’ (1 Corintios 15:6). Paykunaqa manam iskayrayarqakuchu Jesucristo kawsarimusqanmantaqa, chaypi creesqankuraykum wañuytapas mana manchakurqakuchu (Hechos 7:51-60; 12:1, 2).
¿IMANASQATAQ ALLINTA YACHANANCHIK?
Jesucristo wañuspa kawsarimusqanwanmi runakunaqa kay Pacha sumaqta huertayaptin wiñaypaq kawsakuypi suyakuyniyoq kanchik, chaytam Bibliaqa yachachin (Salmo 37:11, 29; Apocalipsis 21:3, 4). Jesucristo chaynataq Tukuy Atiyniyoq Jehova Dios kuyawasqanchikraykum wiñayta kawsanapaq suyakuyniyoq kanchik (Juan 3:16; Romanos 6:23).
^ par. 7 ¿Diosqa casarakurqachu churiyoq kananpaq? Manam, Jesustam sutichanku “Diospa Churin” nispa, tukuy imamanta puntataraq payta unanchasqanrayku, chaynataq Diospa sumaq kayninkuna Jesuspi kasqanrayku.
Kaykunatapas leeykuy
BIBLIAPA ANCHA ALLIN YACHACHIKUYNINKUNA
¿Imanasqataq Jesusqa wañukurqa?
Bibliapiqa Jesuspa wañukusqanmantam achka kutita riman. Wañukusqanqa, ¿imamantapas yanapawachwanchu?
BIBLIAMANTA TAPUKUYKUNA
¿Imaynataq Jesuspa rikchayninqa karqa?
Bibliapi Jesuspa imakuna ruwasqanmanta willawasqanchikwanmi yachachwan Jesus imayna kasqanta.
