Huk autoridad, ayllunchik utaq kuyasqanchik runa imatapas quykuwaptinchikqa ancha chaninniyuqpaqmi hapinchik, mana ancha chaninniyuq kaptinpas. Qallariyllanpi rimamusqanchik Jordanmanpas amistadninmi tajadorchata quykurqa. Ichaqa, ¿imapitaq kayqa tupan ñuqanchikrayku Jesuspa wañusqanwanqa?

Bibliam nin: “Diosninchikmi sapallan churinta kay pachaman kachamurqa churinrayku kawsakuyniyuq kananchikpaq”, nispa (1 Juan 4:9). Arí, tukuy imapi munaychakuq Diosninchikmi churinta quwarqanchik. Salmos qillqaqkunamanta huknin runam nirqa: ‘Qamlla tayta Dios kasqaykitayá riqsichunku, kay pachapi qamlla tukuy imapa hawanpi munaychakuq kasqaykitayá yachachunku’, nispa (Salmo 83:18, Chuya Qellqa 2012). Manam Diosninchik hina ancha atiyniyuqmantaqa pimantapas imatapas chaskichwanchu.

Chaymantapas, Diosninchikqa ‘taytanchikmi’ kawsayta quwasqanchikrayku (Isaias 63:16). Allin tayta hinam qawawachkanchik allinlla kawsakunapaq. Ñawpaq Israel nacionpi Efrain casta ayllumanta rimaspanmi Diosqa nirqa: “Kuyayllapaq churiy hinam Efrain castaqa. Kuyasqay warmay hinam Efrain castaqa. [...] Anchallatañam llakikuni paymantaqa”, nispa (Jeremias 31:20). Kunanpas, hina chaynallatam Diosqa lliw serviqninkunata kuyan. Ancha atiyniyuq kachkaspanpas kuyakuq taytam. Chaymi, Diosmanta imatapas chaskiyqa ancha kusikunapaq.

Pipas kuyawasqanchikrayku imatapas quykuwaptinchikqa anchatam kusikunchik. Chayna qukuykuq runaqa manam suyanchu kutichipunankutaqa.

Diospas anchata kuyawasqanchikraykum churinta ñuqanchikrayku wañunanpaq kachamurqa, bibliam nin: “Diosninchikmi sapallan churinta [...] kachamurqa churinrayku kawsakuyniyuq kananchikpaq, chaynatam Diosninchikqa kuyawasqanchikta qawachiwarqanchik”, nispa (1 Juan 4:9). Diosqa manam churin Jesustaqa kachamunanpunichu karqa. Aswanqa, ñuqanchikrayku Jesuspa wañusqanmi qawachirqa Diospa “ancha kuyakuyninta” (Romanos 3:24).

¿Imanasqataq kayqa Diospa ‘ancha kuyakuynin’? Bibliam nin: “Diosmi [...] kuyakuyninta qawachiwanchik huchasaparaq kachkaptinchik ñuqanchikpa rantinchikpi Cristopa wañukusqanwan”, nispa (Romanos 5:8). Hatun kuyakuyninpim Diosqa, huchasapa runakunata llakipayaykuwaspanchik churinta ñuqanchikrayku wañunanpaq kachamurqa. Manamá imayna kutichipuytapas atisunchu.

Pipas imatapas quykuwananchikpaq tukuy ima ruwasqanmanta yacharuspaqa anchatam chaninchanchik, utaq ancha kuyasqanta quykuwaptinchikqa anchatam chaninchanchik.

Diosqa ‘sapallan churintam quwarqanchik’ (Juan 3:16). Manam pipas churin hina ancha kuyasqanqa karqachu. Hanaq pachata wara-waranqantin watakuna ruwaptinmi, churin Jesuspas yanapaysirqa. Chaymi Diosqa, anchata kuyarqa (Proverbios 8:30). Jesusqa taytan kaqllañam (Colosenses 1:13-15). Manam kanchu Dioswan Jesus hina ancha kuyanakuqkunaqa.

Ichaqa Diosqa, anchata churin Jesusta kuyachkaspanpas, ñuqanchikrayku wañunanpaqmi kachamurqa (Romanos 8:32). Manam tukuy ima quwasqanchikpas chayna ancha kuyawasqanchiktaqa qawachirqachu.

Sichum imapas quykuwasqanchik allinta serviwaptinchikqa anchatam chaninchanchik. Kaypi piensariy: Ima unquywanpas wañuy patanpiña tarikuchkaptiki hampichikunaykipaq qullqiki mana kachkaptin, mana riqsisqayki runa qullqinwan hampiykachisuptikiqa, mayna agradecesqach kawaq ¿aw?

Bibliam nin: “Imaynam Adanrayku lliw runakuna wañuchkanku, chaynallataqmi Cristoraykupas lliw runakuna kawsarimunqaku”, nispa (1 Corintios 15:22). Adanpa mirayninkuna kasqanchikraykum ‘wañuchkachwanpas’ hinaña tarikunchik, ¿imanasqa? Manam pipas librakuyta atichwanchu unquymantawan wañuymantaqa, manataqmi Dioswan allinyanakuytapas atichwanchu nitaq mana huchayuqña kaytapas. Manataqmi runa ‘kawsarichiytapas’ atichwanchu. Bibliam niwanchik: ‘[Runaqa] manam wawqintaqa qullqillawanqa libranmanchu. Manataqmi librakunanpaqqa Diosmanqa paganmanchu’, nispa (Salmo 49:7, 8). Chaymi runakunaqa kawsayta mana rantiyta atisqanchikrayku necesitanchikpuni pipas librawananchikta.

Anchata kuyawasqanchikraykum, Jehova Diosqa ñuqanchikrayku Jesus wañunanpaq kachamurqa, chaynapi manaña wañunapaq. Ichaqa, ¿imanasqam  manaña wañusunchu? ‘Jesuspa yawarnin lliw huchanchikmanta mayllawasqanchikraykum’. Huk simipiqa, Jesuspa yawarnin huchanchikkunata mayllasqanmanta mana iskayrayaspaqa atisunmi wiñay kawsay haypayta (1 Juan 1:7; 5:13). Jesuspa wañusqanraykutaqmi, wañusqa ayllunchikkunapas kawsarimunqaku, chaytam biblia nin: “Imaynam wañuy rikurirurqa huk runallawan, chaynam wañuqkunapas kawsarimunqa [Jesusllawan]”, nispa (1 Corintios 15:21). *

Ñuqanchikrayku Jesuspa wañusqanmi Diospa tukuy ima quwasqanchikmantapas ancha allin, ¿imanasqa? Ancha-anchata kuyawaspanchik kachamusqanraykum. Manam pipas chayna ancha chaninniyuqtaqa quwarqanchikchu. Manataqmi Jesuspa wañusqan hinaqa imapas wañuymantawan huchamantaqa librawachwanchu. Arí, Diospa ancha kuyakuyninmá ñuqanchikrayku Jesuspa wañusqanqa.