Warmaykichikwan rimaspaykichikqa yachankichikmi ima piensasqankuta hinaspa imayna tarikusqankuta.

Tayta mamakunaqa sasachakunkum warmanku musu-sipasyaruptin paykunawan rimanankupaq. Huk libropipas ninmi: “Tayta-mamakunaqa warmanku taksallaraq kaptinkuqa yachankum imayna tarikusqankuta, musu-sipasyaruptinkum ichaqa sasachakunku paykunawan rimanankupaq”, nispa. Manamá piensananchikchu “musu-sipasyaruspankuqa manañam rimapayananchikta munankuñachu” nispanchikqa, musu-sipasyaruptinkupas hinallam rimapayananchik.

Warmaykichik rimariyta munaptinqa uyariykuychik tutakamaña rimanaykichik kaptinpas.

Lisam nin: “Warmayqa tukuy punchaw kuska kachkaptiykupas manam imatapas niwanchu, aswanqa imatapas ruwachkaptiyñam rimayta munan, chaymi ‘kunanñataqchu rimayta munanki’ nispay niruyta munani, ichaqa chayna ninaymantaqa piensarispaymi nini ‘imaynamá warmay rimariyta munachkaptinqa manaqa uyarisaqchu’”, nispay.

Herbertpas ninmi: “Ñuqaqa tutaykamuptinqa puñukuqñam rini, churiykuna parlayta munaptinkum ichaqa chawpi tuta pasaykamapas parlaniku”, nispa.

BIBLIAPIM NIN: “Sapakamayá maskachun wakinkunapa allinninta, amayá kikillankupa allinnintachu”, nispa (1 Corintios 10:24).

Warmaykichikta uyariychik. Warmankuna uyariy sasa kasqanta riqsikuspam huk tayta nin: “Wakinpim churiykuna rimapayawachkaptinraq ima llakipas umayman chayaramun, chaymi churiykunawanqa mana sumaqtachu parlaniku”, nispan.

Qampas chayna tarikuspaykiqa kallpanchakuy churikipa nisqanta uyarinaykipaq, chaypaqqa apagawaqmi televisionnikita, celularnikitapas huklawchapim saqiykuwaq. Chayta ruwaptikiqa churikiqa uyariy munasqaykimantam cuentata qukunqa.

Marandam nin: “Warmanchikkuna uyariyqa ancha allinmi, mana uyariptinchikqa sasachakuypi tarikuspankupas manam willawasunchu, aswanqa amistadninkunamanñam willakunqaku”, nispa.

Antoniom nin: “Manam piñakunanchikchu warmanchik imatapas llutanpi rimayta qallaykuptinqa”, nispa.

BIBLIAPIM NIN: “Imayna uyarisqaykichikpiyá piensaychik”, nispa (Lucas 8:18).

Warmaykichikwanyá maypipas rimariychik. Warmakunaqa imayna tarikusqankumanta willawananchikpaq niptinchikqa, manapaschá willawasunchu, chaymi qunqayllamanta paykunawanqa maypipas rimachwan.

Nicolmi nin: “Ñuqaqa kallpanchakunim may risqaypipas warmaywan rimanaypaq, chayqa yanapawanmi warmay imayna tarikusqanta yachanaypaq”, nispa.

Mikusqanchik horapipas parlachwanmi.

Rubenmi nin: “Cenasqayku horapim rimaniku chay punchaw imakuna pasawasqankumanta, chayna rimasqaykum yanapawanku ima sasachakuy kaptinpas yanapanakunaykupaq”, nispa.

BIBLIAPIM NIN: “Qamkunaqa kaychik chaylla uyariqyá, rimaychikpas allinta tantiaspayá”, nispa (Santiago 1:19).