Mana rimaspalla rikurimuq Paseo por la calle Market (A Trip Down Market Street), nisqa sutiyoq peliculam qawachin 1900 watakunapa qallariyninpi San Francisco (Estados Unidos) llaqtapi runakuna imayna kawsasqankumanta. Chayta filmanankupaqmi runakunapa huntallaña purinan Market sutiyoq callepi tren kaqllaña carropa puntanpi camarata hinarurqaku. Chay pelicula ruwasqankupim qawakun carretakuna, carrokuna, periodicokunata rantikuqkuna chaynataq maymanpas riq runakuna.

Chay peliculaqa filmakurqa 1906 watapa abril killanpim. Ichaqa filmayta tukuruptillankum ancha llakikunapaq chay killapa 18 punchawninpi hatun terremoto karurqa, hinaspapas tukuy imakunam ruparurqa. Chay pasakusqanpiqa waranqantin runakunam wañururqaku hinaspapas yaqallam chay lawpi kaq llaqta chinkarurqa. Chay peliculapi wakin rikukuq runakunapaqqa iskay-kimsa punchawllañam wañukunankupaq faltachkarqa. Chay peliculata ruwaqkunapa miraynin Scott Miles sutiyoq runam kaynata nin: “Ancha llakikunapaqmi wañuypi tukunankumanta mana yachakuq chay runakunata qawayqa”, nispa.

Ñoqanchikpas runakunamantam anchata llakikunchik. Paykunaqa imapas ruwayninkupim afanasqallaña kachkanku, manam yachankuchu Diospa piñakuynin punchaw hichpallapiña kasqanta. Manam pipas willawanchikchu terremoto chayamunanmantaqa, Diospa piñakuynin punchaw chayamunanmantam ichaqa runakunaman willakuyta atinchik. Sapa semanam Diosmanta wasin-wasin willakunapaq tiempochakunchik. Ichaqa, ¿kallpanchakuchwanchu astawan willakunapaq?

Jesusqa piwanpas tupasqanwanmi Diosmanta rimaq: impuesto cobraq runawanpas chaynataq chawpi punchawta yaku horqoq hamuq warmiwanpas (Luc. 19:1-5; Juan 4:5-10, 21-24). Samarinanpaqña tiempota horqochkaspanpas runakuna hamuptinqa kusikuywanmi yachaykachiq. Payqa runakunata llakipayaspanmi tukuy atisqanta ruwarqa astawan willakunanpaq (Mar. 6:30-34). ¿Imaynatam achka cristianokuna Diosmanta willakunanpaq Jesuspa listolla kasqanta qatipakunku?

Melika sutiyoq cristianam suma-sumaq waqaychasqa hatun wasipi yachan. Paypa waqtanpi yachaqkunaqa yaqa llapankum huklaw nacionniyoq estudiaqkuna  kanku. Chay hatun wasipi kaq listapiqa manam paykunapa sutinkuwan telefononkupa numeronqa rikurinchu. Melikaqa kallpanchakunmi pachakunata churananku lawpi otaq ascensorpi predicananpaq. Paymi nin: “Diosmanta willakunaypaq sitiota hinam qawani”, nispa. Achka rimaykunapi qellqanchikkunata apaspanmi achka tratadokunatawan revistakunata chaypi yachaqkunaman qon. Chaymantapas, jw.org nisqa direcciontam Internetpi qawachin. Melikaqa achka runakunatam Bibliamanta yachachiyta qallaykun.

Soniapas Diosmanta willakunanpaqmi anchata kallpanchakun. Payqa doctorkunapa atiendenan wasipim llamkan, hinaspanmi tantearurqa llamkaqmasinkunaman Diosmanta willananpaq. Puntataqa, sapakama imayna sasachakuyniyoq kasqankuta yachananpaqmi tiempochakurqa. Chaymantañataqmi chawpi punchaw mikuy horata sapakamata maskaq Diosmanta imallatapas willarinanpaq. Chaynata ruwasqanraykum Soniaqa iskay llamkaqmasinkunaman Bibliamanta yachachiyta qallaykurqa. Kunanñataqmi tantearun chaypi suyaq runakunaman samasqan horapi Diosmanta willananpaq.

1906 watapi pasakuq terremotomanta kawsaq runam nin: “Chay pasakusqanmi may llaqtapi pasakusqanmantapas manchakuypaq karqa”, nispa. Ichaqa tukuy chaykunamantapas astawanqa kanqa ‘Dios mana reqsiqkunata’ chinkachinanpaq Diospa piñakuyninmi (2 Tes. 1:8). Jehova Diosqa anchatam munachkan runakuna payman kutirikunankuta hinaspa Testigonkunapa willakusqankuta uyarinankutapas (2 Ped. 3:9; Apoc. 14:6, 7).

Ancha favorecesqam kanchik sasallaña tiempopi kawsasqanchikmanta runakunaman willakunapaq. Paykunaqa munasqankuman hina kawsasqankutam saqenanku hinaspapas Jehova Diostam maskananku (Sof. 2:2, 3). ¿Tukuytachu ruwanchik ima ruwayninchik kaptinpas llamkaqmasinchikkunaman, vecinonchikkunaman hinaspa huk runakunaman Diosmanta willakunapaq? ¿Kallpanchakusunchu runamasinchikkunaman astawan willakunapaq?