Achkam ninku: “Pipapas nacesqan punchawpi lucerokunapa hinaspa killapa maypi kasqanmi qawachin imayna runa kananta”, nispa.

Ñawpaq tiempomantaraqmi Babilonia nacionpi runakunaqa lucerokunata qawaspanku imatapas willakuqku, ichaqa kunanpas achka runakunam chaykunapi creenku. 2012 watapim Estados Unidospi runakunata tapurqaku lucerokunata qawaspa willakusqankumanta ima piensasqankuta, hinaptinmi achkallaña nirqaku chayqa yachaysapa runakunapa yachachisqankuwan tupasqanta. Ichaqa ¿chaynachu? Manam. Imanasqa mana chayna kasqanmantayá yachaykusun.

• Lucerokunapa hinaspa killapa maypi kasqankuqa manam willawachwanchu runakuna imayna kanankumantaqa.

• Lucerokunata qawaspanku willakuqkunaqa yanqatam willakunku.

• Lucerokunata qawaspa adivinaqkunaqa ñawpaq runakuna piensasqankuman hinam willakunku, ñawpaqtaqa niqkum allpa pachapa muyuriqninta intiwan imakunapas muyusqanta, ichaqa manam chaynachu.

• Lucerokunata qawaqkunapa nisqanqa manam chaynallachu, hukta-huktam ninku.

• Lucerokunawan adivinaqkunapa nisqankuman hinaqa haykapi nacesqankuman hinas runakunaqa rakisqa kachkanku chunka iskayniyuqman, chayna rakisqaqa kachkanku nacesqanku punchawpi lucerokunapa imayna kasqanman hinas. Ichaqa kay pachaqa tiempopa risqanman hinam mana hinallapichu kachkan, aswanqa kuyuchkanmi. Chaymi pipapas nacesqan punchawpi lucerokunaqa mana chaynallañachu nitaq hinallapichu kachkan.

Lucerokunata qawaspa imatapas willakuqkunaqa ninkum ima punchawpi nacesqanman hina pipas allin utaq mana allin runa kasqanta. Ichaqa manamá chay punchawlla naceqkunapas chaynallachu kanku. Manam pitapas nichwanchu: “Kay punchawpi nacesqaykiraykum kayna utaq wakna kanki”, nispaqa. Lucerokunata qawaspa adivinaqkunaqa mana allinta yachaspam runakuna imayna kasqankumanta imatapas ninku. Arí, mana allinta yachachkaspa runakunamanta imatapas niyqa manam allinchu.

Ñawpaqmantaraqmi runakunaqa imamantapas yachayta munaspankuqa riqku qatipaqkunaman. Wakin qatipaqkunaqa suertetam qawaqku uywakunapa utaq runapa chunchulninkunata qawaspanku hinaspa wallpapa imayna tuspasqanta qawaspanku. Wakinkuñataqmi yakuta tomaruspanku suertenkuta yachanankupaq vasonkuta qawaqku. Kunanqa cocawan, naipeswan hinaspa dadokunawanpas qawankum. Ichaqa chaykunata qawaspanku qatipasqankuqa manam allinchu, ¿imanasqa? Chaymantayá yachaykusun.

Qatipaqkunapa willakusqankuqa manam tupanchu. Sichu pipas tapukunman iskay qatipaq runakunata hinaptinqa manam chaynallatachu imatapas ninqaku, aswanqa hukta-huktam ninku.

Runakunam ninku qatipaqkunaqa runakuna imayna kasqankuman hinalla imatapas willakusqankuta, chaynataq imapas servichikusqankuqa yanqalla kasqanta. Wakin qatipaqkunaqa tapuqnin riq runakunatam puntataraq imayna kasqankumanta tapuykunku, hinaspañam uyarisqankuman hinalla tapuqnin runamanqa imatapas ninku. Tapuqnin runañataqmi allinpaq hapispan achka qullqita qun.

Adivinaqkunawan qatipaqkunaqa ninkum imapaqpas destinasqaña kasqanchikta. ¿Ichaqa chaynachu? Manam, bibliam nin sapakama imata ruwananchikpaq utaq imayna kananchikpaq akllakuyta atisqanchikmanta, nintaqmi kunan imapas tanteakusqanchikman hina hamuq punchawkunapipas imayna kananchikmanta (Josuey 24:15).

Dioswan kuyachikuyta munaqkunaqa manam adivinaqkunatawan qatipaqkunataqa tapukunanchikchu, ¿imanasqa? Diosmi palabranpi nin: ‘Qamkuna ukupiqa amam kanqachu qatipaqkunapas, qawaqkunapas, layqakunapas, mesa mastaqkunapas, wañuqpa almanta qayaqkunapas, espiritistakunapas. Chaykuna ruwaqtaqa tayta Diosmi millakun. Chay nacionkunataqa chayna millakuypaq kaqkunata ruwasqankuraykum qayllaykichikmanta señornikichik tayta Dios wischunqa’, nispa (Deuteronomio 18:10-12).