Chayllaraq reqsinakuptikichikqa imapas tanteasqaykichikmi tupaq, casarakusqaykichik qepatam ichaqa mana chaynañachu. Ñawpaqtaqa anchatam kuyanakurqankichik, kunanmi ichaqa cadenawan watasqa hina kawsankichik.

Ama llakikuychu, casado vidaykitaqa salvawaqmi. Ichaqa puntata yachasunchik imanasqa chayna tarikusqaykichikmanta.

Sasachakuy qallariptin. Pisi-pisimantam casado vidaykipi sasachasunkiman llamkayniki, warmakuna, suegroykikuna hinaspa qollqe mana kasqan otaq familiaykipi pipas llumpayta onqoruptin.

Mana pampachanakuyta munaptinku. Reqsinakusqaykichik tiempopi imapas pantasqaykichiktaqa chayllam pampachanakuq kankichik. Casarakusqaykichik qepatam ichaqa musyakunkichik rimasqaykichikpi, qollqeta servichikuypi, sasachakuykuna allichaypi hinaspa imapipas mana tupasqaykichikta. Ñawpaqta mana kaqpaqpas hapisqaykichik sasachakuyqa, kunanqa hatu-hatunpim rikurirun.

Mana rimanakuptinku. Sasachakuyta mana allichaptikichik, mana yanapanakuptikichik hinaspa mana rimaptikichikmi huk kaqnikichik karunchakurunman otaq llumpayta hukwanpas parlayta qallaykunman.

Munasqanku mana ruwakuptin. Wakinkuqa casarakunku ima ruwaypipas tupasqankuta piensaspankum. Chayna piensasqanku allin kaptinpas, wakinpiqa manam chaynachu. Sasachakuykuna kaptinmi chayna piensasqankuqa tukurun, chaymi casarakusqankumanta ñakakunku.

Allin kayninkunapi reparay. Señoraykipa otaq qosaykipa kimsa allin kayninkunata qellqay casarakusqayki fotopi otaq celularnikipipas hinaspa sapa kuti leey. Chay ruwasqaykichikmi yuyarichisunkichik imanasqa casarakusqaykichikmanta. Allin kaynikichikkunapi astawan reparasqaykichikmi yanapasunkichik hawkalla hinaspa kusisqa kawsakunaykichikpaq. (Imatam Biblia yachachin: Romanos 14:19.)

Kuska imatapas ruwaychik. Chayllaraq reqsinakuspaykichikqa kuskaykichikmi imatapas ruwaq kankichik. Kusikunapaq hinaspa mosoq chay ruwaykuna kasqanrayku. ¿Kunanpas chayta ruwawaqchikchu? Qallariypi reqsinakusqankichikman hina kuskaykichik imatapas ruwanaykichikpaq tiempochakuychik. Chayta ruwaspaykichikmi astawan kuyanakunkichik hinaspa ima sasachakuykunapas kaptin allichayta atinkichik. (Imatam Biblia yachachin: Proverbios 5:18.)

Imayna sientekusqaykichikmanta rimariychik. Huk kaqnikichik imapas rimasqanwan otaq ruwasqanwan sientirachisuptikiqa, ¿pampachaykuwaqchu? Mana chayna kaptinqa, ama saqeychikchu rimanakuyta. Imayna sientekusqaykichikta hawkalla hinaspa chaylla rimariychik, atikuptinqa hina chay punchawlla. (Imatam Biblia yachachin: Efesios 4:26.)

Mana allintaqa ama qosaykimanta otaq señoraykimantaqa piensaychu. Manamá mayqannikichikpas llullaykichiktachu sientichinakunkichikqa. Imawanpas sientinarachikuspaykichikqa pampachanakuychik hinaspa rimaychik manaña yapapi chayna pasakunanpaq. Bibliapa kayna nisqanta kasukuychik: “Aswanqa sumaq sonqo kaspayá kuyapayanakuychik [hinaspa] pampachanakuychik”, niqta (Efesios 4:32).

Imam kaqta piensay. Bibliaqa ninmi casado kaqkuna sasachakuyniyoq kanankumanta (1 Corintios 7:28). Chaynaqa, imapas sasachakuy kaptinqa ama piensaychu casarakusqayki mana allin kasqantaqa. Kuskaykichik sasachakuynikichikta allichaychik hinaspa ‘aguantanakuspa pampachanakuychik’ (Colosenses 3:13).