Ayllunchik wañukuptin ima ruwananchikmanta rimaspankum wakin runakuna ninku: “Manam waqanachu, aswanraqmi hukkunapa qayllanpiqa mana waqanachu”, nispa. Wakinkuñataqmi ninku aminakama waqanapaq. Chayna nisqankuqa manamá yanapawanchikchu. Bibliapa yachachisqanmi ichaqa allinta yanapawanchik, hinaspapas yachaysapa runakunapa nisqankuwanmi tupan.

Wakin nacionkunapiqa pinqankum qari waqaptinqa. Ichaqa ¿pinqakunapaqchu kanman runapa qayllanpi waqayninchikqa? Yachayniyuq runakunam ninku waqayqa allin kasqanmanta. Chaymi wañukuq ayllunchikmanta waqayninchikqa allinninchikpaq kanman. Qaritukuspa mana waqayninchikñataqmi mana allinninchikpaq kanman. Bibliaqa manam ninchu waqayqa mana allin kasqanmantaqa, manataqmi ninchu qari mana waqananmantaqa. Jesuspas amistadnin Lazaro wañukuptinmi runakunapa qayllanpi mana pinqakuspa waqarqa, kawsarichinanpaq atiyniyuq kachkaspanpas (Juan 11:33-35).

Yaqa llapanpim wañukuqpa ayllunkunaqa llakipi kasqankurayku piñasqallaña tarikunku, aswanraqmi ayllunku qunqayllamanta wañukuptinqa. Llakiyuqqa piñasqam tarikunman tukuymanta. Riqsisqan runa mana allinta rimaykusqanrayku utaq mana rimananta rimaruptin. Chayna pasasqanmantam Sudáfrica nacionmanta Mike sutiyuq runa willakun: “14 wataypi kachkaptiymi taytay wañukurqa. Pampakunanpaq kachkaptinmi anglicano iglesiapi kaq pastor nirqa, allin runakunataqa tayta Dios hanaq pachaman pusakusqanta. * Chayna rimasqanmi llumpayta piñarachiwarqa, ñuqaykuqa taytaywan kuska kawsakuytam munarqaniku. Ñam 60 wata masninña taytaypa wañukusqanmantaqa pasarun ichaqa hinallaraqmi sunquy nanawan chay pastorpa rimasqanta yuyariptiy”, nispa.

Qunqayllamanta ayllunchik wañukuptinqa ichapas ñakakuspa kaynata nichwan: “Sichum kayta utaq wakta ruwayman karqa hinaptinqa manachiki aylluyqa wañunmanchu karqa”, nispa. Aswanraqmi ñakakuchwan kawsakuchkaptinraq wañukuqwan piñanakuruspaqa.

¿Imatam ruwachwan imamantapas chaynata ñakakuspanchikqa? Mana pinqakuspam llakinchikmanta willakunanchik allin uyariwaqninchik amistadninchikman, payqa yanapaykuwasunmi. Bibliam nin: ‘Tukuy tiempopim chiqap amigoqa kuyakun. Sasachakuy tiempopipas wawqi hinaraqmi kuyakun’, nispa (Proverbios 17:17).

Jehova Diosmi chayna hatun llakinchikpi allin amistadninchikqa. Chaymi tukuy ima llakinchikmanta Diosman willakunanchik, payqa ñuqanchikmantam ‘nanachikun’ (1 Pedro 5:7). Chaynata ruwaptinchikqa Diosmi sunqunchikta ‘hawkayaykachinqa’ (Filipenses 4:6, 7). Chaymantapas kallpanchasqa kananchikpaqmi palabranta ñawinchananchik. Allinmi kanman bibliapi wakin kallpanchawaqninchik yachachikuyninkunata umallamanta yachayqa (qaway ‘ Bibliapi yanapakuykuna’  niq yachachikuyta). Bibliapa chayna nisqankunapi yuyaymanayninchikqa yanapawasunmi tutankuna mana puñuyta atiptinchikpas (Isaias 57:15).

40 watanpi Jack sutiyuq runapa warminmi cancer unquywan qayninpakunalla wañukurqa. Wakinpiqa mana piniyuq hinam tarikullan, ichaqa Diosta mañakusqanmi anchata yanapachkan. Paymi nin: “Jehova Diosta mañakuspayqa manam sapallay hinachu tarikuni. Yaqa sapa kutillam tutankuna rikchariruspayqa manaña puñuytaqa tarinichu. Ichaqa bibliata ñawinchaykuspa yuyaymanaptiymi hinaspa Diosta mañakuykuptiymi sunquy hawkayaykun, chayraqmi kaqmanta hawka puñuykuni”, nispa.

Vanessa sutiyuq sipaspa mamanmi unquspan wañukurqa, paytapas Diosta mañakusqanmi yanapaykurqa. Paymi nin: “Llumpay llakisqa tarikuspaymi amiy-amiyta waqaq kani, hinaspam Diospa sutinta rima-rimarispa mañakuq kani. Diosqa uyariykuwaspanmi yanapaykuwarqa”, nispa.

Llakipa qatisqan runakunata yanapaq runakunam ninku: ‘Chayna llakipi tarikuqkunaqa pitapas yanapaykunankupaqmi tiempochakunanku, chayqa allinninkupaqmi. Chayta ruwaspankum kallpanchasqa tarikunqaku’, nispa (Hechos 20:35). Diosta yupaychaq achka runakunam llakipi tarikuspankupas hukkunata yanapasqankuwan kallpanchasqa hinaspa kusisqa tarikunku (2 Corintios 1:3, 4).