LUCIAQA WISTU CHAKICHAM. Taksachallaraq kachkaptinmi poliomielitis nisqanku unquy hapirurqa, hinaptinmi wistu chaki qiparurqa. 16 watanpi kachkaptinmi patronan kaynata nispan sunqunta nanarachirqa: “Mamaykita mana kasusqaykiraykum Diosqa castigarusunki chayna wistu kanaykipaq”, nispa. Kunankamam chayna nisqanta mana qunqanchu.

DAMARISPA UMANPIM TUMOR RIKURIRURQA. Papanmi nirqa: “Ima mana allintachiki ruwarurqanki, chaychiki Diosqa castigasuchkanki”, nispa. Papan chaynata niykuptinmi Damarisqa astawan hukmanyarurqa, mana pipa kuyasqan hinam tarikullarqa.

Ñawpaqmantapacham runakunaqa ninku unquyqa Diospa castigon kasqanta. Usos y costumbres de las tierras bíblicas qillqapas ninmi: “Jesuspa tiemponpiqa runakunaqa niqkum: ‘Pipas unqunqa huchanraykum utaq ayllunpa huchanraykum, chaynatam Diosqa castigan’”, nispa. Huk qillqapas ninmi: “Ñawpaqtaqa runakunaqa niqkum Diosqa huchanchikrayku unquykunawan castigawasqanchikmanta”, nispa (Medieval Medicine and the Plague). Ichaqa, Europa lawpi yaqa 1300 watakunapi unquywan wara-waranqantin runakunapa wañusqanqa ¿Diospa castigunchu karqa icha imanasqam chay unquyqa rikurirurqa? Ichapas qampas tapukunki sichum Diosqa runakunata huchankurayku unquywan castigasqanmanta. *

KAYPI YUYAYMANAY: Sichum Diosqa runakunata huchankurayku unquywan utaq ima ñakariywanpas castigaptinqa, ¿imanasqataq Jesusqa huchayuq runakunata sanoyaykachirqa? Chayta ruwasqanwanqa Diospa contranpim huqarikuchkanman karqa (Mateo 4:23, 24). Ichaqa, Jesusqa manamá taytanpa contranpiqa sayarinmanchu. Kikinmi nirqa ‘taytanpa kamachisqanman hina imam kaqta ruwasqanmanta’ hinaspa taytanpa ‘munasqan kaqkunata ruwasqanmanta’ (Juan 8:29; 14:31).

Bibliam nin Jehova Diospiqa ‘ima mana allinpas’ mana kasqanmanta (Deuteronomio 32:4). Kaypi yuyaymanay: Carro wichiykuptinqa allin runapas hinaspa mana allin runapas wañunmi, ichaqa ¿yaqachum Diosqa huk runata castigananraykulla carrotaqa wichiykachinman? Manamá. Diosta serviq Abrahanpas nirqam ‘kay pachapa jueznin Diosqa’ allin ruwaqtaqa mana allin ruwaqtawan kuskataqa mana puchukachisqanmanta (Genesis 18:25). Bibliaqa ninraqmi: “Mana allintaqa Diosqa manam ruwanmanchu”, nispa (Job 34:10-12).

Ñakarinchikqa manam huchanchikrayku Dios castigawaptinchikchu. Chayna kasqantam Jesus nirqa nacesqanmantapacha ñawsa runata sanoyachispan. Qatiqninkunam Jesusta tapurqaku: ‘Yachachikuq, kay runa ñawsa nacenanpaqqa, ¿pitaq huchallikurqa? ¿Paychu icha tayta-mamanchu?’, nispa. Hinaptinmi Jesusqa nirqa: ‘Manam kay runachu nitaq tayta-mamanchu huchallikurqaqa’, nispa (Juan 9:1-3).

Jesuspa tiemponpi runakunapas niqkum huchanchikrayku Diosqa castigawasqanchikmanta. Jesusmi ichaqa qatiqninkunata nirqa mana chayna kasqanmanta, chaywanqa qatiqninkunaqa admirakurqakuchá. Hinaspam Jesusqa chay ñawsa  runapa ñawinta kichaykurqa (Juan 9:6, 7). Arí, manamá Dioschu ñakarichiwanchikqa, ¡kayta yachayqa mayna allinmi unquqkunapaqqa!

Bibliam nin:

• “Diostaqa manam pipas mana allinwanqa sasachanmanchu, manataqmi pitapas Diosqa sasachakuymanqa churanmanchu” (SANTIAGO 1:13). Chaymantapas, manapas unaymantam Diosqa wiñaypaq chinkachinqaña unquyta, wañuyta hinaspa imapas ñakarichiwaqninchikkunata.

• Jesucristoqa ‘llapallan ñakariqkunatam sanoyarachirqa’ (MATEO 8:16). Chaywanmi qawachichkarqa hamuq tiempopi kay allpa pachata kamachispanqa lliw runata sanoyachinanmanta.

• “Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas. Ñawpaq kaqkunaqa tukurunñam” (APOCALIPSIS 21:3-5).

Chaynaqa, ¿imaynanpitaq kaynaña ñakariykunata kay pachapiqa qawachkanchik? Diosqariki manam ñakarichiwanchikchu, hinaptinqa ¿pitaq? Ñawpaqmantaraqmi chaymanta runakuna yachayta munanku. Qatiqninpim chaymanta yachasunchik.