Ichapas munanki lliw mana allin costumbreykikunata huk punchawllapi saqiruspa allin costumbreyuqkunaña kayta. Ninkipaschá: “Kay punchawkunallam saqisaq cigarro pitayta, qacha rimaykunata hinaspa llumpay tuta puñuytapas. Kay punchawkunallataqmi kallpaq lluqsisaq, allintaña mikusaq, abueloykunatapas watusaq”, nispa. Ichaqa chaynata tanteaspaykiqa manam atinkichu mayqillan ruwaytapas.

Yachayniyuq runaqa cuentatam qukun imatapas ruwayta mana lliwta atirunanmanta. Chaymi riqsikun lliw costumbrenkunata chaylla mana cambiaruy atirunanmanta.

Allillamanta costumbrekikunata cambianaykipaq kallpanchakuy. Ichapas qatiqninpi hina ruwayniki yanapasunkiman.

1. Papelpi qillqay ima costumbrekunata saqiy munasqaykita hinaspa imakuna ruway munasqaykita. Umaykiman lliw chayamusqanta qillqay.

2. Mayqin costumbrekikunata puntata cambiay munasqaykita señalay.

3. Chay señalasqaykimanta hukllanta akllay, hinaspa chayta cambianaykipaq kallpanchakuy. Hinaspaña qatiqninkunataqa ruway.

Mana allin costumbreta saqispa allin costumbreyuqña kanaykipaqqa kaytam ruwawaq. Sichum munachkanki unay tiempo television qawayniki saqiyta, munachkankitaq aylluykiwan aswan rimaytapas, hinaspaqa kaytam ruwawaq: Llamkaynikimanta chayaykamuspa televisionta ratachinaykimantaqa aylluykita utaq amistadnikita qayay imayna kasqanta yachanaykipaq.